ལུག་ལྤགས་མཉེ་ཐབས་ལ་རིགས་བཞི་ཡོད་པ་ལས།དང་པོ་ལུག་ལྤགས་སྐམ་པོ་མཉེ་ན།ལུག་ལྤགས་དེ་ས་གནས་ས་སེར་འདམ་ཁུར་བྱས་ནས་སྤང་བདེ་མོ་ངོས་མཉམ་སྟེང་དུ་བཏིང་ནས་སྦང་དགོས་ཏེ།སྦང་ཡུན་ནི་ཉིན་ཞག་གཅིག་གིས་ཆོག་ལ།དེ་ནས་པགས་པའི་ངོས་ཀྱི་ཤ་ཐམས་ཅད་རྡོ་ཟོར་སོགས་ཀྱིས་བཅད་བཞར་བྱས་ནས་པགས་པའི་ཤ་འགོ་ཡང་ཅུང་ཟད་ཙམ་ཞིག་ཟིང་འཇུག་དགོས།པགས་པ་སྐྱ་འཕུར་ཉིན་ཕྱེད་ཙམ་བཏང་ནས་ད་གཟོད་སྐུད་རྒྱག་པར།སྐུད་རྒྱག་བྱེད་རྒྱུ་དང་ཚད་ནི་པགས་པ་གཅིག་ལ་མར་སྲང་གང་དང་ཀླད་རུལ་སྲང་དོ་ཙམ་འབྱུག  སྐུད་དེ་ཉི་མ་དྲོ་སར་བརྒྱབ་ནས་འཐུང་ཚད་ཆེ་བས་བཟང་ལ།སྐུད་བརྒྱབ་ཚར་རྗེས་པགས་པ་རྣམས་ཁ་ཡག་པོ་བསུམ་ནས་ཕུར་པའམ་པགས་ཤད་བཅས་དབྱུག་པ་གཉིས་ཀྱིས་གཅུ་ཕུར་བརྒྱབ་ནས་གཅུ་ཕུར་གྱི་མགོ་གཉིས་ཀ་མཉམ་དུ་ཐག་པས་བསྡམས་ནས།ཉི་མ་གསུམ་བཞིའི་རིང་ལ་ཉི་མ་དྲོད་ཡོད་སར་དྲོས་བཅུག་ནས་སྒྱུར་ལོག་རེ་བརྒྱབ་སྟེ་རང་སར་འཇོག་དགོས།དེའི་རྗེས་སུ་ཉིན་རེ་ལ་ཁ་རེ་ཕྱེ་ནས་ཐེངས་གཉིས་གསུམ་རེ་ཙམ་གྱིས་བརྒྱང་འཐེན་དང་ལག་མཉེན་ཀྱིས་འཕུར་འཕུར་ཡང་ཡང་བཏང་སྟེ།ཡང་གཅུ་ཕུར་བརྒྱབ་ནས་འཇོག་དགོས། དེ་ལྟར་ཉིན་དྲུག་བྱས་ན་སྐུད་འཐུང་པགས་པ་དུལ་ནས།མཉེས་མ་དར་འདྲ་བ་ཟེར་བ་དེ་འོང་ངོ་།།
 གཉིས་པ་ལུག་ལྤགས་རློན་མཉེ་ནི།བཤས་མ་ཐག་པའི་ལུག་ལྤགས་རློན་པ་དེ་ཤ་གཅོད་ཞོར་དང་མཉེ་ཞོར་སྐམ་ཞོར་གྱིས་ལུག་ལྤགས་སྐམ་ཐག་ཆོད་དུས་མཉེས་ཚར་བ་ཡིན།
གསུམ་པ།ལུག་ལྤགས་སྐམ་པོ་སྤང་ཐབས་ཤ་གཅོད་སོགས་དང་པོ་དང་འདྲ་ལ།སྐུད་རྒྱག་བྱེད་ཞོ་སྐྱུར་དང་ད་ར་ལས་བྱས་ཏེ་མཉེ་སྟངས་སོགས་གོང་ལྟར་ལ།མཉེས་ཟིན་པ་དང་ལུག་ལྤགས་ལེགས་པར་བཏིང་པའི་སྟེང་ཇ་དྭངས་ནང་མར་འཕངས་པ་ཁ་སྤྲའི་ཆབ་ཆབ་བཏབ་སྟེ་ཡང་ཡང་མཉེ་ཞིང་སྐམ་ཐག་བཅད་ནས་གྲུབ་བོ།། བཞི་པ་ནི།རྡོ་ཞོ་ལས་མཉེ་ཐབས་ཏེ།འདིའི་ལག་ལེན་དེང་སང་མཚོ་སྔོན་ཤར་རྒྱུད་དང་།ཀན་སུའུ་ཞིང་ཆེན་སོགས་ས་ཆ་མང་པོར་དར་ཡང་།བོད་སྲོལ་རྒྱུན་གྱི་ལག་ཤེས་མིན་ཕྱིར་མང་དུ་མ་བྲིས་སོ།། སྤྱིར་ཀླད་རུལ་གྱིས་མཉེས་པ་དེར་རྒྱུ་འབོལ་བ།མཉེ་ལེགས་པ།ཡུན་དུ་གནས་པ་སོགས་དགེ་མཚན་མང་ཡང་དྲི་མ་ཆོད་དཀའ། རློམ་མཉེ་མགྱོགས་ཀྱང་རློན་དུས་མཉེ་མ་ཐུབ་ན་བཅོས་དཀའ།མཉེན་འབོལ་ཆུང་།ད་ར་མཉེད་ལ་དྲི་ངན་མེད་ཀྱང་མཉེ་ཡུན་རིང་།མཉེན་འབོལ་ཆུང་།
རྡོ་ཞོ་མཉེ་ལ་དྲི་ངན་མེད།ཐོག་མར་ལེགས་པ་ལྟར་ཡོད་ཀྱང་པགས་པར་སྲ་མེད་སྤུ་ཆད་མེད་དུ་འཐོར།ཆུ་འཁྲུ་མི་ཁྱོག་པས་མཉེ་བཟོ་ནང་གི་ཐ་མ་ཡིན། མཉེ་བཟོ་ལ་གཟབ་བྱ་ནི།མཉེ་ངན་མཉེ་དེ་མཐའ་ནས་གྱོང་།འཐག་ངན་ཐག་དེ་དཀྱིལ་ནས་བུག །ཟེར་བ་ཡིན་པས་མཐའ་དབུས་ཀུན་ལ་ཁྱད་པར་མེད་པ་ཞིག་ཐོན་དགོས་སོ།།