༡  ཞུན་ལིང་འཐར་རྡུང་གི་ཤེས་བྱ།
གསེར་དངུལ་ཟངས་སོགས་བཞུས་པའི་ཁུ་བ་ལྕགས་གཞོང（ལིང་ཕོར་ཡང་ཟེར）ཆུང་ངུའི་ནང་བཟོ་དབྱིབས་གང་འདོད་ལྟར་བླུགས་རྗེས་རང་མལ་དུ་གྲང་བཅུག་པ་དེར་ཞུན་ལིན་ཟེར། དེ་ཡང་བླུགས་ཚར་མ་ཐག་ཆུའི་ནང་དུ་བཅུག་པ་སོགས་བྱས་ན་རང་ངར་ཆུད་ནས་བརྡུང་བའི་སྐབས་སུ་གས་ཆག་འབྱུང་བའི་ཉེན་ཡོད་པས་རང་བཞིན་དུ་གྲང་དུ་འཇུག་དགོས། དེ་རྗེས་ཐོ་བ་ཤུགས་ཆུང་ངུས་ངོས་ཡོངས་རྫོགས་བཅག་ཙམ་རྡུང་ལ་སོལ་མེར་སྲེག་པ་དང་། གྲང་རྗེས་ཡང་རྡུང་བ་སོགས་ཐེངས་ལྔ་ནས་བདུན་བར་རིམ་གྱིས་ཐོ་བ་ཤུགས་ཇེ་ཆེར་བཏང་སྟེ་རྡུང་། ཐོག་མ་ནས་རྡུང་ཤུགས་ཆེ་དྲགས་ན་གསེར་དངུལ་སྙིང་གས་པ་ཞེས་བྱ་སྟེ་གང་སར་གས་གྲུམ་དང་སེར་ཀ་འབྱུང་བས་བྲེལ་བ་བྱེད་མི་རུང་། དེ་ནས་རིམ་གྱིས་ཞུན་ལིང་དེ་ཉིད་མཁྲེགས་པོར་གྱུར་པ་དང་། སེར་ཀ་གས་པ་སོགས་མ་བྱུང་ནས་ལིང་འཇགས་པ་ཡིན་པས་ཤེད་ཤུགས་བསྐྱེད་ནས་གང་འདོད་ལྟར་བརྡུང་ཆོག  གསེར་དང་དངུལ་གཉིས་བྲེལ་བ་ཆེན་པོ་ཡོད་སྐབས་མེ་ལ་རན་པར（མེ་སྟག་འཕྲོ་བ་ཙམ）བསྲེགས་ཏེ་ཚ་རྡུང་བྱས་ན་ལས་སླ་ལ་མགྱོགས་པ（གསེར་དངུལ་གྱི་སྤུས་ཚད་ཅི་ཙམ་བཟང་བ་དེ་ཙམ་གྱིས་ཚ་རྡུང་བྱེད་ཆོག་པ་ཡིན）ཡོད་རུང་།བྲེལ་བ་ཚ་བོ་མེད་ན་གྲང་རྡུང་ཁོ་ན་བྱས་ན་ལེགས། སྟོང་དང་ཟགས་རག་སོགས་ནི་གྲང་རྡུང་མ་གཏོགས་ཚ་རྡུང་བྱས་ན་གས་གྲུག་འབྱུང་བས་མི་རུང་ངོ་། ། གང་ལྟར་ཡང་ཆེ་རྡུང་ཚར་བ་དང་གྲང་རྡུང་ཁོ་ན་བྱ་ཞིང་ཐེངས་རེ་རེ་བརྡུངས་ཚར་རྗེས་སོལ་མེར་ཐེངས་རེ་བསྲེག་དགོས། བརྡུང་བའི་སྐབས་ཐོ་ཤུགས་ཆེ་ཆུང་གི་ཧེ་བག་མི་ཤོར་བ་དང་། བར་མཚམས་མི་ལུས་པར་བྱས་ཏེ་མཐར་ཆགས་སུ་རྡུང་དགོས་ཤིང་། ལྷག་པར་དུ་ཐོ་ཟུར་རྣོན་པོ་མ་འཁེལ་བ་བྱ་རྒྱུ་གལ་ཆེ། བསྲེགས་རྗེས་རང་བཞིན་དུ་གྲང་དུ་འཇུག་པ་ཁོ་ན་ལེགས་ཀྱང་བྲེལ་བ་ཡོད་སྐབས་ལིང་འཇགས་རྗེས་རྩེ་གཞིལ་ཙམ་ནས་ཆུའི་ནང་བསུབ་སྟེ་གྲང་བཅུག་ནའང་ཆོག   སྟོང་དང་ཟངས་རག་རྣམས་མས་རྡོ་སྟེ་ཆུ་རྡོ་སྤུས་ལེགས་འཇམ་པོའི་ཐོག་བརྡུང་ན་ལེགས། ལྕགས་ནི་ཞུན་རྡུང་དགོས་རིགས་ཚང་མ་སོལ་མེར་བསྲེགས་ནས་དཀར་པོའམ་དམར་པོའི་སྐབས་སུ་ཚ་རྡུང་བྱ་བ་ཡིན་ནོ།