གོང་དུ་ཞུས་པ་ལྟར་མདོ་དབུས་ཁམས་གསུམ་དུ་གླུ་མ་དབྱངས་ཅན་ལྷ་མོ་ཞེས་ན་མི་གོ་མཁན་ཧ་ལམ་མེད་ལ་ལྷ་མོ་དབྱངས་ཅན་མའི་ངག་གི་དངོས་གྲུབ་ཐོབ་པ་ལྟ་བུའི་སྙན་འཇེབས་ཀྱི་གླུ་གཞས་ནི་ཀུན་གྱི་ཡིད་ཀྱི་གསོས་སུ་གྱུར་ཡོད།མཚམས་འདིར་སླེབས་དུས་ཁོ་མོའི་རྣ་དབང་འཕྲོག་ལ་ཡིད་སེམས་འགུག་པའི་སྙན་ཞིང་འཇེབས་པའི་གླུ་དབྱངས་དེ་སླར་ཡང་ཇ་དར་རྩེ་མདོའི་སྲང་ལམ་ནས་གྲག་ཡོང་པས་ངའི་ཡིད་དབང་དང་རྣ་དབང་ཡང་དེའི་ཕྱོགས་སུ་འཁོར་ཏེ་སླར་བསྐོར་མི་ཐུབ་པས་ད་ནས་བསྟོད་སྨད་དང་ཡིན་མིན་གྱི་ལབ་བརྡོལ་མི་འབྱིན་པར་རེ་ཞིག་མཚམས་བཞག་སྟེ་སེམས་རྣལ་དུ་ཕབ་ནས་དབྱངས་ཅན་ལྷ་མོའི་གླུ་དབྱངས་ལ་རོལ་མྱོང་བྱེད་བཞིན་དུ་སྔོན་ལས་བླ་ན་འབར་ཞིང་ཁྱད་དུ་འཕགས་པའི་ཉི་ཟླ་ལྟ་བུ།མེ་ཏོག་ནང་བཞིན།གཙང་ཆུ་ནང་ལྟར་གྱི་གླུ་གཞས་ལ་རེ་སྒུག་བྱའོ།།།།