བཟང་ལ་བཟང་བསྟོད་དང་ངན་ལ་ངན་སྨད་མ་བྱས་ན་བཟང་པོ་ངན་པར་འགྱུར་ཉེན་ཡོད་པསཉིས་སྟོང་གསུམ་ལོར་ཁོང་ལ་རྒྱལ་ཡོངས་མཆོག་ཏུ་གྱུར་བའི་དམངས་གླུ་བཅུ་ཡི་བྱ་དགའ་ཐོབ་པ་མ་ཚད་ཉིས་སྟོང་ལྔ་ལོར་བོད་ལྗོངས་བོད་ཀྱི་ལོ་སར་རུ་ལྟད་མོ་བ་རྣམས་ཀྱིས་ཆེས་དགའ་བསུ་ཞུ་བའི་གླུ་མ་ཞེས་པའི་བྱ་དགའ་ཐོབ།དེང་སང་མདོ་དབུས་ཁམས་གསུམ་དུ་གླུ་པ་དང་གླུ་མ་མ་མང་ནའང་ཉུང་རྒྱུ་མེད་ཀྱང་མང་ཤོས་ཀྱི་བརྩམས་ཆོས་ཀྱི་ཚིག་དོན་དང་གདངས་དབྱངས་སོགས་ཚད་མཐོ་བའི་སྒྱུ་རྩལ་གྱིས་ཟིན་མེད་པས་གསོན་ཤུགས་ཀྱང་ཉམས་ཏེ་མི་རྣམས་ལ་བག་ཆགས་ཟབ་མོ་བཞག་མེད་ལ་ཤུགས་རྐྱེན་ཆེན་མོའང་ཐེབས་མེད།འོན་ཀྱང་དབྱངས་ཅན་ལྷ་མོའི་གླུ་དབྱངས་ནི་ཤིང་ཕུང་དབྱར་སྔོ་དགུན་སྔོ་ལྟར་དུས་ཀྱི་དབང་གིས་ཉམས་ཉེས་མེད་པར་དུས་ནམ་ཡང་བོད་མི་རྒན་གཞོན་རྣམས་ཀྱིས་ངག་ལ་ཁྱེར་ཏེ་ས་ཁྱབ་རྡོ་ཁྱབ་ཏུ་གྱུར་པའི་རྒྱུ་མཚན་ནི་དམངས་ཁྲོད་ཀྱི་གླུ་གཞས་ནི་རས་གཞི་དཀར་པོ་ལྟ་བུ་ཞིག་ཡིན་ན་དེ་ལ་དུས་རབས་ཀྱི་རྒྱུ་ཆའི་རི་མོ་འོས་ཤིང་འཚམ་པ་བྲིས་ན་གཞན་ཡིད་འཕྲོག་པ་ནང་བཞིན་ཁོང་གི་གླུ་གཞས་ལ་སྲོལ་རྒྱུན་གྱི་ཉམས་ཀྱིས་ཕྱུག་ཅིང་དུས་རབས་ཀྱི་རྒྱན་གྱིས་ཀྱང་སྤྲས་ཡོད་པས་མི་རྣམས་ཀྱིས་དགའ་བསུ་ཞུས་པའང་རྒྱུ་མཚན་དེ་འདྲ་ཞིག་ལ་ཐུག་པ་ལོས་ཡིན་གསུངས་པ་དེ་ནི་ངེས་པ་དོན་གྱི་གླུ་མ་ཞིག་གིས་དཔྱོད་ཤེས་ཀྱིས་ཕྱོགས་སྡོམ་གནང་བའི་བདེན་གཏམ་རེད།
     གལ་སྲིད་གླུ་མ་ལེན་ན་ངས་ཅི་ཞིག་བསྒྲུབ་དགོས་པ་དང་གང་ཞིག་སྒྲུབ་ཐུབ་པའང་མི་ཤེས།གླུ་གཞས་མེད་པ་ཡིན་ན་ངའི་མི་ཚེའང་སྟོང་ཟད་དུ་འགྱུར་ཐག་ཆོད་རེད།རོལ་མོ་དང་གླུ་དབྱངས་ཀྱིས་ངའི་འཚོ་བ་ལ་འོད་མདངས་འཕྲོས་ཏེ་བཀྲ་མདངས་ལྡན་པར་གྱུར་བས་ངས་ནམ་ཡང་གཞན་ལ་འགྲམ་ཆུ་ལྡང་མི་དགོས་པའི་ཤུལ་རྫས་སྣ་མང་བཞག་པའི་མེས་པོ་རྣམས་རྗེས་སུ་དྲན་པ་དང་རང་ལ་ཐུགས་ཁུར་གྱི་སྤྱན་དཀྱུས་གཡོ་བའི་སློབ་དཔོན་དང་གྲོགས་པོ།གྲོགས་མོ་དག་ལ་ཤ་གསེང་སྙིང་ཁོང་ནས་བཀའ་དྲིན་ཆེ་ཞེས་ཞུ་རྒྱུ་ཡིན་ཞེས་པ་ནི་ཁོང་གིས་ཕྱི་ནང་གི་གསར་འགོད་པ་དང་བཅས་པའི་མི་རྣམས་ལ་བཤད་མང་ལ་བརྗོད་འདོད་པའི་སྐད་ཆ་ རེད།