ཁ་བ་གོས་སུ་གྱོན་པའི་རྫ་འདབས་ནས།།
ལུག་ཁྱུའི་རྣམ་ཤེས་སྲུང་བའི་ནུ་བོ་ལགས།།
ཚན་རྩལ་མེ་ཏོག་འཕྱུར་བའི་དེང་གི་ཆར།།
རིག་པའི་མེ་ཏོག་བཞད་སའི་སློབ་གྲྭར་ཤོག །
 
འོ་མའི་ངད་ཁ་ལྡང་བའི་འབྲོག་ཐང་གི།།
སྦྲ་ནག་ལས་དབང་སྐྱོང་བའི་སྲིང་ཆུང་མ།།
རིག་པ་སྦྱང་བར་ཕོ་མོའི་དབྱེ་ཁྱད་མེད།།
གནས་ལམ་ཕྲ་མོ་མ་སྙེག་སློབ་གྲྭར་ཤོག །
 
སློབ་གྲྭ་འདས་པའི་ལོ་རྒྱུས་འཚོལ་ས་ཡིན།།
སློབ་གྲྭ་ད་ལྟའི་དུས་ཀྱི་མེ་ལོང་ཡིན།།
སློབ་གྲྭ་འབྱུང་འགྱུར་ཁ་ཕྱོགས་འཚོལ་ས་ཡིན།།
དེ་བས་ན་ཆུང་གྲོགས་དག་སློབ་གྲྭར་ཤོག  །