གྲོང་ཁྱེར་གྱི་འདུ་འཛི་དེ་སྐད་ཅིག་ཉིད་ལ་འཇགས་སོང་།
དུད་ཁྱིམ་རེའི་གསལ་ལ་མི་གསལ་བའི་གློག་སྒྲོན་ཁ་ཤས་དག
རྡོ་བས་བསྐྲུན་པའི་ཁང་ཆུང་གི་སྒེའུ་ཁུང་ལས་གཉོམ་པོར་འཚེར།
སྐབས་དེ་ནི་ས་རུབ་རྗེས་ཀྱི་གནའ་བོའི་རི་གྲོང་ཞིག་རེད།
ཆ་ལུགས་མ་རྒས་ཀྱང་སྐད་གདངས་རྒས་ཟིན་པའི་རི་གྲོང་ཞིག་རེད།
བྱིས་པའི་ངུ་སྐད་ཀྱི་སྐད་གདངས་དེ་ནི།
རི་གྲོང་གི་ཕྱོགས་མཚམས་ཀུན་ཏུ་མཆེད་ལ།
ཡུལ་མི་ཚོའི་ཚེ་སྲོག
རླུང་ཁ་ན་གཡོ་བའི་མར་མེ་ཇི་བཞིན་ལམ་ལམ་བྱེད།
 
རྒན་པོ་ཚོའི་བཤད་རྒྱུན་ལཏར་ན།
སྔོན་ཆད་རི་གྲོང་འདི་ན་དམར་པོ་ཁྲག་གི་ལོ་རྒྱུས་ཡོད་སྐད།
ཡིན་ན་ཡང་།
ལོ་རྒྱུས་འཕེལ་རིམ་གྱི་དཀྱོགས་མཚམས་འདི་ནས།
དར་མ་ཚོར་རྒས་པའི་སྐྱི་གཉེར་ཐོན་འདུག་ལ།
བྱིས་པ་ཚོ་རྒས་ནས་འཁར་བར་བརྟེན་འདུག
 
ཡོད་ཚད་ཐོབ་ཤོར་གྱི་དབང་དུ་སོང་བའི་གནས་འདི་ནས།
མྱོང་ཚོར་གང་མང་ཞིག་མི་རེའི་སེམས་གཏིང་དུ་འཇོག་སྲིད་ལ།
སྐྱོ་སྡུག་གང་མང་ཞིག་ཐ་མག་རྐང་གཅིག་དང་ལྷན་དུ་བརྔུབ་སྲིད།
ཡང་ན།ལྦུ་ཆང་ཁམ་གང་དང་མཉམ་དུ་འཐུང་སྲིད།