ཕ་སྐད་གཙང་མའི་འགྱུར་ཁུགས་རྟག་ཏུ་སྙན། །
མ་ཡིག་དྭངས་མའི་གཟི་འོད་ཕྱོགས་བཅུར་རྒྱས། །
ཕ་མེས་སྲོལ་རྒྱུན་བཟང་པོ་མ་ཉམས་པའི། །
རང་ཡུལ་གངས་རིའི་ཡུལ་ལྗོངས་ངོ་སོ་བསྟོད། །
 
རྟ་ནོར་ལུག་གིས་ཡངས་པའི་རྩྭ་ཐང་གང་། །
བཅུད་ལྡན་དཀར་གསུམ་དགོས་འདོད་ཆར་ལྟར་འབབ། །
རིན་ཆེན་ཐོན་ཁུངས་གཏེར་གྱི་བང་མཛོད་དངོས། །
ངོ་མཚར་ལྷ་དང་མཉམ་པ་གངས་རིའི་ལྗོངས། །
 
སྨན་རྫས་མི་དགོས་ལོ་ལེགས་བྱུར་བུར་གཏམས། །
གྲོ་ནས་སྲན་གསུམ་རི་བོའི་གཏོས་དང་མཉམ།།
དགོས་འདོད་ཐམས་ཅད་ལྷུན་གྱིས་གྲུབ་པ་ཡི། །
གངས་ལྗོངས་བསོད་ནམས་ཨ་སྔོན་དགུང་ལས་མཐོ། །
 
མུ་མཐའ་མེད་པའི་སྤང་ཐང་ཡངས་པོ་ན། །
དྭངས་གཙང་རྒྱུག་ཆུའི་བཞུར་སྒྲ་རྣ་བའི་བཅུད། །
མེ་ཏོག་སྣ་བརྒྱའི་དྲི་བསུང་ཕྱོགས་སུ་འགྱེད། །
ཁ་བ་གངས་ཀྱི་ཡུལ་ལྗོངས་ལྟ་ན་སྡུག །