ཕ་ཡུལ་ན་ཡོད་དུས།
བདག་གིས་ནམ་མཁའི་མཐོངས་སུ་ཟུག་པའི་ཁང་བརྩེགས་དང་།
ཁང་བརྩེགས་དེའི་འཇའ་ཚོན་གྱི་གློག་འོད་ལ་འཁྱིལ་བའི་གྲོང་ཁྱེར་པ།
ད་དུང་། ཁྲ་ཁྲ་རིག་རིག་གི་འཇིག་རྟེན་དེའི་ཡོད་ཚད་ལ་རེ་སྨོན་བྱས་མྱོང་།
 
དེ་རིང་།  ང་གྲོང་ཁྱེར་འདིའི་འབྱུང་བཞི་ལ་འདྲེས་དུས།
ངས་གྲོང་ཁྱེར་ལས་ལྷག་པའི་ཕ་ཡུལ་གྱི་དྲོད་ཁོལ་དང་བརྩེ་བ་དྲན་བྱུང་།
ཞོགས་པར། དྲི་སྣོམ་རྒྱལ་མོར་གནས་འདིའི་མཁའ་དབུགས་ཀྱི་འཇབ་རྒོལ་ཐེབས་དུས།
ངས་སྤྲིན་པ་དཀར་པོ་མཚོ་མོའི་རླབས་ལྟར་འཕྱུར་བའི་ཕ་ཡུལ་གྱི་ནམ་མཁའ་དང་།
ཞིང་གྲོང་གི་སྲང་ལམ་དུ་འཐིམ་པའི་ར་ལུག་གི་དྲི་མ་དེའང་དྲི་ཞིམ་ཞིག་ཏུ་སེམས་ཡོད།
ཁ་ཁབ་མིག་ཙམ་དང་། མགྲིན་པ་རྟ་རྔ་འདྲ་བ་དེའི་ཆེད་དུ།
སྲང་ལམ་གྱི་འགྱིག་སྣོད་དང་ཤོག་ཧྲུལ་འཐམ་པའི་རྒན་རྒོན་དག་མཐོང་ཚེ།
ངས་ཕ་ཡུལ་གྱི་ཉི་ཟེར་དྲོན་མོ་དང་། ཟླ་འོད་འཇམ་པོའི་ཁུགས་ན།
འཆི་བ་མེད་པའི་ལུས་རྟེན་ལ་འཁང་ར་བྱེད་བཞིན་པའི་མགོ་དཀར་དག་གི་ལས་སྣང་དག་མཐོང་བྱུང་།

སེམས་ཀྱི་མངའ་ཁོངས་ལ་མི་ཤོང་བའི་གནོན་ཤུགས་དང་།
ལུས་ཀྱི་ཕུང་བོ་ཡིས་མི་ཐེག་པའི་དཔེ་ཁུག་འཁུར་བའི་བྱིས་པ་དག་མཐོང་ཚེ།
བདག་གིས་ཆུང་ཆུང་ལུ་གུའི་རྨིག་རྗེས་དང་།
གྲོ་ཞིང་གི་རྣང་མའི་བར་ན་སྙེ་མ་ཕུར་ཕུར་བྱེད་པའི།
ཕ་ཡུལ་གྱི་བྱིས་པ་ཚོའི་རང་དབང་གི་འཇིག་རྟེན་དྲན་འོངས།
 
གྲོང་ཁྱེར་དུ་ངས་ཕ་ཡུལ་གྱི་རྫ་ཆུ་བསིལ་མ་ཐིགས་པ་གཅིག་གི་རིན་ཐང་རྟོགས་འོངས།
དེ་ནི་གད་སྙིགས་དང་རྫོབ་དྲིས་མ་བསླད་པའི་ཡན་ལག་བརྒྱད་ལྡན་གྱི་ཟེགས་མ་ཞིག
གྲོང་ཁྱེར་དུ་ངས་ཕ་ཡུལ་གྱི་མེ་ཏོག་རྐང་གཅིག་གི་མཛེས་པ་དྲན་འོངས།
དེ་ནི་ཕྱེ་ལེབ་དང་གསེར་སྦྲང་གིས་བསྐོར་བའི་སྔོན་མོ་སྤང་ལས་འཁྲུངས་པའི་མེ་ཏོག་སེར་ཆེན་ཞིག
……
འདི་ལྟར། ཕ་ཡུལ་གྱི་རི་བོ་ཆུ་རུ་འཐིམ་ཞིང་།
ཕ་ཡུལ་གྱི་ཆུ་བོས་རི་བོ་བསྐོར།
ད་དུང་། ཕ་ཡུལ་གྱི་མི་སེམས་མི་དང་འདྲེས་ཤིང་།
ཕ་ཡུལ་གྱི་གཅིག་བློ་གཅིག་ལ་བསྙེས་པས།
གྲོང་ཁྱེར་གྱི་ཟང་ཟིང་གི་ཕྱི་ཡི་བཀོད་པས།
བདག་གི་ནང་བསམ་པའི་དུངས་ཞེན་གྱི་རླབས་རྒྱུན་འགོག་མ་ཐུབ།