༼ལམ་དུ་ཆས་མཁན་ལ་ཕུལ་བའི་མཆོད་ཆང་། ༽
བཅུད་ལྡན་འོ་མ་ལན་བརྒྱར་བསྲུབས་པས་ཞིམ་མངར་མར་གྱི་ཕུང་བོ་རྙེད། །
གྲུ་བཞི་གྱོ་མོག་བརྒྱུད་མར་བསྒྲིགས་པས་བརྗིད་ཆགས་ངོ་མཚར་ཁང་བཟང་བསྐྲུན། །
ཉམ་ཆུང་མཛུབ་མོའི་ཉམས་ལ་གཟིགས་ནས་ཅི་ཡང་མི་ནུས་མ་སེམས་ཤིག །
རི་རྩེའི་ཆུ་རྒྱུན་དྭངས་མོའི་སྐད་སྙན་ཀླུང་ཆེན་བཞུར་སྒྲའི་སྔོན་འགྲོ་ཉིད། །
ཕུགས་བསམ་སྙིང་གི་ཁམས་སུ་བསྙལ་བའི་བདུད་རྩིའི་མཆོག་ནི་སྤོབས་པ་ལགས། །
ཁྱེད་ཀྱིས་བརྩོན་འགྲུས་ཕྱག་ཟུང་ཤུགས་ཀྱིས་ཀླད་དབང་འཁོར་ལོ་ཆེར་བསྐོར་ན། །
ལག་པའི་སོར་མོ་རེ་རེ་ཡིས་ཀྱང་གསེར་རི་རོལ་མཚོ་བསྐྱོམ་པར་ནུས།
༡༩༨༢ལོའི་དཔྱིད་ཀར།