ཁྱོད་ཀྱི་རིག་པ་མཁའ་ལ་འཕྱོ་བས་ཇོ་མོ་བླ་རིའི་གད་རྒྱངས་རིང་དུ་བསྲིངས།།
ཁྱོད་ཀྱི་སེམས་སྒྲ་དབྱིངས་སུ་ལྡིར་བས་ཡར་ཀླུང་གཙང་བོའི་གླུ་སྐད་མཐོ་རུ་བཏེགས།།
རྒྱལ་རབས་དབེན་པའི་རྒྱལ་ཁབ་དེ་རུ་མི་ལོ་དྲུག་བརྒྱ་ཕྱིན་པའི་དུས་ཚོད་ལ།།
ཁྱོད་ནི་འཇའ་ཚོན་སྒེག་མོ་བཞིན་དུ་དམངས་སེམས་དྲན་པའི་ངོས་སུ་གསལ་ཞིང་མཛེས།།
 
དྲག་ཤུགས་གློག་གི་ལྕུག་མ་དེ་ཡིས་དགུ་ཚིགས་མཁའ་ཡི་སྐར་འོད་བསྒྲིབས་མི་ནུས།།
 
འདམ་གྱིས་བྱས་པའི་ལྷ་ཡི་རྐང་པས་ཆུ་ཕྲན་བརྒལ་བར་མི་ནུས་ཁོ་བོར་གསལ།།
ས་གཞིར་དཔྱིད་ཀྱི་དཔལ་ཡོན་བསྐྲུན་མཁན་ལྷགས་གྲང་དགུན་ལས་ཐར་བའི་ཉི་ཟླ་ཡིན།།