རྟ་ལྗང་གཞོན་ནུས་འོད་ཟེར་བསྡུ་བཞིན་ཆུ་ལྷའི་ཞིང་ལ་དལ་གྱིས་བཞུད། །
    དྲི་བཞོན་འཇམ་པོས་སྡོང་ལོ་སྒུལ་བཞིན་འཛིན་མའི་ཁྱོན་ལ་ལྷོད་ཀྱིས་འཁྱམས། །
    ཉལ་འགྲོ་བུ་མོས་སྐྱོ་གླུ་ལེན་བཞིན་གྲོག་རོང་འགྲིམས་སྟེ་ཤང་ཤང་བཞུར། །
    ཁོ་བོའི་སེམས་པ་རླུང་བུའི་ཟོལ་གྱིས་མཛའ་མོའི་མལ་ལ་དབང་མེད་ཤོར། །
    ལ་ལུང་འཐོར་བའི་གཡང་དཀར་ལུག་ཁྱུས་བསིལ་རྩྭ་ཟ་བཞིན་ལྷས་ལ་འཁོར། །
    ལང་ལོང་རྒྱུ་བའི་དུ་ཞགས་རིང་མོས་སྤང་ཐང་ཡངས་པོར་བྱིལ་བྱིལ་བཏང་། །
    བཞོ་ཟེའུ་བཟུང་བའི་ན་ཆུང་བུ་མོས་འཇོ་དབྱངས་སྙན་མོ་ལྷང་ལྷང་འགུགས། །
    ཁོ་བོའི་མིག་ཟུང་མདའ་མོའི་ཟོལ་གྱིས་སྙིང་སྡུག་འབེན་ལ་ངང་གིས་ཕོག །
    མཚམས་སྤྲིན་དམར་པོ་བརྩེ་དགས་འཁྱུད་པའི་ལྷུན་སྡུག་རི་བོའི་གསེར་ཞྭ་མནབས། །
    གཤོག་འགྱུར་མཉེན་པའི་བྱ་དང་བྱེའུས་སྐྱོ་ངལ་ཁུར་ཏེ་ཚང་མལ་བསྙེགས། །
    ནེམ་ལྗང་གཡུ་ལོས་སྡུག་ཡུས་མ་ནོན་མགོ་བོ་སྨད་དེ་ཆུ་ཐིགས་སྦྲུམ། །
    ཁོ་བོས་སེམས་པར་དགའ་ལོ་རུམ་སྟེ་གོམ་ཁ་འཁྱོར་བཞིན་རྒྱང་འབུད་བཏང་། །
    ཟང་ཟིང་ལས་འཕྲོ་གནང་ལ་བསྐྱུར་ཏེ་ས་ཆེན་ཡངས་པོའི་ལྷིང་འཇགས་སྒོམ། །
    ལྷས་ཀྱི་བདེ་འཇགས་ཁུར་དུ་ལྕི་བའི་སྒོ་ཁྱི་བཙན་པོས་བྱ་ར་མཛད། །
    ཕྲེང་བར་བརྒྱུས་པའི་ས་སྲོས་མུ་ཏིག་སྲིད་པའི་མགུལ་ན་སྟར་ཐེངས་རེར། །
    དྲན་གླུའི་མེ་ཏོག་ཆར་དུ་བསྙིལ་བའི་ཉིན་ཞག་བསྐལ་མཐར་བགྲང་ནུས་མིན། །