འཚོ་བའི་ཁྲོད་དུ་གདམ་བྱ་མེད་ལ།
ངའི་གདམ་བྱ་ནི་དྲང་བདེན་ཡིན།
                     ༢
ཁྱོད་རང་འཇིག་རྟེན་འདིར་སླེབས་དུས་ལག་སྟོང་ཡིན་ལ། ཕྱིར་འགྲོ་དུས་ཀྱང་ལག་སྟོང་ཡིན། འདིར་ལག་སྟོང་གཉིས་ཀྱི་བར་མཚམས་ན་ཁྱོད་ཀྱི་བསམ་གཞིག་གི་ལམ་ཕྲན་དེ་སུ་ཞིག་གི་དྲང་བདེན་གྱི་རྒྱ་རྡོའི་ཀློང་ཁ་ལ་འཐིམ། དོན་ལྡན་གྱི་ལམ་སྣེ་ཞིག་འཚོལ་སྙེག་བགྱིས་ཏེ་དྲོད་ཀྱི་འོད་ཁྱིམ་དེད་ནས་འོད་སྣང་གི་བདེ་བ་ཙམ་ཞིག་མི་ཡུལ་དུ་སྤྲོས་ཤིག ང་ཚོ་སྐྱེ་འཇིག་གི་བར་ན་འཚང་ཁ་རྒྱག་པ་ཨེ་བདེན།
                    ༣
ལྡེ་མིག་ནི། དུས་རྒྱུན་པར་མུན་པའི་ཁོང་གསེང་དུ་འཛུལ་ནས། སྣང་བ་ཡི་ལམ་ཕྲན་ཕྱེས་སོང་། 
                    ༤
སྙན་ངག་ནི་མི་ཚེའི་ཁ་ཆེམས་ཡིན། སྙན་ངག་པ་ནི་མི་ཡུལ་གྱི་གླུ་བ་ཡིན། ང་ཚོར་བརྗོད་འདོད་པའི་ཁ་ཆེམས་དང་རྐང་རྗེས་ཀྱི་རི་མོ་མེད་ཚེ་བེམ་པོ་དང་གད་སྙིགས་ལས་གཉིས་སུ་མེད། དེ་བས། བདག་ནམ་ཡང་གཡུལ་ས་ཞིག་གི་འཐབ་མོ་བ་ཡིན།
འགག་སྒོ་རེ་རེ་བརྒྱུད་དུས། ལང་ཚོའི་ཁྲག་ཐིགས་རེ་རེ་མ་ཡུམ་གངས་རིའི་ཟས་རིན་དུ་དམར་མཆོད་བྱེད་ཀྱང་མོས། 
                    ༥
སྙན་ངག་ནི་རལ་གྲི་ཡིན། གླིང་རྗེ་གེ་སར་རྒྱལ་པོའི་ཕག་ཏུ་ཐོགས་པའི་ཁམས་གསུམ་ཟིལ་གྱིས་གནོན་པའི་འོད་ལམ་ལམ་དུ་འཚེར་བའི་རལ་གྲི་དེ་ཡིན། སྙན་ངག་ནི་མེ་ཏོག་ཡིན། སྙིང་རྗེའི་རང་གཟུགས་འཕགས་པ་སྤྱན་རས་གཟིགས་ཀྱི་ཕག་གི་དྲི་མེད་དྭངས་གཙང་གི་པད་དཀར་ཆུན་པོ་དེ་ཡིན།
                    ༦
རྩོམ་མཁན་ནི་རྩོམ་རིག་གི་རྩ་བ་སྐྲུན་མཁན་གྱི་བྱེད་པོ་ཡིན་ལ། སྒྲིག་མཁན་ནི་དེའི་རྩ་ལག་ཇེ་རྒྱས་ཇེ་བརྟན་དུ་གཏོང་མཁན་གྱི་ལས་བཟོ་བ་ཡིན། ཀློག་མཁན་ནི་དེ་གཉིས་ཀྱི་སྒྱུ་རྩལ་འབྲས་བུ་ལོངས་སྤྱོད་བྱེད་མཁན་ལགས། དེའི་ཕྱིར། རྩོམ་རིག་བརྩམས་ཆོས་ནི་ཕུང་བོ་གསུམ་ལྡན་གྱི་བདག་ཉིད་ཅན་དུ་གྲུབ། 
                    ༧
དཔེ་དེབ་ནི་གཡུལ་ས་ཞིག་དང་འགག་སྒོ་ཞིག་ཡིན་ལ། སྒེའུ་ཁུང་ཞིག་དང་བཟོ་གྲྭ་ཞིག་ཀྱང་ཡིན། དེ་ནི་མི་ཡི་སློབ་གསོ་དང་། བླ་སྲོག་དམར་པོ་ལ་དམ་དུ་འབྲེལ་བའི་གསེར་ཟམ་ཞིག་རེད། དེ་བས་་་ ་་་ ་་་ 
                    ༨
འཇིག་རྟེན་འཁོར་བ་ནི་བསླུ་བྲིད་ཀྱི་བཙན་རྫོང་རབ་མེད་ཅིག་སྟེ། བསླུ་བྲིད་ཀྱི་བཙན་རྫོང་དེ་ན་རང་སེམས་ཀྱི་བྱིས་པ་བསླུ་བའི་བཅོས་མའི་ཁ་དོག་འཇའ་ལྟར་འཁྲིགས་ཤིང་ནགས་ལྟར་སྐྱེས། སུན་སྣང་དང་འགལ་འདུའི་ཀློང་ན་འཁོར་བའི་འཇིག་རྟེན་པ་དག མི་ཚེ་གཅིག་གི་བསླུ་བྲིད་ཀྱིས་རང་སྲོག་རང་གིས་གཅོད།
                    ༩
ལང་ཚོའི་མཛེས་རྒྱན་ནི་ཐོས་པ་ཡིན་ལ། ཐོས་པའི་མཛེས་རྒྱན་ནི་ཞི་བ་ཡིན། རྟེན་ཅིང་འབྲེལ་འབྱུང་གི་ཆོས་ཉིད་འདིས་ལང་ཚོའི་རིན་ཐང་གི་ལྕི་ཡང་འཇལ་བཞིན། མི་ཚེའི་ཁ་དོག་ལ་གཟི་མདངས་དང་དཔལ་ཡོན་གྱི་གསོན་ཉམས་སྟེར། །