དྲན་པའི་ལྗོངས་སུ་རུ་སྡེ་ཕྲ་མོ་འཁྲུངས་ན།།
བྱམས་བརྩེའི་ས་བོན་འདེབས་པའི་མ་ལོ་མཐོང་བྱུང་།།
ཙན་དན་ཕྲེང་བ་བགྲང་བའི་མཛངས་མ་དེ་ཡིན།།
ཞུ་འཕྲིན་སེམས་ཀྱི་རེ་སྨོན་ཁ་བའི་ལྗོངས་རེད།།
གནའ་བོའི་གཏམ་རྒྱུད་ཁྱིམ་འདིའི་བཅུད་དུ་གྲུབ་ཀྱང་།།
འདོད་པའི་རླབས་ཕྲེང་ཡིད་འོང་ཁྲོམ་ལ་ཆས་ན།།
གཞོན་པའི་དགའ་སྟོན་སྲིད་པའི་ལོངས་སྤྱོད་ཡིན་ཕྱིར།།
འབྱོར་སྲིད་རིག་ཚན་བཞད་པའི་ང་རྒྱལ་ལོས་སྐྱེས།།
གང་བྱུང་སྨྲ་བརྗོད་ལོ་མས་རི་ལུང་བཀང་ཡང་།།
དོན་གྱི་རྩ་བ་པད་མའི་ཟེའུ་འབྲུ་སྨིན་པས།།
གཅོང་རོང་ལེ་ལོའི་གཤིས་ཀྱི་བཙན་རྫོང་བརྒལ་ནས།།
སྤོབས་པའི་འདེགས་འཇོག་རྒྱལ་ཁམས་འགྲིམ་པར་རེམ་མོ།།
ལང་ཚོའི་གཏེར་མཛོད་སྔོག་པའི་སྒང་བོད་ལྕམ་སྲིང་།།
ནང་གི་མཛའ་བརྩེ་བདེ་བའི་སྙིང་བོར་སྒོམ་སྟེ།།
འཁོར་བའི་རྒྱ་ཁྱོན་འདོད་ཡོན་སྣ་ལྔའི་ཐོབ་སྐལ།།
འཚོལ་གྱིན་གཞོན་པའི་གོམ་སྒྲའི་དཔུང་ཚོགས་སད་རན།།