གལ་ཏེ་ཉག་ཉོག་འགྲོ་འདོད་ན།ཁོ་རང་ད་ལྟ་ནས་ལྷ་ཡུལ་ལ་འཕུར་ཐུབ།
དེ་ནས་ཁོ་རང་ང་ཚོ་དང་མི་འབྲལ་བ་ཅིའི་ཆེད་དུའང་མིན་པ་མིན།
ཁོ་རང་མ་ཡུམ་གྱི་བྲང་གཞུང་དུ་མགོ་བོ་བསྙེས་ནས་མལ་གསོ་བར་དགའ་བ་དང་ཁོ་མོ་སྐར་ཆ་ཙམ་ལ་ཡང་མཐོང་ལམ་ནས་ཤོར་འདོད་མེད་པ་རེད།
ཉག་ཉོག་གིས་རིགས་པ་ཅི་ཡོད་ཀྱི་གྲུང་ཚིག་ཅི་ཡང་འཆད་མོད།འཇིག་རྟེན་འདིར་དེ་ཚོའི་དོན་སྙིང་རྟོགས་མཁན་ནི་ཉུང་ཤོས་ལས་མེད་པ་རེད།
དེ་ནས་ཁོས་ཅི་ཡང་བཤད་འདོད་མེད་པ་ཅིའི་ཆེད་དུའང་མིན་པ་མིན།
ཁོ་རང་ལ་དགོས་པའི་དོན་གཅིག་པོ་དེ་ནི་ཨ་མའི་ཞལ་སྒྲོས་ལས་ཐོན་པའི་སྐད་ཆ་དེ་སྦྱོང་འདོད་པ་རེད།དེ་ནི་ཁོ་རང་ལྟ་ས་ཅི་འདྲའི་བྱིས་ཉམས་ལྡན་པའི་རྐྱེན་ལགས་སོ།།
དོན་དངོས་སུ།ཉག་ཉོག་ལ་གསེར་དང་མུ་ཏོག་གི་ཕུང་པོ་ཞིག་ཡོད་པ་རེད།འོན་ཀྱང་ཁོ་རང་ལྡོམ་པོ་ཞིག་དང་འདྲ་བར་གོ་ལ་འདིར་ཡོང་བ་རེད།
དེ་ནས་ཁོས་རང་ཚུལ་བཅོས་ནས་ཡོང་བ་ཅིའི་ཆེད་དུའང་མིན་པ་མིན།
གཅེས་བྲོ་ཞིང་གཅེར་བུར་གནས་པའི་ལུས་ཕུང་ཆུང་ཆུང་འདིས་གཏན་འཇགས་སུ་འུ་ཐུག་པར་བརྫུས་པས་ད་གཟོད་ཁོས་མ་ཡུམ་གྱི་བརྩེ་བའི་གཅེས་ནོར་དེ་སློང་འོས་པ་རེད།
ཉག་ཉོག་ནི་ཅི་ལྟར་ཟླ་གསར་ཆུང་ཆུང་གི་ཞིང་ཁམས་འདིར་བཀའ་སྡོམ་ཡོད་ཚད་ལས་གྲོལ་ནས་གནས་པ་རེད་ཨང་།དེ་ནས་ཁོས་རང་གི་རང་དབང་བློས་བཏང་བ་ཅིའི་ཆེད་དུའང་མིན་པ་མིན།ཁོས་ཨ་མའི་སྙིང་ཁོང་གི་གྲུ་ཟུར་ཆུང་ཆུང་དེར་རྫོགས་མཐའ་མེད་པའི་སྤྲོ་བ་ཡོད་པ་དང་ཨ་མས་ཁོ་མོའི་གཅེས་སུ་འོས་པའི་རུམ་ནང་འཁྱུད་པའི་བྲོ་བ་མངར་མོ་དེ་རང་དབང་ཐོབ་པ་ལས་ཀྱང་མངར་ཆ་ཆེ་བ་ཤེས་པ་རེད།
ཉག་ཉོག་གིས་ཅི་འདྲ་ངུ་དགོས་པ་དེ་ཡེ་ནས་ཤེས་མེད།
ཁོ་རང་དགའ་བདེས་ཁྱབ་པའི་ཞིང་ཁམས་དེར་གནས་ཤིང་རོལ་བ་རེད།
དེ་ནས་ཁོས་མིག་ཆུ་ཤོར་བའི་འདམ་ང་འདེམས་པ་ཅིའི་ཆེད་དུའང་མིན་པ་མིན།ཁོས་རང་གི་གཅེས་སུ་རུང་པའི་ཁ་ངོར་འཛུམ་དང་བཅས་ཨ་མའི་རེ་འདོད་ཀྱི་སེམས་པ་ཁོའི་ཕྱོགས་སུ་འགུགས་མོད་ཀྱང་།ཁོའི་དོན་ཕྲན་ལས་བྱུང་བའི་དཀའ་ཁག་དག་གི་ངུ་སྒྲ་ཆུང་ཆུང་རྣམས་ཀྱིས་བྱམས་དང་བརྩེ་བ་ཟུང་དུ་སྦྲེལ་བའི་འཆིང་ཐག་དེ་འཐག་པ་རེད།