༡
ཁྱེད་ནི།  ཡུམ་བུ་བླ་མཁར་གྱི་རྩིག་རྡོའི་གསེབ་ནས་རྙེད་པའི།
སྨྲ་བརྗོད་མེད་པའི་གནའ་བོའི་ཅོང་རྙིང་ཞིག་སྟེ།
སྨུག་མདོག་གི་གདོང་ལ་སྲ་མཁྲེགས་ཀྱི་རང་གཤིས་ལྡན།
 
ཁྱེད་ནི།  ཕོ་བྲང་དམར་པོའི་སྒྲུབ་ཁང་ཡང་སྦུག་ཏུ་བཤམས་པའི།
ལོ་ངོ་སྟོང་གི་རྫ་བུམ་སྐྱ་བོ་ཞིག་སྟེ།
མཆོད་ཆུ་བསིལ་ཞིང་དག་གཙང་གི་བཅུད་དང་ལྡན།
 
ཁྱེད་ནི།  ཇོ་མོ་གླང་མའི་འཁྱག་རོམ་གྱི་སྦུབས་སུ་སྐྱེས་པའི།
ཚེར་མདུང་བཀྲ་བའི་མེ་ཏོག་མཚར་བོ་ཞིག་སྟེ།
བྲོ་བ་ཁ་ཞིང་ཚ་གྲང་གི་ནད་ལ་ཕན།
 
ཁྱེད་ནི།  བཙན་པོ་སྲོང་བཙན་གྱི་ཆིབས་རྟའི་བང་གིས་གཞལ་བའི།
དམར་པོ་རིའི་དར་ལྕོག་ཁྲ་བོ་ཞིག་སྟེ།
རྫིག་རྔམ་ཆེ་ལ་ལྷ་ཚོགས་ཀྱི་བྱིན་རླབས་ལྡན།
 
ཁྱེད་ནི། ཐུ་མི་ཨ་ནུའི་ཕྱག་སོར་གྱི་རྩེ་ནས་སྦྲུམ་པའི།
དབྱངས་གསལ་སོ་བཞིའི་གླུ་ཚིག་ཅིག་སྟེ།
ངག་ལ་བདེ་ཞིང་མཚོན་དོན་ཕུན་སུམ་ཚོགས།
        ༢
ལག་ཏུ་བཅངས་དུས། ཁྱེད་ནི་སྤོ་བོའི་ཙན་ཏན་གྱི་ཕྲེང་བར་བརྒྱུས་པའི།
མདོ་འཛིན་གྱི་བྱུ་རུ་དམར་ཆུང་དེ་ཡིན་ལ།
ངའི་འཁྲེང་ཞེན་གྱི་དུངས་པ་འབྲི་བྱེད།
རྩིབས་རུས་ཀྱི་སྨྱུ་གུ་ལེབ་མོ་དེ་ཡིན།
 
བྲང་ཁར་སྦྱོར་དུས། ཁྱེད་ནི་རྨོ་མོའི་ལག་བསྐོར་འཐག་རྡོ་ལས་ཉིལ་བའི།
དྲོད་མ་ཡལ་བའི་ནས་དཀར་རྩམ་པ་དེ་ཡིན་ལ།
ངའི་རྐང་ཆུང་གི་འདེགས་འཇོག་ལེན་སའི།
ཕ་ཁྱིམ་གྱི་གཤིན་ས་ནག་པོ་དེ་ཡིན།
 
ཁ་རུ་མྱོང་དུས། ཁྱེད་ནི་ཨ་མའི་དགོ་དགོ་ཡི་དབྱངས་དང་འགྲོགས་པའི།
ཟེའུ་ཆུང་གི་འབྲི་མར་སེར་པོ་དེ་ཡིན་ལ།
ངའི་བྱིས་སྒྲུང་གི་བློ་སྤོབས་མཚོན་བྱེད།
ཨ་ལ་ཐ་ལའི་འགྱུར་ཁུགས་སྙན་མོ་དེ་ཡིན།
 
ཕྲག་ཏུ་འཁུར་དུས། ཁྱེད་ནི་ཨ་ཕའི་ཇག་རྒྱབ་ཀྱི་ར་མདར་འཁུར་བའི། 
ལུས་སྲུང་གི་མེ་བོའུ་རྭ་རིང་དེ་ཡིན་ལ།
ངའི་བྱིས་དུས་ཀྱི་དཔུར་ངར་སྦྱོང་བྱེད།
ལྕང་ལྕུག་གི་་སྐྱ་ཙེ་ཕྲ་མོ་དེ་ཡིན།
 
རུམ་ལ་བསྡུ་དུས། ཁྱེད་ནི་ཆུང་མའི་བརྩེ་ཞེན་གྱི་མདང་ལས་འཁྱུད་པའི།
འཇམ་མཉེན་གྱི་ལག་སོར་དྲོན་མོ་དེ་ཡིན་ལ།
ངའི་ཚེ་གང་གི་རྨི་ལམ་གཏོང་སའི།
སྦྲ་ནག་ལེབ་མོ་འདིའི་ཆོན་ཐག་དཀར་པོ་དེ་ཡིན།
 
      ༣
ཞོགས་པའི་ལམ་ཁ་རུ། ཁྱེད་ནི་ཐང་ཤིང་གི་ཡལ་གར་བབས་པའི་
བྱེའུ་ཆུང་ཅོ་ཀ་ཞིག་སྟེ།
རྒྱང་བཞུད་ཀྱི་ངལ་དུབ་སེལ་བའི། ཀྱར་ཀྱུར་གྱི་སྨོན་ཚིག་དེ་ཡིན།
 
མཚན་ནུབ་ཀྱི་རི་སུལ་དུ། ཁྱེད་ནི་འགྲུལ་ཁང་གི་སྒེའུ་ཁུང་ལས་འཕྲོས་པའི་
ཞལ་སྒྲོན་དཀར་པོ་ཞིག་སྟེ།
ཡུལ་གྱར་གྱི་དྲན་གདུང་གསོ་བའི། སྦྱིན་བདག་མའི་འཛུམ་མདངས་དེ་ཡིན།
 
ཚ་གདུགས་ཀྱི་ཉིན་གུང་། ཁྱེད་ནི་བྱང་ཐང་གི་མཁའ་རུ་ལྡང་བའི་རླུང་སྤྲིན་
   དལ་མོ་ཞིག་སྟེ།
སྐོམ་གཟིར་གྱི་མགྲིན་ལམ་སྦོང་བྱེད། ཟམ་ཟིམ་གྱི་ཆར་ཆུ་དེ་ཡིན།
 
འཁྱག་གྲང་གི་ཉིན་གུང་། ཁྱེད་ནི་སྦྲ་ཁྱིམ་གྱི་ཐབ་ཏུ་བསྒོངས་པའི་ཨོང་བའི་མེ་
   ཕུང་ཞིག་སྟེ།
དྲོད་སྐྱིད་ཀྱི་རོ་བཅུད་འདུས་པའི། ཞིབ་མངར་གྱི་འོ་ཇ་དེ་ཡིན།
༼ རྩོམ་སྒྲིག་འགན་ཁུར་བ་ཨོ་རྒྱན་དོན་གྲུབ། ༽