སྟག་ཤར་གཞོན་ནུའི་སྙིང་གི་དཀྱིལ་ན་འཇིགས་མེད་སྲོག་གི་རྟེན་ཕུར་ཞིག།
སྨན་ཤར་བུ་མོའི་འཛུམ་མའི་གདོང་ནས་འགྱུར་མེད་དུང་བའི་བརྩེ་སེམས་ཤིག།
ན་ཆུང་གཞོན་ནུའི་ལས་དབང་བར་ན་རྟག་བརྟན་བདུན་ལམ་གསལ་མོ་ཞིག།
རྒྱང་ནས་རྒྱང་ལ་ཤུགས་ཀྱིས་འཐེན་པ་ཡ་ཆུང་སེམས་ནས་མ་བོར་ཅིག།
དྲིན་ཆེན་ཕ་ལོས་བརྩེ་བས་གཉོར་ཞིང་བྱམས་ལྡན་ཨ་མས་དྲིན་གྱིས་བསྐྱངས།།
ཉམས་མེད་སྙིང་སྟོབས་གོ་རུ་བསྒོས་ནས་རིག་པའི་ལྡིང་ཁང་འགྲིམ་དུ་མངགས།
ན་གཞོན་བློ་གསར་གོ་ཤེས་བསམ་ཡོད་མེས་རྒྱལ་འདི་ཡི་བདག་པོ་སྟེ།།
ལང་ཚོའི་དཔལ་ཡོན་རབ་ཏུ་དར་བའི་གཞོན་སྐྱེས་འབྲོང་ཆུང་དར་མའི་འཚོགས།
ཕ་དང་མེས་པོའི་ལོ་རྒྱུས་དག་ལ་ཕྱིར་མིག་ཡང་ཡང་འཕེན་ཞོར་དུ།
མི་ཡི་མི་ཚེ་དོན་དང་ལྡན་ཕྱིར་རང་གི་ངོ་བོ་མ་བོར་བར།
འབྱུང་འགྱུར་ལས་ཀྱི་ཐབས་བཀོད་མ་ལུས་བརྗེད་མེད་སྙིང་ལ་རི་མོ་ཕྲིས།
ལྔ་བཞིའི་དུས་སྟོན་སུ་ལ་མི་དབང་ཁྱོད་དང་ང་ཡི་ལས་དབང་ཡིན།།
བཞི་བཞིའི་ན་ཚོད་ལས་ཀྱིས་བཞད་པ་ཁྱོད་དང་ཡི་བསོད་ནམས་ཡིན།
སེམས་དང་བསམ་པའི་མཐུ་དང་ལྡན་པ་ཁ་རྩང་དེ་རིང་འདི་ཙམ་ཡིན།
ཅོལ་ཆུང་བྱབ་ཆུང་ལས་ལ་མ་འཇུག་བག་ཡོད་གཡུ་ཡི་རལ་བ་སིགས།།
རང་གི་འགན་འཁྲི་རང་ལ་ཡོད་པ་སྤྱི་མཐུན་ལས་ཀྱི་བསྐོས་ཐང་རེད།
རང་ཙམ་མ་ཡིན་གཞན་ལ་སེམས་པ་གོ་ཤེས་བསམ་ཡོད་ཡ་རབས་ཡིན།།
རང་གི་ཆེད་དུ་དུས་རྣམ་ཀུན་ཏུ་དོན་ཉུང་བྱ་བ་ཉུང་ཉུང་དགོས།
རང་མིན་གཞན་ལ་ལྷག་བསམ་ཆེན་པོས་དོན་ཆེན་ལྷུར་གྱིས་ལེན་པ་གལ།།
དེ་རིང་ལས་དང་རྟེན་འབྲེལ་ཙམ་གྱིས་གཞོན་ནུའི་དུས་ཆེན་ཡིད་འོང་འདིས།།
བྱིས་བློའི་བསམ་པ་ཡོངས་སུ་བྲལ་བའི་ན་གཞོན་བློ་ལྡན་ཁྱུ་དང་ཁྱུ།།
དཔའ་དང་སྤོབས་པས་གྱེན་ལ་བརྩེངས་ཤིང་འགྲིག་མདུན་སེམས་ཀྱི་རྡོ་རིང་ཞིག།
མིག་གི་མདུན་དུ་ཁད་ཀྱིས་བཞེངས་པས་ཕྱོགས་རྣམས་ཀུན་ལས་རྒྱལ་གྱུར་ཅིག།