ཕ་ཡུལ་ན། ཁ་བ་འབབ་ཀྱིན་འདུག

དཀར་དམར། 2012-03-23

ཕ་ཡུལ་ན ཁ་བ་འབབ་ཀྱིན་འདུག

ན་ཆུང་མའི་སེམས་ངལ་ཇི་བཞིན

ངའི་གདུང་སེམས་ལ་ཡང་ཡང་བསྣུན

མགོ་ལོག་ལ་ཁ་བ་བབས་ནས

མིའི་རིགས་ཁོ་ན་ལས་ལྷག་མེད་པའི་གསར་འགྱུར་དེ

ཕ་ཡུལ་ལ་མཚོན་ན་མ་འོངས་ལུང་བསྟན་རེད

རྒྱུན་ཆད་མེད་པའི་ཁ་བའི་འབབ་རྒྱུན་དེས

ཕ་ཡུལ་ལ་བཙན་གཡབ་ཐེངས་གཅིག་བྱས་ཤིང

ཕ་ཡུལ་གཙང་དག་ལན་གཅིག་བྱས་པས

ཕ་ཡུལ་གྱི་རི་ལུང་ཀུན་དལ་ཅག་གེར

སུ་ཞིག་ལ་ངོ་གནོང་བ་བཞིན

ངོ་གདོང་རུམ་ལ་སྦས་ནས་ག་ཙམ་འགོར

ཟོག་ལྷག་ཁོ་ན་ལས་ནག་ཐིག་མེད་པའི་འཇིག་རྟེན་འདི

ཁ་བ་དང་གྲང་ངར་གྱི་རྩུབ་བརྡར་ལས་བྱུང་བའི་སྒྲ་དེ་ཡིན

ཆུ་མིག་དང་ནམ་ཟླ་འཐབ་པའི་ཆབ་རོམ་དེ་ཡིན

རྫི་བོ་དོན་འགྲུབ་ཀྱིས་ཀྱང

ཕ་ཡུལ་གྱི་རི་ལུང་ལ་ཅེར་ནས

ཧ་ཅང་ཡིད་ཐང་ཆད་ནས་འདི་ལྟར་བཤད

ལན་ཆགས་འདི་ཚོ སྟོན་ཁ་སླེབས་རྗེས

གཅིག་ཀྱང་མ་བསྐྱུར་བར་ཤན་པར་བཙོང་ནས

གྲོང་ཁྱེར་ནས་ཁང་བ་ཞིག་ཉོས་རྗེས

ད་ནི་ངལ་གསོ་རྒྱུ་ཟེར

ང་རང་ཆུང་དུས་སུ

ཕ་ཡུལ་ལ་ཁ་བ་བབས་རྗེས

ཕྱུགས་ཟོག་དག་དེད་ནས་ནགས་ཚལ་སྟུག་པོར་ཆས

རྫི་བོ་ཚོས་ཆ་མ་བཏུས་ནས་མེ་སྒོང་བརྒྱབ

དམར་རྒྱུན་གྱི་ལག་པ་ཟུང དམར་རྒྱུན་གྱི་རྐང་པ་ཟུང

རེ་རེ་བཞིན་མེ་ལ་ལྡེས་པའི་སྤྲོ་སྐྱིད་དེ

ད་ལྟའི་བདེ་སྐྱིད་ལས་རིང་དུ་བརྒལ་འདུག

དེ་དུས་ཕྱུགས་ཟོག་དག་གིས་ཀྱང་སྣ་བས་སྣོམ་སྣོམ་བྱེད་ཞོར

ཅི་ཞིག་སློང་མོ་བྱེད་པ་དེ་ནི

མིའི་རིགས་ལ་སེམས་པ་གླན་ཚུལ་ཞིག

བདག་པོ་ལ་དུངས་པ་བྱེད་སྟངས་ཞིག

རི་ལུང་སོ་སོ་ནས་དུ་བ་བན་བུན་ངང་ནམ་མཁར་ལྡིང་དུས

ཕྱུགས་ཟོག་གི་སེམས་པ་ཧ་ཅང་དྲོ

མིའི་རིགས་ཀྱི་སེམས་པའང་ཧ་ཅང་དྲོ

དེ་ནི་ཚེ་སྲོག་གིས་ཚེ་སྲོག་ལ་གནས་ལུགས་འཆད་སྟངས་ཤིག

དེ་ནི་ཚེ་སྲོག་གིས་ཚེ་སྲོག་ལ་ཚེ་སྲོག་ཏུ་ལྟ་སྟངས་ཤིག

ད་ལྟ་རྫི་བོ་ཚོས་འཁང་ར་རེ་བྱས་རྗེས

ཕྱིར་ཁྱིམ་ལ་འཛུལ་ནས་སྡུག་སྨྲེ་འདོན་མགོ་བརྩམ

སྐབས་འདིར་དཀར་བོང་བོང་གི་འཇིག་རྟེན་འདིར

ཕྱུགས་ཟིག་དག ནག་ཉེས་འབའ་ཞིག་ཏུ་གྲུབ་པའི་ནག་ཐིག་དེ་ཡིན

ད་ལྟ་ཕ་ཡུལ་ན་ཁ་བ་འབབ་ཀྱིན་འདུག

ད་ལྟ་ཕ་ཡུལ་ན་སྡུག་སྨྲེ་འདོན་གྱིན་འདུག

ད་ལྟ་ཕ་ཡུལ་ན་གྲོང་ཁྱེར་དྲན་གྱིན་འདུག

འཚོ་བ་ནི་རང་བཞིན་གྱིས་གྲུབ་པར་འདོད་པ་དེས

གྲོང་ཁྱེར་ནི་ངལ་གསོ་བྱེད་ས་ཁོ་ན་ཡིན་པར་འདོད

ཕ་ཡུལ་གྱི་རུམ་ཁོང་ཧ་ཅང་འཁྱགས

དྲོད་ཚད་གོར་ཐིག་མན་གྱི་ཏུའུ་༣༠རུ་སླེབས་འདུག

བྲག་ཅར་འཁོར་བའི་རྫི་གླུ་མི་འདུག

སེམས་པ་དྲོ་བའི་མེ་ལྕེ་མི་འདུག

ཕ་ཡུལ་ལ་ཕ་ཡུལ་གྱི་ཚོར་བ་མི་འདུག

ནམ་མཁའི་སྐར་མ་གྲང་ངར་གྱིས་འདར

ཤར་རིའི་ཟླ་བ་གདུང་སེམས་ཀྱིས་སྒུལ

བདག་གི་སྐྱོ་སྣང་དང་གདུང་སེམས་འཐབ་ནས

བདག་གི་བསམ་གཞིགས་དང་སེམས་ངལ་འདྲེས་ནས

སྒེའུ་ཁུང་ཕྱི་རོལ་ལ་སེམས་ཆུང་གིས་ཉན

སྐྱ་རེངས་གསལ་རྗེས

ཕ་ཡུལ་ན་ཅི་ཡང་མི་འདུག

རྫི་བོ་དོན་འགྲུབ་ཀྱིས་འཆར་གཞི་དེའང

སྟོན་ཁ་མ་ཡིན་པར་ད་ལྟའམ་དགུན་ཁ་ཡིན་འདུག

ཁ་བ་གོས་སུ་བཀླུབས་པའི་ཕྱུགས་ཟོག་དག

ན་ཟུག་ཁོག་ཏུ་སྦས་ནས རྭ་ཅོ་ཁོ་ནས་ཨ་སྔོན་འདེགས་ཀྱིན

ཁུ་སིམ་སིམ་ངང་འཁང་ར་དང་སྡང་སེམས་མེད་པར

དབུགས་ཀྱི་རྒྱུ་བ་འགག་འདུག

མིག་གི་རྫི་མ་བཙུམས་འདུག

ད་ལྟ་རྫི་བོ་དོན་འགྲུབ་ལ་མཚོན་ན

པགས་པ་མང་པོ་བརྩེག་ནས་པགས་ཚོང་རྒྱག་རྒྱུ་དང

ཡང་ན གྲོང་ཁྱེར་ལ་སོང་ནས་ངལ་གསོ་རྒྱུ་དེ་རེད

༢༠༡༢ ༡ ༢༠ ཉིན།

ཕ་ཡུལ་ན། ཁ་བ་འབབ་ཀྱིན་འདུག

དོ་སྣང་ཆེ་བའི་རྩོམ།

རྩོམ་གསར། 10

དོ་སྣང་ཆེ་བའི་རྩོམ། 10