གྲང་རླུང་གིས་མནར་བའི་མཚན་མོ།
ཆུ་བོའི་རླབས་སྒྲ་དང་ལྷགས་རླུང་གི་ཤུར་སྒྲ་ལས།
ཅི་ཡང་མེད་པའི་དབེན་འཇགས་ཀྱི་མཚན་མོ་འདི་ལ།
ཟླ་བ་དང་སྐར་ཚོགས་ཀྱིས་སྤྲིན་གྱི་བང་རིམ་བརྒྱུད་ནས།
ལྷིང་འཇགས་ཀྱི་ཡུལ་གྲུ་འདིར་བཞིན་རས་ཀྱི་
འཛུམས་མདངས་མངོན་བྱུང་།
ངས་ཁེར་རྐྱང་གི་ན་ཟུག་ལྕི་མོ་རྡོག་པས་གནོན་བཞིན།
ལག་པས་མགོ་བོ་བསྐྱོར་དུས་སྐྱོ་ལྷང་ལྷང་གི་འཚོ་བ་ཞིག་གམ།
གྲང་ཤུར་ཤུར་གྱི་མྱ་ངན་ཞིག་འཁོར་འོང་།
དེ་དུས།  ང་རང་མི་ཡུལ་ན་ཁེར་རྐྱང་ཁོ་ན་ཡིན་པར་འདོད།
དེ་དུས།  ངས་སྐྱོ་བ་སྙན་ངག་རུ་བྲིས།
དེ་དུས།  ངས་ཨ་རག་སྐྱུར་མོ་འཐུང་།
ན་ཟུག་སྟོང་ཕྲག་གི་འཁུན་སྒྲའི་ཁྲོད་ན།
ཡུལ་གྲུ་འདི་ཅི་འདྲའི་གྲང་འཁྱག་གི་གཡང་ས་དོག་མོ་ཞིག
སྒྲོན་མེ་དང་འདྲ་བའི་འོད་སྣང་རེ་རེས།
གོ་ལ་ཟླུམ་པོ་ཞིག་གསལ་ལྷང་ངེར་བཏང་ཡང་།
མཐོ་སྒང་གི་ཡུལ་ཁམས་སྨུག་པོ།
ད་དུང་སྨག་ནག་གི་མཚན་མོ་སྒོམ་ནས་གཉིད་ལ་ཡུར་ཟིན།
ནོར་ལུག་གིས་ནོར་ལུག་འཚོ་བའི་གཏམ་རྒྱུད་རོགས་ནས།
ཉི་ཟླ་སྐར་གསུམ་གྱི་འོད་གོར་ཡང་རྒྱང་རིང་ལ་འགྱེད་སོང་།
དེ་ལྟར་ངས་ཁེར་རྐྱང་གི་བསམ་གཞིག་གཏོང་བཞིན།
འདས་ཟིན་པའི་ལོ་རྒྱུས་མང་པོ་ཞིག་གམ།
དྲན་པ་མང་པོ་ཞིག་བྲང་གཞུང་ན་འཕྱོ།
དེ་ལྟར་ངའི་སེམས་པ་སྟོན་མཇུག་གི་སྡོང་ལོ་བཞིན།
ཕྱོགས་བཞི་མཚམས་བརྒྱད་ལ་འཕུར་གྱིན་འདུག