རི་གསུམ་རིགས་གསུམ་མགོན་པོ་འདུས་པའི་མདོ།།
     ནགས་དང་ལྗོན་ཤིང་ཚང་ཚིང་སྐོར་བའི་དབུས།།
     རིག་གནས་སྣ་མང་འདྲེས་པའི་འདུས་མདོ་ནས།།
     མི་གཤིས་མི་འདྲ་སྣ་ཚོགས་བྱུང་བ་དང་།།
     དར་སྣ་ལྔ་ཡི་རྩེ་མོ་ཕུལ་བྱུང་གིས།།
     ཚོང་འདྲེན་མི་འདྲ་སྣ་ཚོགས་བྱེད་པའི་མདོ།།
     མཛའ་བརྩེའི་འདུན་མ་མེ་ཏོག་སྣ་ཚོགས་པ།།
     ཡོངས་སུ་འདུས་པའི་མདོ་གྲོང་གླིང་ག་ན།།
     རྒྱ་ཡུལ་ལྟག་སྒོ་མི་ཉག་ལྟག་སྒོ་དང་།།
     གཡག་རྭ་ལྟག་སྒོ་ལྟག་སྒོ་གསུམ་གྱི་དཀྱིལ།།
     གནའ་གྲོང་དེ་ནས་འཁོར་ལོ་ལ་བརྟེན་ནས།།
     མྱུར་དུ་བགྲོད་རུང་སྣང་བ་ལྡོག་མེད་ཀྱི།།
     ལམ་གྱི་འཆར་སྒོ་འབྲི་ལ་དགའ་ཞེན་གྱི།།
     བརྩེ་སེམས་དྲི་མེད་ཁ་བཏགས་བླ་རུ་བྲེས།།
     ཀྱག་ཀྱོག་འབྲུག་རིས་དང་མཚུངས་རྒྱུ་ལ་ལའི།།
     གཞུང་ལམ་གཡས་གཡོན་དག་གི་ཁང་ཆུང་སྒོར།།
     རླངས་འཁོར་ཆེ་ཆུང་མང་པོར་ཁྲུས་གསོལ་དང་།།
     སྐོམ་པར་སེལ་བའི་བཏུང་ཆུ་བླུད་པ་མཐོང་།།
     སྐབས་དང་སྐབས་སུ་རི་ངོས་འབབ་ཆུ་དག།
     རླབས་ཀྱི་ཟེའུ་མཁའ་ལ་འཐོར་བཞིན་དུ།།
     ལྷུང་ལྷུང་སྙན་པའི་སྒྲ་བཅས་འཁྱོག་འགྲོས་འདི།།
     གཞོན་ནུ་མ་ཡི་གླུ་ལེན་གར་སྟབས་འདྲ།།
     རྫ་ཆུ་བསིལ་མ་རྫ་རྡོའི་ངོས་ནས་འཕྱུར།།
     རྫ་རྡོའི་ཁ་དོག་མི་ནག་ཕོ་རྒོད་ཅིག།
     སོ་ནམ་བྱེད་པས་དཀའ་བའི་རྔུལ་ཆུ་ཡི།།
     ཐིགས་ཕྲེང་ཤ་རྒོད་ངོས་ནས་ཟག་པ་འདྲ།།
     མེ་ཏོག་ཕོན་པོ་འགའ་ཞིག་ཆུ་ངོག་ཏུ།།
     རློན་གཤེར་ཆབ་ཀྱིས་མགོ་བོ་གནོན་པ་འདི།།
     སྐྲ་ཡི་ལན་བུ་གདོང་ལ་འཐོར་བ་ཡི།།
     གཤིས་བཟང་མཛེས་མ་ནད་ཀྱིས་མནར་བ་འདྲ།།
     གཞུང་ལམ་གཡས་གཡོན་འབྲོག་གི་རུ་སྡེ་ན།།
     འབྲོག་པའི་བུ་མོ་སྣང་བ་སྤྲོ་བཞིན་དུ།།
     གླུ་ཆུང་ལེན་ཞིང་འོ་མ་འཇོ་བ་ལ།།
     ཡུལ་སྐོར་པ་ཡི་ལྟད་མོར་ལྷག་ཏུ་མཚར།།
     ཡུལ་སྐོར་འགྲིམ་འགྲུལ་མང་པོས་རྒྱུ་ལ་ལར།།
     འཛེགས་པར་མཐོང་བའི་རི་ཡི་རྩེ་མོ་རྣམས།།
     སྐྲག་ནས་སྨུག་སྤྲིན་དར་གྱི་ཡོལ་བའི་ཕག།
     གབ་ནས་ལྟད་མོ་ལྟ་བ་བཞིན་དུ་བདོག།
     རྒྱུ་ལ་ལ་རྩེར་དར་གྱི་རླུང་རྟ་རྣམས།།
     རླུང་གིས་གཡོ་འདི་གཞོན་ནུ་ཕོ་མོ་ཚོགས།།
     ཕྲེང་བར་བསྒྲིགས་ནས་འགྲུལ་འགྲིམ་ཚོགས་པ་ལ།།
     དགའ་བསུ་ཞུ་བའི་ཐལ་སྒྲ་བརྡེབ་པ་འདྲ།།
     ད་དུང་ལ་རྩེ་སྤྲིན་གྱི་ཡོལ་བ་ནས།།
     གྲུ་ཆར་ཟ་ཟི་འབྱོར་འདི་རྒྱ་ནག་སོགས།།
     ཚ་བས་གདུང་བའི་ཡུལ་སྐོར་པ་དག་ལ།།
     རློན་གཤེར་ཆར་གྱིས་བསིལ་རེག་བྱིན་པ་འདྲ།།
     རི་བོ་བརྒལ་ནས་ལ་མོ་ཕར་རྒྱབ་ཀྱི།།
     གཞུང་ལམ་སྦྲུལ་ནག་ཐུར་དུ་རྒྱུགས་འདྲ་ཡི།།
     གཡས་གཡོན་རྣམས་ཀྱི་སྤང་ལྗོངས་ནེའུ་གསིང་རྣམས།།
     བཞིན་རས་ཆར་གྱིས་གཙང་མར་ཁྲུས་བྱས་ཏེ།།
     བསིལ་རླུང་གིས་གཡོ་ལྡེམ་ལྡེམ་བྱེད་པ་འདི།།
     ལྷ་ཡི་བུ་མོས་ཟློས་གར་འཁྲབ་པ་འདྲ།།
     རྩི་ཤིང་སྣ་མང་ཕན་ཚུན་སྦྲེལ་བ་དག།
     བརྩེ་བ་ཅན་གྱི་ཕོ་མོའི་འཐམ་འཁྱུད་བཞིན།།
     བརྙན་ཕབ་བདག་པོའི་ཞིང་ཁམས་ཞེས་གྲགས་པའི།།
     གྲོང་དང་གྲོང་གི་བཀོད་པ་འདི་ལྟར་ཏེ།།
     གཤིན་པོའི་ཞིང་གི་འབྲུ་དྲུག་སྙེ་མ་དང་།།
     སྲན་ནས་གྲོ་ཡི་ལྗང་བུ་སྔོ་ལྡེམ་ལྡེམ།།
     ས་ཡི་ཁྱོན་ལ་ཚོམ་བུ་བཀོད་འདྲའི་མཐར།།
     ལྗང་མ་དང་ནི་ལྗོན་ཤིང་རྒྱན་པའི་མཚམས།།
     སྤང་ལྗང་ནེའུ་གསིང་ཐང་དང་དེའུ་འབུར་ཐོག།
     ཁང་བཟང་ཁ་ཁེབས་རེ་ཡི་ཐོག་ཁ་ནས།།
     དུ་བ་དུམ་བུ་སྤྲིན་དང་འདྲེས་པར་མཐོང་།།
     ཁང་སྒོ་གཡས་གཡོན་དག་ན་རྟ་དང་ཟོག།
     རེ་རེ་གཉིས་གཉིས་གཟན་ལ་གཡེངས་པ་དང་།།
     སྒོ་ཆེན་ཁ་ན་རྒན་པོ་རེ་ཟུང་ཞིག།
     མི་དང་རྒྱུ་འགྲུལ་དབེན་པའི་འཇམ་ལྷང་ངེར།།
     ཉི་མའི་ཟེར་ལ་འདོན་བཞིན་གཤིས་བཟང་གིས།།
     དབྱར་ཉིན་རིང་པོ་ཕྲེང་རྡོག་ལ་བསྐྱེལ་ནས།།
     འབུ་སྦྲང་བྱ་བྱེའུ་སྐད་དང་བསྲེས་ནས་ནི།།
     གཉིད་དང་འདྲེས་པའི་མ་ཎི་བགྲང་བྱས་ཏེ།།
     དུས་དང་དུས་སུ་བླ་མ་དྲན་པ་དང་།།
     གསོལ་འདེབས་མོས་གུས་དྲག་པོ་བྱེད་པར་མཐོང་།།
     གྲོང་དཀྱིལ་གྲོང་ཟུར་དག་གི་དུང་འཁོར་ནང་།།
     རྒན་པ་ཕོ་མོའི་འཁོར་ལོ་སྐོར་བ་ལ།།
     བྱིས་པ་རྒྱུག་རྩེད་འགྲན་བཞིན་བྲེལ་བར་སྣང་།།
     སྐབས་དང་སྐབས་སུ་ལྗོན་ཤིང་བསིལ་གྲིབ་འོག།
     རྒན་གཞོན་ཕོ་མོ་སོས་དལ་བག་ཕེབ་ངང་།།
     གཏམ་ཚོགས་སྙན་དབང་བདུད་རྩི་སྤྲོ་བར་སྣང་།།
     དལ་འབབ་ཆུ་བོའི་འགྲམ་གྱི་སྤང་ལྗང་ངོས།།
     སྣང་བ་སྤྲོ་བའི་གཞོན་ནུ་མ་དག་གིས།།
     གྱོན་གོས་སྣ་ཚོགས་བཀྲུས་ནས་སྤང་ལྗོངས་ངོས།།
     ཉི་ཟེར་ལ་བསྟན་གླུ་ཆུང་ལེན་པ་དང་།།
     སྐྲ་ཡི་ལན་བུ་བསིལ་རླུང་གིས་གཡོ་ནས།།
     དཀར་གསལ་ཟླ་བའི་ཞལ་རས་འཛུམ་མུ་མུ།།
     དར་ལ་བབ་པའི་ལང་ཚོ་ངོམ་བཞིན་དུ།།
     འཁྱོག་འགྲོས་རྐང་རྗེན་ཚུལ་དུ་རྒྱུ་བར་སྣང་།།
     མི་ཡི་དཔལ་ལ་ཕྲག་དོག་བྱེད་པ་ཡི།།
     ཉི་མའི་དཀྱིལ་འཁོར་གྱིས་ཀྱང་སྤྲིན་ནག་དག།
     དུམ་བུ་དུམ་བུ་བཏང་བའི་གྲིབ་སོ་ཡིས།།
     རི་ཐང་ངོས་རེ་སྒྲིབ་རུང་ཇེ་མཛེས་གྱུར།།
     སྔ་བསམ་ཕྱི་འདང་མི་དགོས་བྱིས་པ་འགའ།།
     ཆུ་དང་འཇིམ་སྦག་གདོང་ལ་འགོས་བཞིན་དུ།།
     རྣམ་རྟོག་རྙོག་པའི་དྲི་མ་དབེན་བཞིན་དུ།།
     སེམས་ཀྱི་བདེ་སྐྱིད་དག་ཞིང་ལ་འགྲན་ཏེ།།
     བེའུ་འགའ་དང་ལྷན་ཅིག་འགྲོགས་བྱས་ནས།།
     འཕག་འཚག་རྣམ་པ་ཅི་ཡང་བྱེད་པ་མཐོང་།།
     དེ་འདྲའི་གནས་མཆོག་དེ་ཡི་བཀོད་པ་ནི།།
     མིག་ལ་མཛེས་ཤིང་ཡིད་དུ་འོང་པ་སྟེ།།
     འཇིག་རྟེན་བྱེད་པོས་ཆེད་དུ་བཟོས་བྱས་ཏེ།།
     ཞིང་མཆོག་དམ་པ་གནས་འདིར་བཞག་པ་འདྲ།།
     གྲོང་དེ་བརྒལ་ནས་རི་གདོང་ཕར་ཕྱོགས་སུ།།
     ནགས་ཀྱི་ལྗོན་པས་མཛེས་པའི་ལུང་པ་ལས།།
     རི་གཟར་ཐུར་ལ་རྒྱུག་པའི་གཙང་ཆུ་ཡི།།
     རླབས་ཀྱི་ཟེར་མ་མཁའ་ལ་འཐོར་བཞིན་དུ།།
     འགྲུལ་འགྲིམ་དག་ལ་འཇིགས་སྐུལ་བྱེད་འདྲ་འདི།།
     ཕོ་རྒོད་ཅིག་གིས་རྟ་རྒོད་ཐུར་རྒྱུག་འདྲ།།
     སྐབས་དང་སྐབས་སུ་འཕྲུལ་རྟ་ལ་ཞོན་པའི།།
     ར་ལུ་བ་ཡི་འབྲོག་པ་ཕོ་གསར་ཚོས།།
     སྐད་སྒྲོམ་མདུན་རྒྱབ་བཞག་ནས་སྙན་པའི་གླུ།།
     སྣ་ཚོགས་བཏང་སྟེ་བྱ་འཕུར་བཞིན་དུ་རྒྱུག།
     གཞུང་ལམ་ཟུར་གྱི་ལམ་ཕྲན་སྐྱ་བོ་རུ།།
     ཕོ་གསར་འགའ་ཡིས་གཏོང་བའི་འདྲུད་འཐེན་གྱིས།།
     ཁུར་པོ་ལྗིད་མོ་མ་ཆོག་སྐད་ངན་གྱི།།
     སྡར་སྐད་ཤོར་བཞིན་དལ་གྱིས་རྒྱུ་བ་མཐོང་།།
     ལུང་པ་དེ་ཡི་ལ་ལ་འཛེགས་པའི་མཇུག།
     ཡངས་པའི་ཐང་གི་འཀྱིལ་འཁོར་མཐོང་བ་ན།།
     དབུས་ཀྱི་ཇོ་བོ་དང་ནི་ཁྱད་མེད་པའི།།
     དཔལ་གྱི་ལྷ་སྒང་ཇོ་བོའི་གདན་སར་སླེབས།།
     དེ་ཡི་ཟུར་གྱི་ལྷ་སྒང་རྩྭ་ཐང་སྟེང་།།
     དཀར་པོའི་གུར་ནང་ཟ་མ་སྣ་མང་སྟེ།
     ཤ་མར་ཐུད་དང་ཞོ་འོ་ལ་སོགས་པ།།
     འདོད་རྒུ་ལོངས་སུ་སྤྱོད་པས་སྣང་བ་སྐྱིད།།
     དེ་ཡི་ཡར་སྔོན་མཐའ་ཡས་རྩྭ་ཐང་དཀྱིལ།།
     གསེར་གྱི་མཆོད་རྟེན་གཙུག་ལག་ཁང་ཆེན་ཞིག།
     ཕྱི་ནས་འཁོར་ཕྲན་བརྒྱ་ཕྲག་སྐོར་བའི་ནང་།།
     སྐུ་གསུང་ཐུགས་རྟེན་རི་ལྟར་སྤུངས་པ་ལ།།
     སྐོར་བར་བྱས་པའི་སྤྲོ་སྣང་བསམ་མི་ཁྱབ།།
     ཇི་སྲིད་ཚེ་ཡི་འཕེན་པ་མ་རྫོགས་པ།།
     ཆོས་ཉིད་རང་བྱུང་རྒྱལ་མོའི་བཀའ་ལུང་ལྟར།།
     གཞུང་ལམ་གོམ་པས་འཇལ་བའི་གྲངས་བཞིན་དུ།།
     རྣམ་རྟོག་རླབས་ཀྱི་ཟེར་མ་མཁའ་ལ་འཐོར།།
     འོན་ཀྱང་རྣམ་རྟོག་གྲངས་བཞིན་སྣག་ལམ་གྱི།།
     མགྲིན་པའི་ལམ་ནས་རྒྱུ་བ་དོགས་ན་ཡང་།།
     དར་རྩེ་མདོ་ནས་དཔལ་གྱི་ལྷ་སྒང་བར།།
     རི་ཆུ་བུ་མོར་དུས་ཀྱིས་མཛེས་རྒྱན་བྱས།།
     སྣང་བ་སྣ་ཚོགས་འཇའ་རིས་བཀྲ་བ་ཡི།།
     དབྱར་གྱི་དུས་སྟོན་ཆང་གིས་མྱོས་པའི་མཐུས།།
     གང་ཤར་འབྲི་འདོད་མ་འགག་ཤུགས་ཀྱིས་ཤོར།།