ཞིང་ཆེན་བོད་ཡིག་སློབ་གྲྭ་བཙུགས་ནས་ལོ་ངོ་སུམ་ཅུ་འཁོར་བའི་རྟེན་འབྲེལ་དུ།
གླུ་ཨ་ལ་ཐ་ལ་ཐ་ལ་ལེན༎
ཨ་ལ་གླུ་ཡི་ལེན་ལུགས་རེད༎
གངས་ཅན་དག་པའི་ཞིང་ཁམས་ནས༎
འཕགས་མཆོག་སྤྱན་རས་གཟིགས་དབང་གི།
རྣམ་སྤྲུལ་ཆོས་རྒྱལ་སྲོང་བཙན་དང་༎
འཇམ་དཔལ་ཡེ་ཤེས་སེམས་དཔའ་དངོས༎
སློབ་དཔོན་ཐོན་མི་གཙོ་འཁོར་བཅས༎
སྙིང་ནས་གསོལ་འདེབས་ཐུགས་རྗེས་ཟུངས༎
ལྷག་པར་ལྔ་རིག་སློབ་གྲྭ་འདིར༎
ཐུགས་ཁུར་ལེགས་མཛད་པཎ་ཆེན་དང་༎
གཟན་དཀར་བཀྲ་ཤིས་ཚེ་རིང་སོགས༎
ཏང་དང་ཏང་མིན་སྐྱེས་ཆེན་ཚོའི༎
བཀའ་དྲིན་དྲན་པས་སྙིང་ནས་འདུད༎
ཕྱོགས་བཞིར་བཞུགས་པའི་བཤེས་གཉེན་ཚོས༎
དེ་རིང་སློབ་བུའི་གླུ་སྣ་དྲོངས༎
ས་འདིའི་ས་ངོ་མ་ཤེས་ན༎
དར་མདོ་གཡང་རྭ་སུམ་མདོ་ཡི༎
ཞིང་ཆེན་བོད་ཡིག་སློབ་གྲྭ་སྟེ༎
གངས་ལྗོངས་རིག་པའི་འབྱུང་གནས་དང་༎
སྐད་དང་ཡི་གེའི་ཕ་གཞིས་ཡིན།
ང་འདྲ་ང་ངོ་མ་ཤེས་ན༎
གླིང་རྗེ་གེ་སར་རྒྱལ་པོ་ཡི༎
འདོ་ཆེན་རྐྱང་ལིའི་ཕ་ས་སྟེ༎
གདོང་ཆེན་ཉ་ཉའི་གཡས་ཟུར་གྱི༎
གཞི་སྲས་དཔའ་བུ་ཚང་གི་བུ༎
དཔའ་བུ་བསོད་ནམས་སྟོབས་རྒྱལ་ཟེར༎
སྔོན་མར་སློབ་གྲྭའི་སློབ་མ་ཡིན༎
ད་ལྟར་སློབ་གྲྭའི་དགེ་རྒན་དང་༎
སློབ་མ་ཁང་གི་འགོ་འཛིན་ཡིན༎
འགོ་འཛིན་གཞན་གྱི་ལག་རོགས་སུ༎
སློབ་མའི་ཚོགས་ལ་སྤྱོད་ཡོན་སོགས༎
མ་ནོར་ལམ་སྟོན་བྱེད་མིར་བསྐོས༎
འོན་ཀྱང་རང་ནུས་ཚད་ཡོད་འདིས༎
ཚད་མེད་ལས་ལ་མི་འདང་མང་༎
དེ་རིང་བཀྲ་ཤིས་ཉི་མ་འདིར༎
ཡིན་ལུགས་གཏམ་དེ་ཨེ་འདྲ་ཡོད༎
གངས་ལྗོངས་ཤེས་རིག་དཔག་བསམ་ལྗོན༎
འཛམ་གླིང་སྐྱེ་དགུའི་དཔལ་དུ་འཁྲུངས༎
བཅུ་ཕྲག་རིག་པའི་བདུད་རྩི་ཡིས༎
ཆོལ་གསུམ་བོད་མིའི་སྲོག་རྩ་འཛིན༎
སྐབས་ཤིག་བདུད་བཞིའི་གཡོ་ཐབས་ལས༎
བྱུང་བའི་གཡོན་ལྷུང་ལོག་སྤྱོད་ཀྱི༎
མེ་འོབས་ཟབ་མོར་རང་རིགས་ཀྱི༎
ཕུན་ཚོགས་རིག་པའི་ལོངས་སྤྱོད་ཀུན༎
བསྲེགས་ཏེ་མུན་པའི་གླིང་དུ་བསྒྱུར༎
རིང་མིན་མཁས་མཛངས་ཏང་མི་ཚོས༎
བདུད་དཔུང་བཅོམ་ཞིང་བཅུ་གཅིག་པའི༎
ཚང་འཛོམས་གྲོས་ཚོགས་གསུམ་པ་ཡི༎
དགོངས་དོན་ཉིན་བྱེད་བོད་དུ་འདྲེན༎
དེ་ནས་གྱ་གཅིག་བཅུ་པའི་ནང་༎
ཞིང་ཆེན་བོད་ཡིག་སློབ་གྲྭ་འདི༎
རིགས་ཀྱི་དཔའ་བོ་དུ་མ་ཡི༎
མཚུངས་མེད་ཐུགས་བསྐྱེད་ཉིད་ལས་འཁྲུངས༎
མཁས་བཙུན་བཟང་བའི་ཡོན་ཏན་ཅན༎
གངས་ཅན་མཁས་པའི་དཔུང་སྡེ་ཞིག།
ཤྲཱི་སེང་ལྔ་རིག་སློབ་གླིང་གི།
དད་བརྩོན་སློབ་བུའི་མགོན་དུ་ཕེབས༎
ཡུན་ནས་བཅུ་ཕྲག་སྦྲང་རྩིའི་བཅུད༎
འཐུང་འདོད་གངས་ཕྲུག་བུང་བའི་ཚོགས༎
ལ་འུར་ལྔ་རིག་དགའ་ཚལ་དུ༎
འཛོམས་ནས་ངོམ་མེད་ཐོས་པར་གཞོལ༎
དེ་ནས་གྱ་དྲུག་ལོ་ཟླའི་ནང་༎
གངས་རིའི་རིག་པ་སྨྲ་བའི་ཁྱུང་༎
བཅུ་ཕྲག་བརྒྱད་ལྷག་ཕྱོགས་གཞིར་འཕུར༎
ལྔ་རིག་སློབ་གྲྭ་འཛམ་གླིང་གྲགས༎
དེ་ཡང་ལྔ་རིག་སློབ་གྲྭ་འདི།།
ཐོག་མར་སྡེ་དགེ་རྫོགས་ཆེན་ནས༎
རིམ་བཞིན་བ་སྨད་རྟ་འུ་དང་༎
མཇུག་མཐར་དར་རྩེ་མདོ་དང་བཅས༎
སྔ་ཕྱིར་གནས་བཞིར་སྤོ་སྡོད་བྱས༎
འདི་ཡང་འཛམ་གླིང་ལོ་རྒྱུས་ན༎
བྱུང་བ་དང་པོ་ཡིན་ཞེས་གྲགས༎
དེང་གི་སློབ་གྲྭའི་གནས་ཡུལ་འདི༎
གོང་གི་མཁས་མཛངས་དབུ་ཁྲིད་དང་༎
ཕྱོགས་བཞིའི་སྐྱེས་ཆེན་དུ་མ་དང་༎
སློབ་གྲྭའི་དགེ་སློབ་སྔ་ཕྱི་དང་༎
ལྷག་པར་སྐབས་དེའི་སློབ་མ་སོགས༎
ཀུན་གྱིས་འབད་པའི་འབྲས་བུར་འཁུམས༎
 ལྔ་རིག་སློབ་གྲྭར་དཀར་མཛེས་དང་༎
རྔ་བ་བདེ་ཆེན་ཆབ་མདོ་དང་༎
ས་སྐྱ་ནག་ཆུ་སྐྱེ་དགུ་དང་༎
གཡག་རྔ་སོགས་ལས་ཆེད་ཚན་དང་༎
ལས་བྱེད་ཟབ་སྦྱོང་འཛིན་གྲྭ་དང་༎
འབྲིང་གཉེར་འདོན་པའི་སློབ་མའི་ཚོགས།།
བརྒྱ་ཕྲག་དགུ་ལ་ཉེ་བ་འདིས༎
སྒྲ་ཚད་བཟོ་གསོ་ནང་རིག་དང་༎
སྙན་ངག་མངོན་བརྗོད་སྐར་རྩིས་དང་༎
བོད་རྒྱ་ཡིག་སྒྱུར་དྲུང་ཡིག་དང་༎
རྩིས་འཁྲུལ་ཡུལ་སྐོར་སྣེ་ཤན་དང་༎
སྤྱི་འབྲེལ་སྲིད་འཛིན་རིག་པ་སོགས༎
གནའ་དེང་རིག་པའི་གཞུང་བཟང་ལ༎
ཐོས་བསམ་ལྷོད་མེད་བྱེད་ལ་བྲེལ༎
དེ་མིན་ལྷོ་ནུབ་སློབ་ཆེན་དང་༎
མཉམ་གཉེར་རང་སྦྱོང་རྒྱུགས་སྤྲོད་ཀྱི༎
ཆེད་ཚན་དངོས་ཚན་ཁག་གཉིས་ལའང་༎
སློབ་མའི་ཚོགས་ནི་སྟོང་ལས་བརྒལ༎
འདི་ན་དགེ་སློབ་དམ་ཚིག་མཐུན༎
རང་རིགས་སྲོལ་བཟང་བླ་ན་བཀུར༎
འཆད་ཉན་ཁ་བ་བབས་བབས་ཡིན༎
ཤེས་ཡོན་མེ་ཏོག་བཀྲ་བཀྲ་ཡིན༎
ཀློག་འདོན་ཁུ་བྱུག་གྲག་གྲག་ཡིན༎
སྦྱངས་འབྲས་དབྱར་ཆུ་རྒྱས་རྒྱས་ཡིན༎
སྤྱོད་བཟང་བལ་འཇམ་ཤིག་ཤིག་ཡིན༎
བདེ་རྩལ་གློག་འོད་འཁྱུག་འཁྱུག་ཡིན༎
རིགས་ཞེན་མེ་རི་འབར་འབར་ཡིན༎
རིགས་ཀྱི་སྲོག་རྩ་སྐད་ཡིག་གཉིས༎
ཡིན་པ་དགེ་སློབ་སེམས་ན་ཡོད༎
དོན་དམ་དགོས་དོན་ལག་ལེན་དུ༎
འབད་པའང་རང་རེའི་དགེ་སློབ་ཡིན༎
ཁ་ནས་མི་རིགས་ལས་དོན་ཟེར།།
ལག་ནས་རང་སྐད་རང་ཡིག་བསྐྱུར༎
དེ་འདྲའི་རྣམ་ཐར་འཛིན་པའི་མི༎
སློབ་གྲྭ་འདི་ན་ཡེ་ནས་མེད༎
དགེན་གྱིས་སློབ་མ་བུ་བཞིན་སྐྱོང་༎
སློབ་བུས་དགེན་ཉིད་ཕ་མར་བརྩི༎
ཆེ་གུས་ཆུང་སྐྱོང་སྲོལ་བཟང་འདིའང་༎
སློབ་གྲྭའི་ཐུན་མིན་ཁྱད་ཆོས་ཡིན༎
སློབ་གྲྭར་སློབ་ཞུགས་སློབ་མའི་གྲངས༎
མང་ངམ་ཡང་ན་ཆེས་ཉུང་ཡང་།།
ཀུན་ལ་ཕོགས་ཐོབ་སྒོར་མོའི་གྲངས༎
མཐོ་འམ་ཡང་ན་ཆེས་དམའ་ཡང་༎
གཞན་གྱིས་དགེན་ལ་བརྩི་མཐོང་དེ༎
ཆེ་འམ་ཡང་ན་ཆེས་ཆུང་ཡང་༎
སློབ་གྲྭའི་དགེན་གྱི་དམ་བཅའ་ནི༎
ནམ་ཡང་འགྱུར་མེད་སློབ་གསོར་གཞོལ༎
ད་དུང་ཉོན་དང་འདྲ་མ་ཡོད༎
སྔ་ནས་ད་བར་སློབ་གྲྭ་ནས༎
ཐོན་པའི་སློབ་མ་ཀྲུང་དབྱང་ནས༎
ས་གནས་བར་གྱི་སྡེ་ཁག་གི།
བོད་ཀྱི་ཤེས་རིག་ཞིབ་འཇུག་དང་༎
མི་རིགས་སློབ་གསོ་གོང་སྤེལ་དང་༎
མང་ཚོགས་ནད་བཅོས་སྲོག་སྐྱོབ་དང་༎
རྒྱལ་ཁབ་གཞུང་ཞབས་ལས་སྒྲུབ་དང་༎
ཆོས་སྲིད་སྐད་གཉིས་ལོ་ཙཱ་དང་༎
དམངས་ཁྲོད་ལག་ཤེས་བཟོ་ལས་སོགས༎
སྣ་མང་ལས་ཀར་འཇོན་ནོ་ཞེས༎
ཀུན་གྱི་ཁ་ན་རླུང་ལྟར་གྲགས༎
ཉེ་བའི་ལོ་འགར་སློབ་གྲྭ་ཡི༎
མཐར་ཕྱིན་སློབ་མ་ལས་ཞུགས་ཀྱི༎
རྒྱུགས་འཕྲོད་བསྡུར་ཚད་སློབ་མ་ཡི༎
བརྒྱ་ཆ་བརྒྱད་ཅུར་བརྒལ་ཞེས་གྲགས༎
ཁྱད་པར་སློབ་གྲྭ་འདི་ཉིད་ལས༎
སྔ་ཕྱིར་ཐོན་པའི་སློབ་གྲོགས་ཚོ༎
ཡུལ་དུས་གང་དུ་ཅི་བསྒྲུབས་རུང་༎
སེམས་ནས་སློབ་གྲྭ་མི་བརྗེད་གཅིག།
དགེ་སློབ་དམ་ཚིག་མི་འགལ་གཉིས༎
སློབ་གྲོགས་མཛའ་བརྩེ་མི་འདོར་གསུམ༎
མི་རིགས་ལས་དོན་མི་བསྐྱུར་བཞི༎
དམངས་ལ་བྱམས་སེམས་འཆང་དང་ལྔ༎
འདི་ལྔ་དཔྲལ་བའི་མིག་བཞིན་གཅེས༎
དེ་ལྟར་སློབ་ཐོན་སློབ་མ་རྣམས༎
རང་རིགས་སྲོལ་བཟང་འཛིན་མཁན་ཡིན༎
བོད་ལ་བདེ་སྐྱིད་སྐྲུན་མཁན་ཡིན༎
མི་རིགས་མཐུན་སྒྲིལ་བྱེད་མཁན་ཡིན༎
མེས་རྒྱལ་འཛུགས་སྐྲུན་བྱེད་མཁན་ཡིན༎
དེ་ལྟར་ལྔ་རིག་སློབ་གླིང་འདི༎
བཙུགས་ནས་ལོ་འཁོར་སུམ་ཅུ་ཡི༎
དགའ་སྟོན་དུས་བཟང་ཤར་དང་གཅིག།
རླབས་ཆེན་མེས་རྒྱལ་དབུ་བརྙེས་པའི༎
རྟེན་འབྲེལ་མཛད་སྒོར་འཁེལ་དང་གཉིས༎
མཁས་མཛངས་ཏང་འཛུགས་ལོ་འཁོར་ནི༎
དགུ་བཅུའི་དུས་སྟོན་ཤར་དང་གསུམ༎
བཀྲ་ཤིས་དུས་བཟང་སུམ་འཛོམས་འདིར༎
སློབ་གྲྭའི་དགེ་སློབ་བཀྲ་ཤིས་ཤོག།
བོད་རིགས་རང་སྐྱོང་བཀྲ་ཤིས་ཤོག།
གཞིས་བྱེས་ལྷན་འཛོམས་བཀྲ་ཤིས་ཤོག།
མེས་རྒྱལ་རྟག་བརྟན་བཀྲ་ཤིས་ཤོག།
འཛམ་གླིང་ཞི་བདེ་བཀྲ་ཤིས་ཤོག།
ཆོས་སྲིད་ལུགས་གཉིས་བཀྲ་ཤིས་ཤོག།
གླུ་གོ་ན་རྣ་བའི་བུ་རམ་གྱིས༎
མ་གོ་གླུ་ལ་འགྲེལ་བ་མེད༎
ཚིག་འཁྲུལ་བ་སོང་ན་བཟོད་པ་གསོལ༎
དོན་ལོག་པ་ཡོད་ན་མཐོལ་ལོ་གཤགས༎
དེ་ལྟར་ཀུན་གྱི་ཐུགས་ལ་ཞོག།
བཀྲ་ཤིས་བདེ་ལེགས་ཕུན་སུམ་ཚོགས༎