བཞག་བྲ་ལྷ་རྩེའི་བཞད་སྒྲ །

ཨོ་རྒྱན་དོན་གྲུབ།        2011-07-22

སྨད་མདོ་ཁམས་སྒང་དྲུག་དག་པའི་ཞིང༌།།
ཤར་མི་ཉག་ས་ཡི་ཐིག་ལེའི་དབུས།།
རི་མཆོག་གྱུར་བཞག་བྲ་ལྷ་རྩེ་དེ།།
བོད་ཁ་བ་ཅན་གྱི་བླ་རི་རེད།།
 
མཐོ་གཟི་བརྗིད་རི་རྩེ་མཁའ་ལ་སྙེག།
སྤྲིན་འཇའ་ཚོན་སྣ་ལྔའི་མགུལ་རྒྱན་འཆང༌།།
གངས་ཁ་བས་དུས་བཞིར་རྒྱན་དུ་བཀྲ།།
ངོ་འགྱུར་མེད་གངས་ཀྱི་རི་མཆོག་ཉིད།།
 
འདབས་གཡུ་མཚོ་སྔོན་མོ་དལ་གྱིས་འཁྱིལ།།
ཉ་གསེར་མིག་འཁྱུག་བགྲོད་ལྷོད་ལ་བབས།།
ངན་འཚེ་མེད་རི་དྭགས་གར་དུ་རྩེན།།
མགོན་ཞི་བདེ་དགོངས་པས་བྱིན་གྱིས་རློབ།།
 
ཡུལ་སྐུ་རྒྱལ་བོད་ཀྱི་སོ་བ་ལ།།
རི་བཞག་བྲ་ལྷ་རྩེ་ལྷིང་ལ་འབུད།།
བོད་གངས་ཅན་ཁ་ལས་རླུང་རྟ་ལ།།
གནས་ཁྱེད་ཀྱིས་མཛད་པ་བསམ་མི་ཁྱབ།།
 
རི་ཁྱེད་ནས་འབབ་པའི་གངས་ཀྱི་ཆུ།།
ཡུལ་ཞི་བདེ་རྒྱ་མཚོར་འདྲེས་ཏེ་ཡོད།།
གནས་ཞི་བདེ་རྒྱ་མཚོའི་འགྲམ་ངོགས་ན།།
བོད་བཙན་པོའི་ཞི་བདེའི་མེ་ཏོག་འཁྲུངས།།
 
གནས་མཆོག་གྱུར་བཞག་བྲ་ལྷ་རྩེ་དེ།།
ངོ་མཚར་སྡུག་སྟོང་གི་ལོ་རྒྱུས་འབར།།
ཡུལ་ཁ་བ་རི་བའི་བདེ་སྡུག་ཁུར།།
རི་ཁྱེད་ལ་བསྟོད་པའི་གླུ་ཞིག་ལེན།།
  • ལེ་ཚན་སྔོན་མ།:སྦྲང་དཀར་རྩམ་པ།
  • ལེ་ཚན་རྗེས་མ།:འདུ་འབྲལ་སྙིང་པོ་མེད་པར་རྟོགས་པའི་གླུ།