དུས་ཚོད་ཀྱི་འཁོར་ལོ་བར་མེད་འཁོར།
དྲན་སྐུལ་གྱི་ཅོང་བརྡ་རྒྱུན་མི་ཆད།བརྩོན་འགྲུས་ཀྱིས་ཅོང་བརྡ་ཐོས་མ་ཐག །གྲིམ་རིལ་ཅིག་བརྒྱབ་ནས་མལ་ལས་ལངས།དཔེ་དེབ་ཅིག་མཆན་ལ་བཟུང་ནས་ནི།།ལྷས་རའི་ནང་རང་སྦྱོང་བྱེད་དུ་སོང་།ལེ་ལོ་ནི་ད་དུང་གཉིད་དུ་ཡུར།རྨི་ལམ་དུ་རྟ་བོ་ཞོན་པ་རྨིས།ཐང་སྟོང་དུ་གོམ་པ་འཁྱེར་བ་རྨིས།ཡུད་ཙམ་ནས་གློ་རྨེད་ཆད་པ་རྨིས།རྟ་ཐོག་ནས་ཐང་ལ་ལྷུང་བ་རྨིས།རྐང་བ་གཅིག་ཡོབ་ལ་ཐོགས་པ་རྨིས།།ཚེར་གསེབ་ཏུ་རྟ་ཡིས་དྲུད་པ་རྨིས།ན་ཟུག་དག་བཟོད་བསྲན་མ་ཚུགས་པར།ཨ་ཙ་མ་ཟེར་ཞིང་གཉིད་ལས་སད།དེ་མ་ཐག་སླར་ཡང་གཉིད་དུ་ཡུར། ལེ་ལོ་དང་བརྩོན་འགྲུས་ཕུ་ནུ་གཉིས།།རིགས་རུས་ལ་མཆོག་དམན་མ་མཆིང་ཤིང་།ཆོ་འབྲང་ལ་བཟང་ངན་མེད་ན་ཡང་།བརྩོན་འགྲུས་དང་ལེ་ལོ་སྤུན་གཉིས་ཀྱི།སྦྱངས་འབྲས་ལ་གནམ་སའི་ཁྱད་པར་བྱུང་།དེ་མུས་སུ་ལོ་ཟླ་དུ་མ་འདས།ནམ་ཞིག་ཚེ་ནུ་བོའི་བསམ་པ་ལ།།ཕུ་བོ་ནི་ལེ་ལོར་གཡེང་དྲགས་པས།དྲན་སྐུལ་གྱི་གསལ་ཞིག་འདེབས་དགོས་སྙམ།།  དེ་ཙ་ན་དཔྱིད་ཀྱི་དཔལ་ཡོན་ཤར།ཕུ་ནུ་གཉིས་ལྡུམ་རའི་སྐྱེད་ཚལ་དུ།སྤྲོ་བསངས་དང་འཆམ་འཆམ་བྱེད་དུ་དེངས།དཔྱིད་གསུམ་གྱི་དཔལ་ཡོན་དེ་མཐོང་ནས།བརྩོན་འགྲུས་ཀྱིས་ལེ་ལོར་འདི་སྐད་སྨྲས།ཀ་ཡེ་ཁྱོད་གསོན་དང་གཅེན་པོ་ལགས།མེ་ཏོག་གི་སྐྱེད་ཚལ་ཉམས་དགའ་འདིར།ཁོར་ཡུག་ཀུན་ལྗོན་ཤིང་ཚང་ཚིང་འཁྲིགས།བྱ་བྱིའུ་རྣམས་གླུ་དབྱངས་ཅི་དགར་སྒྲོག སྔོ་ལྗང་གི་ནེའུ་གསིང་གཙང་མའི་གཞིར།ཁྲ་ཆིལ་གྱི་མེ་ཏོག་འཛུམ་ཞིང་དགོད།།རྐང་དྲུག་གི་བུང་བ་འཕུར་ཞིང་ལྡིང་།།འདི་དག་རྣམས་གཞོན་ནུའི་ལང་ཚོར་དཔེ།དོན་ལྡན་གྱི་ས་བོན་མ་བཏབ་ན།མེ་ཏོག་གི་སྐྱེད་ཚལ་ཇི་ལྟར་ཆགས།བརྩོན་སེམས་ཀྱིས་མྱུ་གུ་མ་བཙུགས་ན།ཚང་ཚིང་གི་ལྗོན་ཤིང་ཇི་ལྟར་སྐྱེ།བྱ་བྱིའུ་རྣམས་གྲེ་བ་མི་བདེ་ན།སྙན་འཇེབས་ཀྱི་གླུ་དབྱངས་ཇི་ལྟར་ལེན།རྐང་དྲུག་གིས་འཕུར་རྩལ་མ་སྦྱངས་ན།མེ་ཏོག་གི་བཅུད་བཟང་ཇི་ལྟར་ལེན།དེ་བས་ན་ད་ལྟ་གཞོན་ནུའི་དུས།ལེ་ལོ་ཡི་དབང་དུ་མི་འགྲོ་ཞིང་།བརྩོན་པ་ཡི་བློ་དེ་མ་དོར་བར།ཡོན་ཏན་ཞིག་སྦྱོངས་ལ་ཁྱོད་ཀྱང་འབུངས། དེ་སྐད་ཀྱི་གཏམ་དག་ཐོས་འཕྲལ་དུ།ལེ་ལོ་ནི་ཁོང་འཛུམ་གཏིང་ནས་ཤོར།ཁྲེལ་དགོད་ཀྱི་མེ་ལྕེ་མཁའ་ལ་མཆེད།ཟུར་ཟ་ཡི་ཆུ་མོ་རླབས་ལྟར་འཕྱུར།སངས་རྒྱས་ཁྱོད་རང་མགོ་མ་ཐོན་པར།སེམས་ཅན་རྣམས་ཡང་འདྲེན་ཅི་ལ་ཡོང་།མོ་མ་ཁྱོད་རང་བྱས་མི་དྲན་པར།སེམས་ཅན་གྱི་བདེ་སྡུག་ཇི་ལྟར་མཁྱེན།།ནུ་བོ་ཁྱོད་རང་མགོ་མི་འཁྱོངས་བཞིན།ཕུ་བོ་ལ་བསླབ་བྱ་ཇི་ལྟར་བྱེད།ཞེས་པ་སོགས་འཆལ་གཏམ་བྱུང་རྒྱལ་སྨྲས།།  དེ་ནས་བཟུང་མ་གཅིག་ཕུ་ནུ་གཉིས།རང་རང་སར་འཚོ་བ་སྐྱེལ་ཞིང་འདས།ལེ་ལོ་ནི་གཉིད་དང་སྒྱིད་ལུག་བྱེད།བརྩོན་འགྲུས་ཀྱིས་ལྔ་རིག་མཁས་པར་སྦྱངས།ལོ་ཟླ་ཡི་དུས་ཚོད་དལ་གྱིས་འདས།སོ་དཀར་གྱི་ལང་ཚོ་རིམ་གྱིས་ཡལ།སྐྲ་དཀར་གྱི་ཕོ་ཉ་མྱུར་དུ་སླེབས།བརྩོན་འགྲུས་ནི་མཁས་པའི་གྲལ་དུ་མཛེས།ལེ་ལོ་ནི་གླེན་པ་གཅིག་པུར་ལུས།ཐམས་ཅད་ཀྱིས་འཕྱ་ཞིང་དགོད་པའི་ཚེ།སྔར་བྱས་ལ་འགྱོད་ཀྱང་འཕྱིས་པ་ཤེས།（རྩོམ་སྒྲིག་པ་བདེ་ཆེན་དབང་མོ།）