སློབ་དཔོན་ལགས།
 ཁྱེད་ནི་གསེར་མདོག་གི་ཉི་མ།
དུང་མདོག་གི་ཟླ་བ།
བདུད་འཇོམས་ཀྱི་བདུད་རྩི།
འོད་གསལ་གྱི་སྣང་བ་ལགས།
ཁྱེད་ཉིད་འཛམ་གླིང་གི་མིག་ཟུང་ཉག་ཅིག་ཡིན་པས།
འཇིག་རྟེན་འདིའི་མ་རིག་པའི་ཉོན་མོངས་ཀྱི་རང་མཚང་རྗེན་པར་ཕྱུང་ལ།
ཁྱེད་ཉིད་ཡེ་ཤེས་ཀྱི་སྒྲོན་མེ་རྐང་གཅིག་ཡིན་པས།
རྣམ་མཁྱེན་ཤེས་རབ་ཀྱི་རལ་གྲིས་ཐེ་ཚོམ་གྱི་སྒྲོ་འདོགས་དུམ་བུར་གཏུབས།
ཁྱེད་ཉིད་ཡེ་ཤེས་ཀྱི་སྣང་བ་རྒྱས་པའི་བདུད་རྩི་ཡིས་ལྷ་ཆབ་ཅིག་ཡིན་པས།
སྒྲ་ཚད་ཀྱི་སྐོམ་པས་གདུང་བ་སེལ་འགྲོ་ལ།
བཟོ་གསོ་ཡི་མཛངས་མ་བག་མར་བསུ།
ནང་རྒྱུད་ཀྱི་གནས་ལུགས་འཆམ་ལའང་ཁྱེད་ཀྱིས་ཕབ་ངེས།
སློབ་དཔོན་ལགས།
ཁྱེད་ནི།
ཡེ་ཤེས་ཀྱི་མེ་ལྕེ།   སྐོམ་སེལ་གྱི་ལྷ་ཆབ།  བདེ་ལེགས་འབྱུང་བའི་གཞི་མ།
ཕུན་སུམ་ཚོགས་པའི་ལོངས་སྤྱོད་ཐམས་ཅད་ཀྱི་ས་བོན་ཡང་ཁྱོད་ལས་འབྱུང་བ་ཡིན་པས།
ངས་ཁྱེད་ལ་གུས་འདུད་ཞུ།
ཁྱེད་ཉིད་ཀྱི་འོད་གསལ་སྣང་བ་བེམ་པོ་ཞིག་མིན་པས།
མངོན་མཐོ་ལྷ་ཡི་རྣམ་གཡེང་དཀྲོག་པའི་བདེ་ཆེན་ཁྱོད་ཀྱིས་སྩོལ།
ཕྲག་དོག་ལྷ་མིན་གྱི་འཁྲུགས་རྩོད་ཞི་བའི་བྱམས་པ་ཚད་མེད་ཁྱོད་ལ་མངའ།
འདོད་ཆགས་མི་ཡི་ཞེན་པའི་སྡུག་བསྔལ་གནོན་པའི་ཆོག་ཤེས་ཁྱེད་ཀྱིས་སྩོལ།
གཏི་མུག་བྱོལ་སོང་ལམ་སྣར་འདྲེན་པའི་སྣང་བ་ཁྱེད་ལ་རྒྱས།
སེར་སྣའི་ཡི་དྭགས་འཆིང་བ་གྲོལ་བའི་གཏོང་བ་ཁྱེད་ཀྱིས་སྦྱིན།
ཞེ་སྡང་དམྱལ་བའི་མེ་ཆུ་གནོན་པའི་སྙིང་རྗེ་ཁྱོད་ལ་ལྡན་འདུག་པས།
ཁྱོད་ཀྱི་ཐབས་ཀྱིས་བརྟོལ་བའི་བདེ་བ་ཆེན་པོའི་ལམ་སྣེ་ལ།
སྣང་བས་སྦར་བའི་ཤེས་རབ་སྟོང་ཉིད་སྙིང་རྗེའི་གཟི་འོད་འབར་བཞིན་པ་རྒྱང་ནས་མཐོང་།
ཁྱེད་ཉིད་ལེགས་བྲིས་རང་བྱོན་གྱི་སྐུ་ལ་འགྱུར་བ་མེད་པས་ཀུན་གྱིས་མིག་དབང་འཕྲོག་སོང་ལ།
ཁྱེད་ཀྱི་འགག་མེད་གསུང་གི་གནས་ལུགས་ལ་ནོར་བ་མེད་པས་ཤེས་བྱ་ཐམས་ཅད་ཚད་མར་གསུངས་སོང་།
ཁྱེད་ཀྱི་འཁྲུལ་མེད་ཐུགས་ཀྱི་དགོངས་པ་ལ་རིས་ཆད་དང་བྲལ་བས་གནས་ལུགས་ཀུན་གྱིས་བདེན་པ་རྟོགས་སོང་།
ཨེ་མ།
ཁྱེད་ནི་བྱང་ཆུབ་ཀྱི་སྙིང་བོ།
རྣམ་འདྲེན་གྱི་དེད་དཔོན།
བྱམས་བརྩེ་ཡི་ཡུམ་ཆེན་ལགས།
སློབ་དཔོན་ལགས།
ཁྱེད་ལ་མངོན་བརྗོད་ཀྱི་མཚན་སྙན་པོ་ཞིག་ཡོད་པས།
ངས་སྙིང་ནས་འབོད་པར་སྤོབས་ལ།
ཁྱེད་ལ་སྡེབ་སྦྱོར་ངག་ལ་སྦྱར་བའི་དབྱངས་ཤིག་ཡོད་པས།
ངས་ངག་ནས་གྱེར་བར་འདོད།
ཁྱེད་ལ་ཟློས་གར་སྒེག་མོའི་མྱོས་པའི་ལང་ཚོའི་གཟུགས་ཤིག་ཡོད་པས།
ངས་ནམ་ཡང་བལྟ་བར་འདོད་ལ །
ཁྱེད་ལ་སྐར་རྩིས་འབྱུང་བའི་རྣམ་གྲངས་འདྲེན་པའི་དཔག་མེད་ཀྱི་བློ་ཞིག་ཡོད་པས།
ངས་ནམ་ཡང་འདྲེན་པར་སྤོབས།
ཁྱེད་ལ་སྙན་ངག་རིན་ཆེན་དོ་ཤལ་གྱིས་སྤྲས་པའི་མཛེས་མའི་ལང་ཚོའི་གཟུགས་ཤིག་ཡོད་པས།
ངའི་སེམས་ཀྱི་བརྟན་པ་འཕྲོག
འདི་ནི་སློབ་དཔོན་ཁྱེད་ལ་མངའ་བའི་མཛངས་མའི་ཡོན་ཏན་དང་།
སྐལ་ལྡན་བུ་ལ་ཐོབ་པའི་བསོད་ནམས་གྱི་སྐལ་བའང་ཡིན་ལགས།
སློབ་དཔོན་ལགས།
ཁྱེད་ཀྱི་གཟུགས་འཛིན་གྱི་མངོན་མཁྱེན་ཡངས་པས་འཁོར་འདས་ཐམས་ཅད་དབྱེར་མེད་དུ་གཟིགས་སོང་ལ།
ཁྱེད་ཀྱི་སྒྲ་འཛིན་ལ་ཟག་པ་མེད་པས་དམྱལ་བ་ཚ་གྲང་གི་ངུ་འབོད་ཀྱང་ཐོས་སོང་།
ཁྱེད་ཀྱི་དྲི་འཛིན་གྱི་ཚོར་བ་རྣོ་བས་འཇིག་རྟེན་ཉོན་མོངས་ཀྱི་དྲི་མས་སྦག་པའང་འབྱེད་འགྲོ་ལ།
ཁྱེད་ཀྱི་རོ་འཛིན་གྱི་མྱོང་བ་གྲོལ་བས་དགེ་སྡུག་ལེགས་ཉེས་ཀྱི་སྙིགས་རོ་ལ་བླང་དོར་འབྱེད་འགྲོ །
ཁྱེད་ཀྱི་རེག་འཛིན་གྱི་ཁྱེའུ་ལ་རྣམ་རིག་སྤྱང་གྲུང་འཛོམས་པས་འཇམ་རྩུབ་ལྕི་ཡང་གི་སྡུག་བསྔལ་ཡི་གདོང་ལའང་འབུད།
སློབ་དཔོན་ལགས།
ཁྱེད་ལ་ཚུལ་ཁྲིམས་ཀྱི་ལུས་གཙང་མ་ཞིག་ཡོད་པས།
སྒོ་གསུམ་གྱི་ཀུན་སྤྱོད་གཙང་།
ཁྱེད་ལ་བཟོད་པའི་གོ་ཆ་བརྟན་པོར་བགོས་ཡོད་པས།
མེ་ཆུ་འཁྲུག་པའི་སྡུག་བསྔལ་ལའང་བཟོད །
ཁྱེད་ལ་སྦྱིན་པའི་ལོངས་སྤྱོད་འཛད་མེད་ཅིག་ཡོད་པས།
ཤེས་བྱའི་ལོངས་སྤྱོད་ཀྱི་རིག་སྒོ་འཛམ་གླིང་ཡོངས་ལ་སྤེལ།
ཁྱེད་རང་བརྩོན་འགྲུས་གྱི་རྟ་ཕོ་ཅང་ཤེས་ལ་བཅིབས་ཡོད་པས།
བཅུ་ཕྲག་རིག་པའི་བྱང་ཐང་དུ་ཐོགས་མེད་དུ་བརྒྱུགས་སོང་།
ཁྱེད་ཉིད་བསམ་གཏན་གྱི་ཏིང་ངེ་འཛིན་ལ་སྙོམས་པར་བཞུགས་ཡོད་པས།
སྣང་སྲིད་ཐམས་ཅད་འོད་གསལ་ངང་དུ་གཟིགས་སོང་།
ཁྱེད་ལ་ཤེས་རབ་ཀྱི་སྤྱན་ཟུང་རྣོན་པོ་རུ་སྣང་ཡོད་པས།
ལྟ་བ་བཀར་བཏགས་ཀྱི་སྡོམ་ཚིག་ཀྱང་ལེགས་པར་དྲངས་སོང་།
སློབ་དཔོན་ལགས།
འདི་ནི་ཁྱེད་ལ་མངའ་བའི་དཔལ་ཡོན།
འགྲོ་དོན་འགྲུབ་པའི་འཕྲིན་ལས།
བདེན་དོན་འཁྱོངས་པའི་ཏན་རྟགས།
ལེགས་ཉེས་འབྱེད་པའི་ཡེ་ཤེས་ཏེ།
ཁྱེད་ཀྱི་སྲིད་པ་འཇིག་རྟེན་འདིར་ཕུལ་བའི་ཡོད་ཚད་རེད་ལགས།
ཀྱེ་ཀྱེ           སློབ་དཔོན་ལགས།
ཁྱེད་ཀྱི་སྐུ་ལས་འཚེར་བའི་གཟི་འོད།
གསུང་ལས་བརྡོལ་བའི་མན་ངག
ཐུགས་ལས་བརླན་པའི་སྙིང་རྗེ་སྟེ།
སྣང་སྲིད་ཀུན་ལ་ཁྱབ་པའི་འགྲོ་བ་ཀུན་གྱི་མིག་དབང་གསོན་པོ་ལགས།
དེའི་དབང་གིས།
ངས་ཁྱེད་ལ་རྟེན་འབྲེལ་ཞུ།
ངས་ཁྱེད་ལ་བསྟོད་དབྱངས་ལེན།
ངས་ཁྱེད་ལ་དཔའ་དར་འབུལ།
ངས་ཁྱེད་ལ་གསོལ་སྐྱེམས་འདྲེན།