གྲང་རླུང་གི་ངར་སྐད།   དར་ལྕོག་གི་ཟག་སྒྲ
གསུར་དྲིའི་ཀླུང་ན་ཕ་བོང་ཆེན་པོ་ཞིག་སྣུམ་ཚིལ་གྱིས་ཟིན།
དུམ་བུར་ཆག་པའི་རུས་རྐང་དཀར་པོ
གཅེས་ཕྲུག་སུ་ཞིག་གི་ཞེན་ཆགས་ཡིན
 
གངས་འཁྱག་གི་ལོ་མ་སྐྱ་བོ   ངའི་དུར་ཐང་ལས་བབས
སྣོ་ལྕགས་ཀྱི་སྡེར་མོ་གཟེངས་བའི་བྱ་རྒོད་ཚོགས
ཧམ་སེམས་ཀྱིས་རུབ་སྟེ      ནང་ཁྲོད་དང་གློ་སྙིང
མགོ་རྐང་དང་ཡན་ལག་དུམ་བུར་བགོས
འཇིག་རྟེན་གྱི་དཀར་ངོགས་འདི་ན
ཁྲག་ཐིགས་ཅིག་ལས་ཅི་ཡང་ལྷག་མེད
ད་ལྟ་ང་རང་ཕྱིན་ཆོག     ཆགས་ས་དང་ཞེན་ཡུལ་མེད་པར
རི་བོ་དང་གཙང་ཆེན་བརྒལ་ནས   དྲན་ཚད་ཀྱི་རྫུ་འཕྲུལ་སྟོན་བཞིན་རང་དབང་གིས་འཕུར་ཆོག 
 
མི་ལོ་སུམ་ཅུའི་དགའ་སྡུག་ཡོད་ཚད
ཉིན་སྲིབ་བཅོ་བརྒྱད་ལ་རྐང་བས་བཞག་ཀྱང
བག་ལེབ་ཟླུམ་པོ་ཞིག་གི་ཟས་སྐལ་མ་ཐོབ་ལ
ཁྱིམ་གཞིས་དྲོན་མོ་ཞིག་གི་གནས་ཚང་མ་རྙེད་གོང
དམར་ཧྲེང་གི་ལུས་པོ་འདི་ཡང་བསྐྱུར་ནས་འགྲོ
ཞེ་བསམ་པའི་གླུ་ཞིག་བླངས་ན
ངག་སྙན་མོའི་ལེན་པ་ང་མེད
ལུས་མཉེན་མོས་བྲོ་ཞིག་འཁྲབ་ན
གྲོགས་ན་ཟླའི་རྩེ་རོགས་ང་མེད
གཡའ་རི་བ     ཁྱོད་ནི་ནམ་ཡང་ཁྱོད་གཅིག་པུ་ཡིན
 
གཡའ་རི་བ    ཁྱོད་ཤི་ཁར་སྔས་འོག་ཏུ་བཞག་པའི་འཕྲིན་ཐུང་དེར
སྡོད་གནས་དང་སྦྲགས་ཨང་མི་གསལ་བས
འབྲུག་མོ་སྒྲོལ་མ་ནོར་འཛིན
དོན་ངོ་མ་སུ་ལ་སྤྲོད་དགོས
 
སྙན་ངག་གི་འབྲི་ཤོག་བརྩེགས་མ་དེ་དག
ཉིད་ཀྱི་ཞལ་ཆེམས་ལྟར
ཁྱོད་ཀྱི་འདྲ་པར་དང་མཉམ་དུ་མེ་ལ་བསྲེགས་ཚར
ཕངས་སེམས་དང་ཐུགས་འགྱོད་མ་གནང
ཡིད་ཆད་དང་དབུགས་རིང་མ་གཏོང
དཀོན་མཆོག་ལགས     བར་དོ་འདི་ནས
བྱ་སྒྲོ་བཞིན་གང་སར་འཕུར་ནས    
ང་གསོན་མི་འདོད       དུས་གཏན་དུ་གསོན་མི་འདོད