དོ་དགོང་སྒེའུ་ཁུང་ལས་རླུང་བུ་ལྡང་བྱུང་།
     མལ་ས་རུ་དྲོད་ཁོལ་མི་འདུག
     གང་ངར་གྱི་བཅུམ་པའི་བདག་གི་ལུས་པོ།
     སྐམ་རིད་དུ་གྱུར་བའི་བདག་གི་ལག་ཟུང་།
     ན་ཟུག་གིས་བསླང་བའི་བདག་གི་སེམས་དེས།
    
     ཁྱེད་རང་དྲན་གྱིན་འདུག
     ང་རང་སྒེའུ་ཁུང་གི་འགྲམ་དུ་ལངས་ཏེ།
     ཕྱི་རོལ་དུ་བལྟས་པ་ན།
     ཁ་བ་ལྷབ་ཏུ་འབབ་ལ།
     གྲང་རླུང་འུར་དུ་ལྡང་།
     སྒོ་ཁྱིའི་ཟུག་སྐད་ཡང་དྲག་རླུང་དང་འགྲོགས་ནས།
     གང་སར་བྲག་ཅར་འཁྱིལ།
    
     ཕར་ཁའི་གཞུང་ལམ་དུ།
     རླངས་འཁོར་གཅིག་རྗེས་གཉིས་མཐུད་དུ།
     འགྲོ་བཞིན་འདུག་ལ།
     དྲན་གདུང་གི་མནར་བའི་སེམས་པ་དེ་ཡང་།
     དྲག་ཏུ་ལྡང་བྱུང་།
     སྐབས་དེར།
     ངས་ཁྱེད་ཀྱི་འདྲ་པར་ལག་ཏུ་བཟུང་ནས།
     ཁྲིའི་སྟེང་དུ་འགོས།
     བདག་གིས་དོ་ནུབ་ལྟ་བུའི་མཚན་མོ་གྲངས་མེད་ཅིག
     ཨུ་ཚུགས་དང་ཐབས་ཟད་གྱིས་སྐྱེལ་བཞིན།
     སྡོད་ཁང་གྲུ་བཞི་ཡི་ནང་ན་ལུས།
    
     དོ་ནུབ་ངས་ཁྱེད་རང་དྲན་དྲག་པས།
     སྐྱོ་གླུ་ཤུབ་ཤུབ་ཏུ་བླངས་ཤིང་།
     མིག་ཆུ་ཐར་ཐར་དུ་བབས་བྱུང་།
     དེ་ལྟར།
     ཁྱེད་རང་དྲན་པའི་ཡིག་འབྲུ་རེ་རེ།
     སེམས་ངོ་ནས་ཟློ་བཞིན།
     བརྩེ་བ་ཁྲི་ཕྲག་གི་མཆོད་ཡོན།
     མིག་མཐའ་ནས་བཤམས་ཏེ།
     བཞག་བྲ་གངས་རྒན་གྱི་འདབས་རོལ་ནས།
     དུས་གཏན་དུ་ཁྱེད་ལ་སྒུག་ཡོད་ཨང་།