ཀ་དག་རྟོགས་པས་འཁོར་བར་ངེས་འབྱུང་ཚུལ།།
ཁ་ནས་ལས་དང་རྒྱུ་འབྲས་རྟག་སྨྲ་བས།།
ག་ནས་ཕྱིན་ཀྱང་སྐྱེ་དགུ་མ་ལུས་དོན།།
ང་ཅག་སྣང་ངོར་ཉམས་བརྒྱས་ཟོལ་དུ་བརྫུས།།
ཅ་ལག་ཕྲན་ཚེགས་ཙམ་ལ་ཡིད་འཁྲེང་ཞིང་།།
ཆ་བྱད་སྤྱོད་ངན་གྲལ་ལ་རྒྱུན་འཚང་བ།།
ཇ་ཆང་ཤ་ཟན་རིགས་ལ་བརྐམ་ཆགས་བཅས།།
ཉ་མོ་ཆུ་ལ་འཁྲེན་ལྟར་རྟག་ཏུ་རེམ།།
ཏ་ཐཱའི་བསྟན་ལ་ཁག་འཇོག་བྱ་བྱེད་ཀྱིས།།
ཐ་མལ་ཚོགས་སུ་ཉུལ་ནས་རང་འདོད་འཚོལ།།
ད་དུང་སྙིགས་དུས་ཆོས་ཞེས་སྤྱོད་འཆལ་གྱིས།།
ན་བཟའ་ངུར་སྨྲིག་བཞེས་ནས་རྫིག་རྔམ་བསྟན།།
པ་སངས་ལྟར་དཀར་སེམས་ནི་མི་འཚལ་ཏེ།།
ཕ་རོལ་གཞན་ལ་སྙིང་རྗེ་འཛིན་ཁུལ་དང་།།
བ་གླང་ཇི་བཞིན་ཤེས་ཡོན་མི་འབུངས་བས།།
མ་ལུས་སེམས་ཅན་འདྲེན་པའི་དད་དཔོན་འཁྲབ།།
ཙ་རིའི་གནས་སྐོར་ལྟ་བུའི་སྡིག་སྦྱངས་ཀྱིས།།
ཚ་གྲང་དམྱལ་ཁམས་བཅོས་བརྒྱད་མི་ལྟུང་རེ།།
ཛ་དྲག་རོལ་དབྱངས་བསྡེབས་པའི་ཟློས་སྔགས་ཀྱིས།།
ཝ་ལེར་བདེ་ཞིང་རྙེད་པའི་ཐབས་ལ་འདོད།།
ཞ་ཞོར་ཡུན་ལའང་གཞན་དོན་མི་དགྱིས་ཏེ།།
ཟ་བཏུང་ག་བདོག་ཕྱོགས་སུ་ཁ་བརྙོགས་ནས།།
འ་ཅག་དག་ནི་ཚོགས་བསགས་ཞིང་ཡིན་ཞེས།།
ཡ་མཚན་མགུར་དབྱངས་འཛེམ་མེད་ཀུན་ལ་བསྙད།།
ར་རིའི་ཕྲག་དོག་འདོར་བྲལ་སྡང་མིག་དང་།།
ལ་རྒྱའི་ཕྱོགས་རིས་སོབ་པས་འཐེན་འཁྱེར་ཏེ།།
ཤ་ཞེན་རང་བརྩིས་ཆེ་བའི་གཤིས་གྱོང་བ།།
ས་ཀུན་ཕུང་གྲོལ་ཡིན་ཀྱང་མ་སྤངས་ན།།
ཧ་ཧའི་འཛུམ་དཀར་བསྟན་ནས་གསུང་འཇམ་ཡང་།།
ཨ་ལོང་ལྕགས་ནག་ཇི་བཞིན་ཐུགས་རྒྱུད་ལ།།
ཧ་ཅང་བདག་འཛིན་མ་གྲོལ་ཚུལ་འཆོས་ལྔས།།
ཨ་ཁུའི་སྐུ་དང་འགྲོགས་པའི་འགྲོ་དོན་མཚར།།