མདོ་སྨད་ཡངས་པའི་ས་ཡི་ཐིག་ལེ་ན།།
     རེབ་གོང་གསེར་ལྗོངས་སྙན་པའི་གྲགས་པ་འབར།།
     གངས་དཀར་མཁའ་ལ་བསྙེགས་པའི་བྱ་ཁྱུང་རི།།
     རྣམ་དག་འགྲོ་བའི་སེམས་ཀྱི་སྐྱབས་གནས་ཉིད།།
     ལྷུང་ལྷུང་དགུ་ཆུ་སྔོན་མོའི་བཞུར་སྒྲ་དེ།།
     བདག་གི་སེམས་སུ་སྙན་པའི་དབྱངས་ཏུ་ངེས།།
     སྐར་ཚོགས་ས་ལ་མཆེད་པའི་དྲན་པ་བཞིན།།
     རོང་བོ་དགོན་ཆེན་འགྲོ་བའི་རྒྱན་དུ་ཆགས།།
     རེ་འདོད་ཀུན་སྐོང་ཡངས་པའི་གནས་མཆོག་དེ།།
     ང་ཡི་གཅེས་སུ་འོས་པའི་ཕ་ཡུལ་ལགས།།
     དཔྱིད་ཀྱི་དཔལ་མོའི་རླུང་བུ་ལྡང་བ་ན།།
     སོ་ནམ་ཞིང་པ་ཞིང་འདེབས་ལས་ལ་བྲེལ།།
     དབྱར་ཀྱི་ཚ་བས་ཇི་ལྟར་གདུངས་ན་ཡང་།།
     དྲུག་པའི་གླུ་རོལ་ལོ་གསར་ལས་ཀྱང་སྐྱིད།།
     སྟོན་གྱི་འབྲས་བུ་ཁྱིམ་ལ་བསྡུ་བའི་དུས།།
     ཨ་མའི་གདོང་གི་གཉེས་རིས་ལྷག་པར་གསལ།།
     དགུན་གྱི་དུས་འདིར་རྒྱ་སྟག་ལ་སྙམ་ཡང་།།
     བྱིས་པའི་དགོད་སྒྲ་ཆབ་རོམ་ཐོག་ནས་བཞད།།
     རེ་སྒུག་གསར་བར་བསྙེགས་པའི་ལོ་གསར་ནང་།།
     ཀུན་གྱི་སྐུ་ལུས་བདེ་བའི་གཡང་ཞིག་འབོད།།
     སྟོད་ཕྱོགས་ཨ་མྱེས་ལྷ་རིའི་སྒང་ཐོག་ན།།
     རླུང་རྟ་མཁའ་ལ་འཕྱོ་བ་ཨེ་མ་རྨད།།
     རི་ཆུ་སྔོ་ཞིང་མཛེས་པའི་གྲུ་གནས་འདི།།
     ང་རང་འཚར་ལོངས་བྱུང་བའི་ཕ་ཡུལ་ཡིན།།
     ལེ་དབང་སྟོང་གིས་ཆོད་པའི་ཉི་ཟླའི་སར།།
     ཕ་ཡུལ་དྲན་པའི་གདུང་བ་རྩོམ་ལ་བསྐུར།།
     དྲན་པའི་གདུང་བ་ཆང་ལ་བཅོལ་བ་ལས།།
     གང་སྣང་བརྡོལ་བའི་རྩོམ་ལ་བཅོལ་པས་འཚམས།།
     གནམ་ས་འགེངས་པར་བྱེད་པའི་ཤོག་སྦག་སྒྲ།།
     ཐོས་འཛིན་རྣ་ཡི་བུ་གར་བརྒྱུད་པའི་དུས།།
     སེམས་ཀྱི་ཉི་ཟླ་མཛེས་པའི་ཞིང་ལགས་ཀྱང་།།
     ཕ་ཡུལ་རེབ་གོང་སྙིང་གི་དབུས་ནས་དྲན།།
     ཕུར་བུ་རྣམ་རྒྱའི་གཞས་ཚིག་གྲགས་པའི་དུས།།
     ཕ་ཡུལ་དྲན་པའི་མིག་ཆུ་འཆོར་ལ་འཆོར།།
     འཛུམ་པའི་འོད་ཟེར་ཕྱོགས་མེད་འཕྲོས་པའི་དུས།།
     གཡང་ཁྱིམ་གོར་མོའི་ནང་གི་གྲུ་ཟུར་ན།།
     ཕ་མའི་གདོང་ལ་འཛུམས་མདངས་འཁོར་བཞིན་དུ།།
     ཕུ་བོས་གླུ་ཞིག་གཏོང་བའི་ཚུལ་དེ་དྲན།།
     སྙན་མོ་གླུ་ལས་དྲངས་པའི་སྨོན་ཚིག་ཀུན།།
     ཅི་བསམ་ལྷུན་གྱིས་གྲུབ་ན་དགའ་བ་ལ།།
     སེམས་ཀྱི་ཉི་ཟླའི་མཚན་མོའི་མཛེས་ལྗོངས་ནི།།
     ལྷ་ཡུལ་ཞིང་མཆོག་ཡུལ་འདིར་བབས་དང་མཚུངས།།
     འཇོ་སྒེག་བུ་མོ་སྐོར་བྲོ་འཁྲབ་པའི་ཚུལ།།
     ལྷ་མོའི་ཚོགས་རྣམས་གར་དུ་རྩེན་པར་འདོད།།
     མཚན་མོའི་ཟླ་བ་སྐར་མའི་ཚོགས་ན་མཛེས།།
     ང་ཡི་སོར་མོ་གློག་ཀླད་འཕྲུལ་དང་འདྲོགས།།
     འོ་ཇ་ཁམ་རེ་འཐུང་བཞིན་རྩོམ་འབྲི་བ།།
     ང་ཡི་སེམས་སུ་བདེ་སྐྱིད་ཅིག་ཏུ་འདོད།།
     གཞུང་འཇམ་བུ་མོ་ང་ཡི་དྲ་གྲོགས་ཡིན།།
     འཚོ་བའི་གཏམ་གླེང་གནང་ན་ལྷག་ཏུ་སྐྱིད།།
     དྲ་ཐོག་བརྩེ་བ་སྒྱུ་མའི་ལྟད་མོ་བཞིན།།
     བརྩེ་དུང་གླེང་བས་ཕ་ཡུལ་དྲན་པ་བརྗེད།།
     བཅོས་མའི་སེམས་འདི་མདོག་འགྱུར་ད་བྱིད་བཞིན།།
     དྲན་པ་གཅིག་ཏུ་ཕྱོགས་རྒྱུར་དཀའ་བ་ལ།།
     ཤེས་མེད་ཚོར་མེད་དུས་ཚོད་རེ་རེའི་ནང་།།
     དུས་ཀྱི་ལང་ཚོ་འདི་ལྟར་ཕར་ལ་ཆས།།
     མི་ཚེའི་ཆ་ཤས་གཅེས་སུ་འཛིན་འདོད་ན།།
     སྐར་ཆ་རེར་ཡང་རིན་ཆེན་གསེར་ལས་དཀོན།།
     གློ་བུར་ཕ་ཡུལ་དྲན་པའི་འདུན་པ་ཞིག།
     ཚིག་བཅད་ལུས་སུ་བཀོད་ནས་མཇུག་སྒྲིལ་ལོ།།