༼ དཔྱིད་ཀྱི་ཉིན་ཐོ། ༽
     རྩི་ཤིང་སྣ་བརྒྱའི་ཚེ་སྲོག་འཕེལ་ཞིང་རི་བོའི་རྩེ་མོ་སྨུག་པས་བཟུང་། །
     གཙང་པོའི་དར་ཁ་རྨེག་མེད་བཅོམ་སྟེ་གསེར་མིག་ཉ་མོས་འཁྱུག་རྩལ་ངོམ། །
     ཕྱུགས་རྫི་གཞོན་ནུ་སྤྲོ་དགས་བརྟས་ཏེ་སྙན་པའི་རྫི་གླུ་ལྷང་ལྷང་ལེན། །
     ཐུལ་དཀར་འབྲི་མོས་བེའུ་ཆུང་དྲན་པས་དུངས་པའི་ངུར་སྒྲ་ལྷོད་ལྷོད་སྒྲོག །
     ༼ དབྱར་གྱི་ཉིན་ཐོ། ༽
     ལྗོན་པའི་རྩེ་རུ་ཁུ་བྱུག་སྔོན་མོས་སྙན་པའི་གླུ་དབྱངས་ལྷང་ལྷང་ལེན། །
     མེ་ཏོག་ཚལ་ན་ཕྱེ་ལེབ་སྒེག་མོས་མཛེས་པའི་གར་སྟབས་ལྷབ་ལྷུབ་རྩེན། །
     ལྷས་རའི་དབུས་སུ་ན་ཆུང་བུ་མོས་སྒེག་པའི་གོམ་འགྲོས་ལྡེམ་ལྡེམ་སྐྱོད། །
     སྤང་ལྗོངས་དཀྱིལ་ན་སྟག་ཤར་གཞོན་ནུས་རྟ་ཕོའི་བང་ཁ་གླུ་ཡིས་བསྟོད། །
     ༼ སྟོན་གྱི་ཉིན་ཐོ། ༽
     གྲང་རླུང་ངར་མའི་མདུང་རྩེ་རྣོ་བས་ལྷུན་པོའི་ལྭ་བ་སེར་པོར་བསྒྱུར། །
     འབྲུ་རིགས་སྙེ་མ་འབྲས་བུས་གཏམས་པས་ཞིང་པ་རྒན་པོར་སྤྲོ་བ་འཕེལ། །
     རྟ་ནོར་ལུག་གསུམ་ཤ་ཤེད་རྒྱས་པས་རྫི་བོའི་སེམས་པ་དགའ་བས་ཁེངས། །
     མེ་ཏོག་མགོ་ལྕོག་བ་མོས་བཅོམ་པས་སྦྲང་ཆུང་གཞོན་ནུས་སྐྱོ་གླུ་ལེན། །
     ༼ དགུན་གྱི་ཉིན་ཐོ། ༽
     རི་ལུང་ཐང་གསུམ་ཁ་བས་གཡོགས་ཤིང་རྐང་བཞི་ཕྱུགས་ཀྱིས་གྲང་འདར་བྱེད། །
     གཙང་ཆབ་སྔོན་མོ་འཁྱག་པས་བསྡམས་ཤིང་ལྟོ་དཀར་ཉ་མོ་བཙོན་ལ་བཅུག །
     རི་སྤྱང་སྔོན་མོས་བཀྲེས་སྐོམ་མ་བཟོད་རི་གསུམ་རྩེ་ནས་སྨྲེང་གླུ་གྱེར། །
     གངས་དཀར་ལྷུན་པོའི་དབུ་རྩེ་ཨ་སྔོན་ཡངས་པའི་མཁའ་རུ་ཇེ་མཐོར་ཕྱིན། །
     ༼ རྫི་བོའི་ཉིན་ཐོ། ༽
     གཡང་དཀར་ལུག་ཁྱུ་རི་ལ་དེད་ནས་རྒྱུ་སྐར་ས་ལ་འཕོས་པ་བཞིན། །
     གང་སར་བཀྲམ་ནས་ལུག་རྫི་ཕོ་མོས་ལ་གཞས་སྙན་མོ་དབྱངས་ལ་བཀུག །
     ཡིད་སེམས་ཕན་ཚུན་མཉམ་དུ་མཐུན་པས་ལུག་ཁྱུ་གཉིས་ཀ་གཅིག་ཏུ་འདྲེས། །
     རྟ་བདུན་གཞོན་ནུ་ནུབ་ཏུ་བཞུད་ཀྱང་ཕན་ཚུན་སེམས་གཏམ་རྫོགས་པ་མེད། །
     ༼ བྱིས་པའི་ཉིན་ཐོ། ༽
     རྡོ་ཡི་སྡེར་ཁ་ཆ་ཚང་བསྒྲིགས་ཤིང་རྭ་ཅོའི་སྒོ་ཟོག་ལྷས་ལ་བསྡུས། །
     དབྱུག་པའི་རྟ་ཕོས་བང་ཁ་འགྲན་བཞིན་ཡར་མར་ཀུན་ཏུ་བདའ་རེས་བྱས། །
     ཕན་ཚུན་ཁྱོ་ཤུག་ཡིན་པའི་ཟོལ་གྱིས་བཅོས་མའི་བྱིས་པ་བྱམས་ཀྱིས་བསྐྱངས། །
     མཁའ་ཡི་འཇའ་རིས་འཛིན་པར་འདོད་ནས་ལག་རྡང་སྦྲེལ་ཏེ་སྔོན་དུ་རྒྱུག །
     ༼ སྒོ་ཁྱིའི་ཉིན་ཐོ། ༽
     ལྕགས་ཐག་ཨ་ལོང་དགུ་སྒྲིག་སྣེ་ནས་ས་ནག་གད་པར་སྡེར་འབྲད་བྱས། །
     དགུང་གི་སྐར་མ་མིག་ལ་གཟན་པས་དེ་ལ་ཁོ་བོས་ཟུག་སྐད་འབྱིན། །
     མཚན་མོ་ལྷས་རར་སོ་ལྟ་བྱས་ཤིང་རི་སྤྱང་དག་ལ་དམར་འཛིང་བྱེད། །
     ཉིན་མོ་སླེབས་པའི་མགྲོན་པོ་རྣམས་ལ་ཕར་ཚུར་འགྲོ་བའི་སྐྱེལ་བསུ་མཛད། །
     ༼ སྦྲའི་ཉིན་ཐོ། ༽
     ཁ་ཆར་བུ་ཡུག་འཇིགས་པར་རྒོལ་བའི་ས་མཐོའི་སྒང་གི་ཁྱད་ནོར་དེ། །
     ཁ་འཚུབ་དབུས་ནས་དུད་ཞགས་རིང་མོའི་སྤྲིན་དཀར་རྫོང་ལ་སྐས་ཤིག་འཕང་། །
     འཇིག་རྟེན་མི་ལ་བསིལ་དྲོད་སྟེར་བའི་འབྲོག་པའི་གཙུག་གི་ནོར་བུ་མཆོག །
     དུས་དང་བསྐལ་བ་མ་རྫོགས་བར་དུ་ང་ཚོའི་ལོ་རྒྱུས་བརྗོད་བཞིན་མཆིས། །
     ༼ སྲོད་ཁའི་ཉིན་ཐོ། ༽
     རྟ་ལྗང་གཞོན་ནུ་ཆུ་ལྷའི་ཕང་བར་དལ་བ་དལ་བུར་བཞུད་པའི་ཚེ། །
     གངས་དཀར་ལྷུན་པོས་གྲིབ་མའི་ལྭ་བ་ལུས་ལ་མཛེས་པར་བཀླུབས་པ་ན། །
     སྲོད་ཀྱི་མཚམས་སྤྲིན་གཙང་པོའི་ངོགས་སུ་དམར་འོད་རྣམ་པས་ལམ་ལམ་འཕྲོ། །
     འདབ་ཆགས་ཚོགས་ཀྱིས་སྐད་སྙན་སྒྲོག་གིན་རང་རང་གནས་པའི་ཚང་མལ་སྙེག །
     ༼ རྒན་རྒོན་གྱི་ཉིན་ཐོ། ༽
     ནངས་མོ་ལུས་ཟུང་འཁར་བར་བརྟེན་ནས་མ་ཎི་ཁང་གི་ཕྱོགས་སུ་བསྐྱོད། །
     གང་དང་གང་གི་འགྲོ་ལུགས་སྡོད་སྟངས་ངག་ནས་ཟློ་བཞིན་ཉི་མར་ལྡེ། །
     ཕྲེང་བ་རྒྱུན་དུ་འདྲེན་པར་གོམས་པས་ལག་པའི་སེན་མོར་སྟོང་ཁ་བབས། །
     དེང་གི་དུས་ཀྱི་འཕོ་འགྱུར་གླེང་དུས་སོ་སོའོ་སེམས་པ་སོམ་ཉིར་ཚུད། །