ཕ་མས་བརྩེ་བའི་ཕྱག་ཟུང་བརྐྱང་བརྐྱང་སྟེ། །
     　　གཅེས་པའི་ལུས་པོ་རིམ་གྱིས་གཉོམ་ལག་རྒྱས། །
     　　བསླབ་བྱ་དྲོད་དུ་བསྐྱིལ་བ་མི་ཉུང་བས། །
     　　བག་ཡོད་འདབ་བརྒྱ་གྲོལ་བ་སུ་ཡི་དྲིན། །
    
     　　ཕྱི་ཡི་ངོ་གདོང་གཟུགས་ལ་མཛེས་པ་མེད། །
     　　ནང་ན་འཆད་རྩོད་རྩོམ་པའི་ཡོན་ཏན་ཕྲ། །
     　　སློབ་འབྲིང་སློབ་མའི་མིང་བྱང་ཙམ་ཞིག་གིས། །
     　　ཕུ་ནུའི་གཙུག་ཏུ་བཀུར་བ་སུ་ཡི་དྲིན། །
    
     　　ཕ་མའི་བྱམས་བརྩེ་རི་མོ་སྙིང་ལ་བཀོད། །
     　　རྒན་གྱི་བྱིན་རླབས་སེམས་ཀྱི་དྲོད་དུ་བསྐྱིལ། །
     　　ཤེས་རིག་གླིང་གར་འགྲོ་བའི་སྒོ་ཐེམ་རྙེད། །
     　　ད་ལྟ་འདི་ནས་སྡོད་པ་སུ་ཡི་དྲིན། །
    
     　　མཛེས་སྡུག་སུམ་རྩེན་སློབ་རའི་སྐྱེད་ཚལ་ནས། །
     　　བྱམས་བརྩེ་མ་མ་འདྲ་བའི་དགེ་རྒན་དང་། །
     　　འཆད་རྩོམ་ཕྱོགས་ལ་འབད་པའི་གྲོགས་དང་ལྷན། །
     　　ཤེས་བྱ་ལོངས་སུ་སྤྱོད་པ་སུ་ཡི་དྲིན། །
    
     　　ཁོག་ཏུ་གསེར་དངུལ་མང་པོ་བླུག་དང་གཅིག །
     　　རྨོངས་མུན་སེལ་བའི་སྒྲོན་མེ་སྒྲོན་དང་གཉིས། །
     　　མ་འོངས་བདེ་སྐྱིད་འདུན་ལམ་བསྟན་དང་གསུམ། །
     དྲིན་བྱས་དྲིན་དུ་གོ་བ་སུ་ཡི་དྲིན། །