རིན་པོ་ཆེ།
ཁྱེད་ཉིད་འདི་ལྟར་ང་ཚོ་དང་གྱེས་དགོས་བྱུང་ཡང་།
ཁྱེད་ཀྱི་ལྷག་བསམ་གྱིས་བསྐྱེད་པའི་གངས་རི།
གཞར་ཡང་འཇིག་རྟེན་ཐལ་རྡུང་གནོན་པའི་དཔུང་དུ་འགྱིང་།
རིན་པོ་ཆེ།
ཁྱེད་ཉིད་འདི་ལྟར་ང་ཚོ་དང་གྱེས་དགོས་བྱུང་ཡང་།
ཁྱེད་ཀྱི་བརྩེ་སེམས་ཀྱིས་བསྐྱངས་པའི་སྙན་ཚིག་གི་མེ་ཏོག
ཁྱེད་ཉིད་ཐུགས་ལྷོད་དགོངས་དག་གིས་ཕེབས་པར་མཛོད་དང་།
མཚོ་སྔོན་དང་ཀན་སུའུ།ད་དུང་ལྷ་སར།
གླག་རྒོད་ཀྱི་གཤོག་ཟུང་ངོས་སུ་ཁྱེད་ཀྱི་སྙན་ངག་བབས་འདུག་ལ།
མེ་ཏོག་གིས་བརྒྱན་པའི་རྩྭ་ཐང་དུ་ཁྱེད་ཀྱི་གླུ་སྒྲར་འཇགས་པ་མེད་ཅིང་།
དག་གཙང་གི་ལྷ་དར་ལ་ཁྱེད་ཀྱི་བརྩེ་སེམས་ཀུན་ནས་འཁྱིལ་འདུག།
ཁྱེད་ཀྱི་བྱམས་སེམས་ཀྱི་མེ་ལྕེ།
བསྐལ་བའི་མཐར་ཡང་གཟིམས་པའི་གོ་སྐབས་ཕྲ།
ཡི་དམ་ལགས།སྤྱན་གྱིས་ཕྱིར་གཟིགས་མེད་པར་བྱོན་ཅིག་དང་།
ཁྱེད་ཀྱི་གྲོགས་པོ་ཚོས་ཞུས་པ་ནི།
ངེད་ཅག་གི་དྲན་གདུང་སྣོམས་ལ་ཕེབས་ཤིག།
ཀྲུང་གོའི་རྩོམ་རིག་ལོ་རྒྱུས་ཀྱིས་ཀྱང་བཤད་རྒྱུར།
ཁྱེད་ཀྱི་མཚན་སྙན་གཏན་དུ་འཇོག་པར་མཛོད་ཅིག
ཁམས་གསུམ་འཛིན་མའི་ཁྱོན་ལ་ཀུན་ནས་བཞད།
རིན་པོ་ཆེ།
ཁྱེད་ཉིད་འདི་ལྟར་ང་ཚོ་དང་གྱེས་དགོས་བྱུང་ཡང་།
ཁྱེད་ཀྱི་དུངས་ཞེན་གྱིས་བསླངས་པའི་ངག་རིག་མཚོ་མོའི་རླབས་ཕྲེང་།
བསྐལ་བའི་བར་དུ་འཇགས་ཐབས་བྲལ།
རིན་པོ་ཆེ།
ཁྱེད་ཉིད་འདི་ལྟར་ང་ཚོ་དང་གྱེས་དགོས་བྱུང་ཡང་།
ཁྱེད་ཀྱི་སྙིང་སྟོབས་ཀྱིས་སྦར་པའི་རིག་སྒྲོན་མེ།
རྟོགས་སད་ཀྱི་ཕྱིར་དུ་གཞར་ཡང་ལམ་ལམ་འབར།
རིན་པོ་ཆེ།
ཁྱེད་ཉིད་འདི་ལྟར་ང་ཚོ་དང་གྱེས་དགོས་བྱུང་ཡང་།
ཁྱེད་ཀྱིས་རྟག་ཏུ་བསྔགས་པའི་བདེན་དགེ་མཛེས་གསུམ་གྱི་ཉིན་བྱེད།
གངས་རིའི་ལྗོངས་ན་ནམ་ཡང་འོད་སྟོང་འཕྲོ།
ལ་རྒྱའི་དབུ་འཕང་དགུང་དང་མཉམ་པའི།
ཁྱེད་ཉིད་དང་ཁྱེད་ཉིད་ལྟ་བུའི་སྐྱེས་ཆེན་དམ་པ་རྣམས།
ང་ཚོ་དང་གྱེས་ཏེ་སྟོང་ཆེན་དག་པའི་ཞིང་དུ་གཤེགས་པས།
གངས་རིའི་ལྗོངས་ལ་སྐྱོ་གདུང་གི་ན་བུན་གཏིབས།
ཡིན་ནའང་།
ང་ཚོ་ཤུལ་དུ་ལུས་པ་རྣམས་ཀྱིས།
སྐྱོ་གདུང་སྙིང་སྟོབས་སུ་བསྐྱེད་དེ།
བདེན་དོན་གྱི་དཔལ་འབར་གྱེན་དུ་སྒྲེང་བཞིན།
མི་དམངས་ཀྱི་བདེ་སྡུག་སེམས་ལ་ཉར་བཞིན།