དགེ་ཚོགས་བསོད་ནམས་ཟོང་གིས་ལེགས་དྲངས་བའི།།
ཆོལ་གསུམ་སྐྱེ་དགུའི་འདུན་མ་ཡངས་པའི་མཁར།།
ཆོས་སྲིད་སྣང་བ་འདྲེན་པའི་སྐྱ་རེངས་ཤིག།
འཕེལ་འགྲིབ་ཉམས་པ་མེད་པའི་དཔལ་དུ་ཤར།།
 
རྙིང་ཞེན་མཆོག་འཛིན་ལྟ་བའི་མུན་སྦུབས་སུ།།
མྱ་ངན་འཁུན་སྒྲ་འབྱིན་པ་མ་བཟོད་ནས།།
དེང་རབས་རིག་གསར་ལྷ་ཡི་དགའ་ཚལ་དུ།།
སྙེག་པའི་ལམ་སྟོན་སྒྲོན་མེ་ཁྱེད་ཀྱིས་སྦར།།
 
གནའ་རབས་ལོ་རྒྱུས་བདུད་རྩིའི་ཉིང་ཁུ་ལ།།
ལྷ་སྒྲུང་བཅོས་མའི་ལན་ཚྭ་མི་རུང་ཞེས།།
མངོན་སུམ་རིགས་པའི་དཔྱད་པ་མ་ནོར་བ།།
དེབ་དཀར་མེ་ཏོག་ཟླ་བའི་གདོང་ལ་བཀོད།།
 
འདོད་ཡོན་སྒྱུ་མའི་རོ་ལ་མ་ཆགས་ཤིང་།།
གཅེས་སྲོག་འཕྲོག་པའི་ཉེན་ལ་མི་འཇིགས་པར།།
རྟོགས་སད་བློ་སྤོབས་མངའ་བའི་བརྡ་ཐབས་སུ།།
གཏམ་རྒྱུད་གསེར་གྱི་ཐང་མ་གནས་འདིར་བཀྲམས།།
 
སྐད་གཉིས་སྨྲ་བའི་ལོ་པཎ་མཐའ་དག་གི།
གསུང་རབ་ནམ་མཁའི་མཛོད་ལས་མ་རེག་པའི།།
ལེགས་བཤད་རིན་ཐང་བྲལ་བའི་ནོར་བུ་སྟེ།།
ཆོས་ཀྱི་ཚིགས་སུ་བཅད་པའི་འགྱུར་ཡང་བརྩམས།།
 
མཐར་ཐུག་དབུ་མའི་ལྟ་བ་རྨེག་མེད་དུ།།
དཔྱད་གསུམ་དག་པས་གཏན་ལ་དབབ་པའི་ཕྱིར།།
རྩོད་གཞིའི་ཆོས་ཅན་གསོན་པོ་འདིའོ་ཞེས།།
ཀླུ་སྒྲུབ་དགོངས་པའི་རྒྱན་ཆ་མགུལ་དུ་སྒྲོན།།
 
སྐད་ཅིག་ཡིད་ཀྱི་དྭངས་མ་འཕྲོག་བྱེད་པའི།།
སྙན་ངག་ཚིག་སྦྱོར་སྤེལ་མའི་རྣམ་འགྱུར་གྱིས།།
གང་ལྗོངས་རྩོམ་རྩལ་རིག་པའི་དགའ་ཚལ་དུ།།
ཟློས་གར་མེ་ཏོག་སྣ་བརྒྱའི་བཀྲག་མདངས་བསྣན།།
 
དགའ་སྡུག་ཡིད་འགྱུར་མཚོན་པའི་སྙིང་གཏམ་ལ།།
ཐུན་མིན་བློ་རིག་རྩལ་གྱིས་ངར་བྱིན་ཏེ།།
དགེ་སྡིག་བཟང་ངན་སྟོང་གི་སྡོམ་ཚིག་ནི།།
སྙན་འཇེབས་ངག་གི་རྟ་ལ་ཐོར་བུར་དྲངས།།
 
འོན་ཀྱང་ལྷག་བསམ་གསེར་གྱི་རིན་ཐང་གིས།།
རང་རིགས་སྟོབས་འབྱོར་སྤེལ་བའི་མཐའ་འབྲས་སུ།།
ཤ་དང་རུས་བར་གཟན་པའི་ལྕགས་སྒྲོག་དང་།།
མ་ཤི་དམྱལ་བར་འགྲིམ་པའི་མནར་གཅོད་ཐོབ།།
 
ད་དུང་རྩུབ་མོའི་ཚིག་གི་མེ་ཆར་གྱིས།།
ཁྱེད་རང་བདེ་བར་གཟིམ་པའི་གོ་སྐབས་འཕྲོག།
ཀྱེ་ཧུད་གདོང་དམར་སྲིན་པོའི་གནས་འདི་ན།།
ལེགས་ཉེས་བླང་དོར་འབྱེད་པའི་བློ་མིག་ལྡོངས།།