དོ་ནུབ་ང་ཆུང་མའི་གམ་དུ་ཡོད།
ངའི་འཚོ་བ་ལ་དྲོད་ཁོལ་སྟེར་བའི་ཆུང་མའི་གམ་དུ་ཡོད།
ང་ཆུང་མའི་གམ་ན་ཡོད་དུས།
རྒྱང་རིང་གི་གྲོང་ཁྱེར་དྲན་ཆོག་ལ།
གྲོང་ཁྱེར་གྱི་གློག་སྒྲོན་དང་འཚོ་བའང་དྲན་ཆོག
ཡིན་ན་ཡང་།  
གནས་འདི་རུ།  གློག་སྔར་ནས་ཆད་འདུག
ཆུང་མས་འབྲི་ཞོ་གད་པ་འདྲ་ཞིག་གི་སྟེང་ན།
ཕྱེ་མ་ཀ་ར་གངས་འདྲ་ཞིག་སྤུངས་ནས།
ཞི་ལྷོད་དང་འཛུམ་གྱིས་ང་ལ་དྲངས་བྱུང་།
ཡིན་ནའང་།གྲོང་ཁྱེར་ན།
འདི་ལྟ་བུ་འབྲི་ཞོ་ཞིམ་པོ་ཞིག   
གཏན་ནས་ཡོད་མི་སྲིད།
རེས་མོག་རེས་གསལ་གྱི་ཟླ་འོད་འོག་ཏུ།
ཆུང་མས་མལ་ས་གྲུ་བཞི་ནས།
ཧ་ཅང་ཡིད་ཚིམས་གྱིས།
ངའི་བྲང་གཞུང་དུ་མགོ་བོ་བསྙེས་ནས།
སྔུར་བ་རིང་མོ་ཞིག་དང་མཉམ་དུ་བདེ་བར་གཉིད་སོང་། 
ཁོ་མོའི་རྨི་ལམ་དུ་བྱིས་པ་ཚོའི་མ་འོངས་པ་ཡོད་དམ།
ཡང་ན།   དབྱངས་ཅན་ལྷ་མོའི་སྐྱེས་སྟོབས་དང་།
ནར་སོན་པའི་སེམས་ཁུར་ཡོད།