ས་ཡི་གོ་ལའི་ཕྱོགས་སོ་སོ་ན་བཞུགས་པའི་བོད་རིགས་སྤུན་ཟླ་ཡོངས་དང་། གཞན་ཡང་ཁོ་བོ་དང་འབྲེལ་ཡོད་ཀྱི་རྒྱལ་ཕྱི་ནང་གི་གྲོགས་པོ་ལྷན་རྒྱས་རྣམ་པར་བོད་མེ་སྤྲེལ་གནམ་ལོ་གསར་ཚེས་ལ་སྐུ་གཟུགས་བདེ་ཐང་དང་། མཛད་ཕྲིན་ལེགས་རྒྱས། ཅི་བསམ་དོན་འགྲུབ། དུས་དང་རྣམ་པར་ཀུན་ཏུ་བདེ་སྐྱིད་རྫོགས་ལྡན་གསར་པའི་དཔལ་ལ་སྤྱོད་པའི་སྨོན་འདུན་ཞུ། །
　　མགུར་ལྷ་བཅུ་གསུམ་གངས་ཅན་མེས་པོའི་ལྷ། །
　　མདོ་དབུས་ཁམས་གསུམ་མེས་པོ་གཅིག་གི་རྒྱུད། །
　　བོད་ཁམས་ཡོངས་ལ་གནམ་ལོ་གསར་པ་ཤར། །
　　སྤུན་ཟླ་ཡོངས་ལ་བཀྲ་ཤིས་བདེ་ལེགས་ཞུ། །
　　ཚེ་འདིའི་ལམ་ལ་མེད་མི་རུང་བའི་གྲོགས། །
　　ལུས་སྐྱེད་ཕ་མ་ལམ་སྟོན་དགེ་རྒན་དང་། །
　　སྨན་པ་སྨན་གཡོག་གཉེན་ཉེ་སྤུན་ཟླ་རྣམས། །
　　ཚེ་རིང་ནད་མེད་བདེ་སྐྱིད་དཔལ་ལ་སྤྱོད། །
　　རྫུན་ལ་འཐབ་ཅིང་བདེན་པའི་ལམ་སྟོན་མཁན། །
　　ཁྲིམས་རྩོད་པ་དང་ཁྲིམས་སྲིད་ལས་བྱེད་དང་། །
　　གསར་འགྱུར་མོལ་སྟེགས་རྒྱ་ཆེན་མང་ཚོགས་རྣམས། །
　　དམངས་གཙོའི་རང་དབང་དཔལ་ལ་སྤྱོད་པར་ཤོག །
　　རྒྱལ་སྲིད་བརྟན་སྲུང་སྤྱི་ཚོགས་བདེ་སྲུང་པ། །
　　རྒྱལ་སྲུང་དམག་དཔུང་དྲག་ཆས་ཉེན་རྟོག་དང་། །
　　སྤྱི་བདེའི་མི་སྣ་བདེ་སྲུང་ལས་རིགས་རྣམས། །
　　དགྲ་འདུལ་གཉེན་སྐྱོང་ལས་བཞི་ལྷུན་འགྲུབ་ཤོག །
　　རྒན་གཞོན་ཀུན་ལ་སྤྲོ་བའི་དཔལ་སྦྱིན་པའི། །
　　ཀུ་རེ་མཁན་པོ་རྩོད་གླེང་གད་སློང་པ། །
　　ཟློས་གར་མཁན་དང་སྙན་འཇེབས་གླུ་པ་རྣམས། །
　　བདེ་སྐྱིད་སྣང་བ་རྒྱུན་མི་ཆད་པར་ཤོག །
　　དབུལ་ཕོངས་སེལ་ཞིང་ནོར་གྱི་གཏེར་འཇོ་བ། །
　　དངུལ་མཛོད་ཁང་དང་ནོར་སྲིད་ཞབས་ཞུས་པ། །
　　ཚོང་ལས་དོན་གཉེར་ཁེ་ལས་ཆེ་ཆུང་རྣམས། །
　　གསེར་དངུལ་ལོངས་སྤྱོད་ཆར་ལྟར་འབབ་པར་ཤོག །
　   སྡེ་འབངས་ཡོངས་ཀྱི་ལུས་སེམས་དབང་སྒྱུར་བའི། །
　　སྤྲུལ་པའི་སྐུ་དང་དཔོན་རིགས་ཆེ་ཆུང་ཀུན། །
　　རྙིང་མའི་མཁན་ཆེན་གསར་མའི་དགེ་བཤེས་རྣམས། །
　　འདོད་ཡོན་རྣམ་ལྔ་རྒྱུན་མི་ཆད་པར་ཤོག །
　　མདོར་ན་གདོང་དམར་བོད་ཀྱི་རིགས་གྱུར་པའི། །
　　མཁས་པའི་དབང་པོ་བཙུན་པའི་གྲྭ་ཆུང་རིགས། །
　　མཐོན་པོའི་དཔོན་ནས་དམའ་བའི་ཞབས་ཞུ་པ། །
　　ལས་རིགས་ཀུན་ལ་བཀྲ་ཤིས་བདེ་ལེགས་ཞུ། །
ཞེས་བོད་འབངས་ཡོངས་ལ་མེ་སྤྲེལ་གནམ་ལོ་གསར་ཚེས་ཀྱི་སྨོན་ཚིག་འདི་ནི་མི་ཚེ་ས་འཐར་འཁྱམས་བའི་རྒྱལ་ཁམས་པ་ཐུབ་བསྟན་ཕུན་ཚོགས་དེས། རྒྱ་ནག་པེ་ཅིང་གྲོང་གི་ཀྲུང་དབྱང་མི་རིགས་སློབ་གྲྭ་ཆེན་མོའི་རང་ཤག་ནས་སྤྲིངས། །