ཁ་ཐག་ཉེ་བའི་ནམ་མཁའ།

རོ་ནག་པོ། 2016-01-07

　　ནམ་མཁའི་ངོ་གདོང་ན་རྨ་ཁ་ཞིག་འདུག་པ་མཐོང་བྱུང་ངམ

　　ལོ་ཟླའི་སྒྱོགས་ཆེན་གྱིས་བཤགས་པའི་རྨ་ཁ་ཞིག་རེད

　　སྐེ་ཁྲག་བཞིབས་འདྲའི་མུན་པའི་སྟོང་དབྱིངས་སུ

　　ང་ཁོ་ནས་ནམ་མཁའི་མིང་ནས་ཡང་ཡང་བོས་མཐར

　　ན་ཟུག་ཡིན་པའི་ཁྲག་གི་ཐིགས་པ་རེ་རེ

　　སུ་ཡི་མིག་ཆུ་བཞིན་སྙིང་གི་མཐིལ་ངོས་ནས་འཕྱུར་ཏེ་ཡོང

　　མིག་གིས་མ་བལྟ ད་ནི་ལག་པས་ཀྱང་མ་རེག

　　ཚེ་སྲོག་གི་དར་ཐག་རིང་མོའི་འཇིགས་པ་དེ་གང་ལ་བརྒྱུས་འོས

　　ལོ་ཟླར་བསྐྱར་གསོན་གྱི་གོ་སྐབས་ཤིག་ཡོད་ན

　　ཁོ་ལག་རྫོགས་པའི་གཡུ་ཡི་མེ་ལོང་འདིའི་ནང་རོལ་དུ

　　ང་ཚོས་རང་ཉིད་ཀྱི་ཡིད་སེམས་གཙང་མར་བཀྲུ་ཆོག

　　བསང་གི་གཏང་རག ཡིག་འབྲུའི་འཁུན་སྒྲ

　　ང་ལ་ད་དུང་ཅི་ཞིག་རྙེད་འདོད་ཀྱི་རེ་བ་ཧ་ཅང་ཆེ

　　དོ་ནུབ་སྨག་གི་ལྐོག་གྱུར་གྱི་སྲུབས་ནས

　　ནམ་མཁའ་འདིས་ང་ལ་གསང་བ་ཞིག་འཆད་སྲིད་དམ