ང་ལ་མཚོན་ན།

སྙན་ངག་ནི།

རང་ཉིད་ངོ་ལ་བལྟ་སའི་མེ་ལོང་དང་།

ནང་སེམས་འཁྱག་དུས།

རྣམ་ཤེས་སྲོ་སའི་མེ་ཕུང་དང་།

སྨེང་བ་འཐིབ་དུས།

ཁེར་ལབ་བྱེད་སའི་སྡོད་ཁང་ཡིན།

དེ་བས་ང་ཡི་འཚོ་བའི་ཕྱི་ནང་དུ།

སྙན་ངག་ཡོད་པས།

རྨི་ལམ་འཐོར་ཞིག་ཏུ་གྱུར་བའི་ང་ཡི།

སྒྱུ་མའི་རི་དྭགས་ཀྱི་གཤར་ལམ་ངོགས་ནས།

རྣམ་ཤེས་ཀྱི་ཕྱི་ནང་གཉིས་སུ་གངས་རི་དང་།

རྩྭ་ཐང་གི་རི་མོ་བྲིས་ཏེ་རང་ཉིད་ལ་བཤམ་ཆོག།

ང་ལ་མཚོན་ན།

སྙན་ངག་ནི།

ཆོས་ཉིད་རྣལ་མར་བལྟ་སའི་ཡུལ་ལྗོངས་དང་།

སུ་ལའང་ཡིད་མི་ཆེས་དུས།

རྫུན་བཤད་མི་ཤེས་པའི་ནང་གྲོགས་དང་།

ཕྱི་ནང་མི་མཚུངས་པའི་འཇིག་རྟེན་ནས་

གསང་བ་བཤད་སའི་སྙིང་ཉེ་ཡིན།

དེ་བས་ང་ཡི་རྣམ་ཤེས་སྙན་ངག་གི་སྡོང་འགོར་

བབས་ཡོད།

ང་ཡི་རྨི་ལམ་སྙན་ངག་གི་སྡོང་འགོར་བཞད་ཡོད།

ང་ཡི་འཆི་བའང་སྙན་ངག་གི་དུར་ཁྲོད་དུ་སྦས་ཡོད།

ང་ལ་མཚོན་ན།

སྙན་ངག་ནི།

གྲོགས་པོ་ཟེར་བཞིན་ལྐོག་ནས་བསླུ་བའི་ངོ་

ཤེས་དེ་མིན།

ཟུར་ནས་ངོ་བསྟོད་དང་།

རྒྱང་ནས་ངན་སྨྲས་བྱེད་པའི་རོགས་པ་དེའང་མིན།

ནང་སེམས་སུ་དགུན་ཟླ་ཚེས་དུས་ཉི་མ་བཞིན་

སྲོ་ཆོག་སའི་མེ་ཕུང་དམར་པོ་དེ་ཡིན།