དྲང་སྲོང་རྒན་པོའི་སྐྱེས་རབས་མཚོ་བྱུང་ལྷ་མོའི་དོ་ཤལ།

སྤང་རྟོཊ་ཕུན་ཚོགས་མངའ་བའི་བསོད་ནམས་ལས་འཁྲུངས་པའི།།

གྲངས་མེད་དཀའ་སྤྱད་བསགས་པའི་མཁའ་མཉམ་གྱི་འཕགས་མཆོག།

མི་འབྱེད་ཞིང་གི་གཙུག་རྒྱན་ཟས་གཙང་གི་སྲས་པོ།།

ཡེ་ཤེས་ཚོགས་གཉིས་རྫོགས་པའི་གོའུ་ཏམ་ལ་ན་མོ།།

ཀུན་རྟོག་རྣམ་པར་བཀྲ་བའི་མཚོ་བྱུང་གི་ལྷ་མོས།།

བུང་བའི་དགའ་སྟོན་འགྱེད་པའི་དྲང་སྲོང་གི་སྐྱེས་རབས།།

ཐུགས་རྗེའི་བྱིན་རླབས་འཁྲིགས་པའི་ཟླ་བྲལ་གྱི་སྤོབས་པ།།

སྙན་འཇེབས་ངག་གི་དབང་ཕྱུག་བདག་རྒྱུད་ལ་ཕོབ་ཅིག།

གངས་རིའི་ལྗོངས་སུ་རྩེན་པའི་གདོད་མ་ཡི་སངས་རྒྱས།།

ངེད་ཅག་ལྟོས་བཅས་སློབ་བུའི་ཉ་གང་གི་ཟླ་བ།།

སྐུ་ཡི་མཚན་དཔེའི་ཉི་མ་དབུས་རི་ནས་བལྟམས་པ།།

ཀ་དག་ཆོས་སྐུ་བླ་མའི་འཛུམ་ཞལ་དེ་དྲན་བྱུང་།།

དམིགས་བཅས་བསོན་ནམས་ཚོགས་ཀྱི་ཕ་རོལ་ཏུ་ཕྱིན་པའི།།

དག་དང་མ་དག་འགྲོ་བའི་གཞན་དོན་ལ་ངལ་བའི།།

འཕྲིན་ལས་སྣང་བའི་འོད་དཀར་མདོ་སྨད་དུ་རྒྱས་པ།།

འོད་གསལ་ལོངས་སྐུ་བླ་མའི་དགྱེས་ཞལ་དེ་དྲན་བྱུང་།།

ཐུགས་རྗེ་འགག་པ་མེད་པ་ཡེ་ཤེས་ཀྱི་རོལ་རྩལ།།

ཐུབ་པའི་བསྟན་པ་རིན་ཆེན་སྲོག་ལྟར་དུ་གཅེས་པའི།།

གནས་ལུགས་མདོ་དོན་སྙིང་པོའི་རྒྱལ་ས་དུ་སྙེག་པའི།།

རང་བཞིན་སྤྲུལ་སྐུ་རྫོགས་ཆེན་ཨ་ཏི་པ་དྲན་བྱུང་།།

དབོན་གནས་འཆི་མེད་ཚལ་དང་མཁའ་དཔྱོད་ཀྱི་གནས་སུ།།

ཀ་དག་རྫོགས་པ་ཆེན་པའི་མན་ངག་གི་ཁྲིད་སྦྱངས།།

རང་ཤར་རང་གྲོལ་ལྷུན་གྲུབ་ཡོན་ཏན་ཀུན་རྫོགས་པའི།།

ཁྲག་འཐུང་གཟི་རྗིད་ཁྱེད་འདྲ་སྙིང་ཁོང་ནས་དྲན་བྱུང་།།

གཞི་དབྱིངས་སྤྲོས་དང་བྲལ་བའི་ཡང་ཟབ་ཀྱི་དགོངས་དོན།།

སྨིན་གྲོལ་ཆོས་ཀྱི་བདུད་རྩི་ཅི་དགར་དུ་ནོད་པའི།།

སྐྱབས་ཅིག་ཁྱབ་བདག་མགོན་པོའི་མཛད་པ་རེ་དྲན་ཞིང་།།

རེ་དོགས་མཐའ་ལས་གྲོལ་བའི་དད་སེམས་ཞིག་བརྩེགས་ཡོད།།