གཞི་ཚང་ཟླ་བ་གྲགས་པ། 2021-12-20
ཚེ་རབས་བསོད་ནམས་བཟོ་བའི་ལག་རྩལ་ལས།།
གཏན་བདེའི་དགའ་སྟོན་རོལ་བའི་སྐབས་མེད་ཀྱང་།།
ཕ་མའི་དྲོད་ཁོལ་སྒོ་གསུམ་ཁྱབ་པ་ཡིས།།
སྲིད་པར་འཁྱམས་ཀྱང་འགྱོད་གདུང་མི་འདུག་ཨང་།།
སེམས་ཀྱི་ཡུམ་ཆེན་ཕྱི་མར་འགྲིམ་གྱུར་པས།།
མི་སྡུག་དགའ་མཁན་ཡིད་ཅན་སུ་ཞིག་མཆིས།།
དཀའ་སྡུག་འབད་པས་བསྐྲུན་པའི་དགེ་བའི་ཆ།།
ཨ་མར་འབྱོར་ན་ཟུར་ཙམ་བདེ་བ་ལ།།
ལོ་ཟླ་ཞག་དུས་འགོག་ཐབས་མེད་པ་རུ།།
དབང་མེད་བཞུད་ཚེ་དགའ་བདེ་བྲལ་བ་སྟེ།།
དབུ་ལ་སྐྲ་དཀར་འཛིངས་པའི་དྲིན་ཆེན་ཕ།།
གཞན་ཡུལ་ཤོར་བར་བུ་ཆུང་སེམས་ཚེགས་ཆེ།།
དྲིན་གྱི་ཕ་མ་གནམ་གྱི་ཉི་ཟླ་བཞིན།།
འཇིག་རྟེན་དཀར་འོད་སྐྲུན་པའི་བླ་མ་ལགས།།
ཉི་འོད་མི་དྲོ་ཟླ་འོད་མི་གསལ་བའི།།
གནམ་སྟོང་མཚན་མོར་དྭ་ཕྲུག་ག་ཚོད་སྨྱོ།།
དམ་ཚིག་བུམ་ཆུ་འཁྱིལ་བའི་ཤེལ་བུམ་འདི།།
གས་ཆག་མི་ཤོར་གཅེས་སྐྱོང་བྱ་འདང་ཡོད།།
རྣམ་ཀུན་གྲང་འཁྱག་མེད་པའི་གོས་དམར་འདི།།
གཡུགས་ཏེ་སྐྱ་ནག་ཤམ་ལྭ་མི་གསོལ་ཨང་།།
ཐོག་མར་ཕ་མས་གནང་བའི་དལ་རྟེན་འདི།།
མཐའ་མར་ཕ་མའི་ཕྱོགས་ལ་འབུལ་སྙིང་འདོད།།
དཔག་མེད་དྲིན་ལན་ཁེབས་པའི་ལས་དཀའ་ཡང་།།
དགའ་ཞིང་མགུ་ཐབས་བྱེད་པར་བུ་ཆུང་སྤྲོ།།
ཨ་ཕའི་ཚེ་སྲོག་འགལ་རྐྱེན་མི་འབྱུང་བ།།
གཡུང་དྲུང་ཚེ་ཡི་ལྷ་ཡིས་སྲུང་བར་ཤོག།
ཨ་ཕའི་སྐུ་ལུས་ནད་ཀྱིས་མི་ཐེབས་པ།།
སངས་རྒྱས་སྨན་གྱི་ལྷ་ཡིས་སྐྱོབ་པར་ཤོག།
ཨ་ཕའི་གཏན་གྱི་འདུན་མའི་གཅེས་ནོར་ཀུན།།
བར་ཆད་ཇག་རྐུན་དབང་དུ་མི་ཤོར་བ།།
དགེ་ལེགས་ས་ཁྱི་རྒྱ་བོས་སྒོ་བསྲུངས་ནས།།
དུས་ཀུན་དགའ་བདེ་རྒྱས་པའི་བཀྲ་ཤིས་ཤོག།
རྩོམ་གསར། 10