ཞེ་རུ་ལྷུང་བའི་རྟ་ཕོ་ཁམ་པ་དེ།།

ཡིད་ཀྱི་ཕ་ཡུལ་ཚེས་པ་ཡིན་ཚོད་རེད།།

འཚེར་སྐད་ལྷང་ལྷང་ཡིད་གཞུང་འབབ་པ་གན།།

མཛའ་གཞས་སྙན་པའི་རོལ་མོ་དུང་བ་ཡིན།།

རྨིག་བཞིའི་རྡུལ་གྱིས་འཆར་སྣང་ལྡེ་གུ་རྩེན།།

ལས་ཀྱི་རྒྱང་རིང་ངལ་དུབ་མེད་པར་མངོན།།

རྣ་གཤོག་བརྩེངས་ནས་དབྱངས་ལ་ཉན་ཚུལ་དེས།།

དྲན་པའི་མཛའ་གཞས་ཞེ་ནས་བཏང་ཚོད་རེད།།

མིག་ཟུང་གོར་ཞིང་དཀར་ནག་འཛོམས་པ་དེ།།

སྣང་བའི་དྲན་པ་གཅིག་ཏུ་འདྲེས་པ་ཚོར།།

རྔོག་མ་རླུང་གིས་ཤོད་པའི་ངང་ཚུལ་ལ།།

ལས་ཀྱི་ཞེ་མཐུན་དྲན་པའི་འཆར་བརྙན་ཡག།

བྱང་ཁོག་ཕྲ་ལ་མཉེན་ལྕུག་ལྡེམ་པའི་ཚུལ།།

ལས་ཀྱི་བསྐོས་ཐེངས་འཛོམས་པ་ཡག་མོ་ཡིན།།

སྐེ་ལ་སྲུང་མདུད་ལྗང་ཁུ་བཏགས་པ་དེ།།

ལས་ཀྱི་མི་དེ་བདམས་པའི་ཐམ་ག་ཡིན།།

སྲབ་དེ་རྩིད་སྐུད་དྲན་པས་བསླད་པ་འདི།།

འཚོ་གཞིས་བརྟན་ཅིང་ཞེ་ཁམས་འགྲིག་པའི་བརྡ།།

སྲབ་མདའ་སྡོམ་གྱི་རྒྱན་གྱིས་སྤུད་པ་གན།།

དཔལ་དང་ཤིས་པ་ཡག་པའི་རྟེན་འབྲེལ་མཚོན།།

སྲབ་མདའ་ཨ་ལུང་ཆབ་མས་མདུད་པའི་ཚུལ།།

ནང་གི་ལས་དབང་ཕན་ཚུན་དགུ་མདུད་ཡིན།།

སྒ་ལ་ཕྲ་རྒྱན་སྒྲོ་གུ་བསྣན་པ་འདི།།

ལས་ཀྱི་འཚོ་གཞིས་ཕྱྭ་གཡང་འཁོར་ཚུལ་ཡིན།།

གདན་ལ་གཡུ་འབྲུག་ཁ་སྤྲོད་ཡིན་པ་དེ།།

ཞེ་ཡི་འདང་བརྩེ་གཡུང་དྲུང་འཁྱིལ་ལུགས་རེད།།

སྒྲོག་གིས་མ་བཅིངས་རྒྱ་ཡན་བཏང་བ་འདི།།

ཡུལ་གྱི་རང་དབང་མཚོན་པའི་དན་དཔང་དངོས།།

གངས་ཆབ་བཏུང་ཞིང་རྩྭ་ཐང་འཚོ་བ་དེ།།

གཞིས་ཀྱི་ནང་སྲོལ་མ་ཉམས་དགེ་མཚན་བཀྲ།