ཟླ་11ཚེས་16ཉིན། གསར་འགོད་པར་མཚོ་སྔོན་ཞིང་ཆེན་མཚོ་ཤར་གྲོང་ཁྱེར་སྤྱི་བདེ་ཅུས་ནས་ཤེས་རྟོགས་བྱུང་གསལ། མཚོ་ཤར་གྲོང་ཁྱེར་ཕིང་ཨན་ཆུས་སྤྱི་བདེ་ཅུས་ཀྱིས་གསེར་ཚོང་ཁང་ཞིག་གི་རྐུ་ཤོར་བའི་གྱོད་གཞི་ཚབས་ཆེན་ཞིག་རྩད་ཆོད་ནས་ཉེས་གསོག་དོགས་ཅན་ལིའུ་ཆེ་གེ་མོ་(ཕོ། ལོ་37 མཚོ་སྔོན་ཞིང་ཆེན་མཚོ་ཤར་གྲོང་ཁྱེར་ཕིང་ཨན་ཆུས་ཀྱི་མི)འཛིན་བཟུང་བྱས་པ་དང་། རྐུ་མ་ཤོར་བའི་གསེར་གྱི་རྒྱན་ཆ་694ཚང་མ་ཚུར་བླངས་ཐུབ་འདུག 
   ཚེས་14ཉིན་གྱི་ཆུ་ཚོད་9པ་ཡོལ་ཙམ་ལ། མཚོ་ཤར་གྲོང་ཁྱེར་བདེ་འཇགས་ཁུལ་སྤྱི་བདེ་ཅུས་110བཀོད་འདོམས་ལྟེ་གནས་ལ་མང་ཚོགས་ཀྱི་ཉེན་བརྡ་འབྱོར་བ་དང་ཁོངས་གཏོགས་ཁུལ་གྱི་གསེར་གྱི་ཚོང་ཁང་ཞིག་གི་གསེར་གྱི་རྒྱན་ཆ་འབོར་ཆེན་རྐུ་ཤོར་ཡོད་པ་རེད། ཉེན་བརྡ་འབྱོར་རྗེས། ཕིང་ཨན་ཆུས་སྤྱི་བདེ་ཅུས་ཀྱིས་གྱོད་གཞི་ཆེ་གྲས་དང་གནད་ཆེའི་གྱོད་གཞི་མྱུར་འཚོལ་མྱུར་གཅོད་ཀྱི་ལམ་སྲོལ་འཕྲལ་མར་ལག་ལེན་བསྟར་ཞིང་། མཚོ་ཤར་གྲོང་ཁྱེར་སྤྱི་བདེ་ཅུས་ཀྱིས་གྲོང་ཁྱེར་དང་ཆུས་རིམ་པ་གཉིས་ཀྱི་འཇོན་ཐང་ལྡན་པའི་སྟོབས་ཤུགས་སྒྲིག་བཀོད་བྱས་ནས“11.14”ཀྱི་གསེར་གྱི་གྱོད་གཞི་ཚབས་ཆེན་གྱི་མཉམ་འབྲེལ་ཆེད་དོན་ཚོ་ཆུང་བཙུགས་པ་མ་ཟད། ལས་དོན་ཚོ་ཆུང་7སྒྲིག་འཛུགས་བྱས་ནས་གྱོད་གཞི་དེར་བརྟག་དཔྱད་བྱས་པ་རེད། 
   ཕྱོགས་མང་པོའི་འབད་བརྩོན་འོག་དབྱེ་ཞིབ་ཞིབ་འཇུག་དང་བརྟག་དཔྱད་བྱས་པ་དང་། མྱུལ་ཞིབ་ཀྱི་བྱེད་ཐབས་སྣ་ཚོགས་ཕྱོགས་བསྡུས་ཐོག་སྤྱད་པ་བརྒྱུད། གྱོད་གཅོད་མི་དམངས་ཉེན་རྟོག་པས་བྱས་ཉེས་བསགས་མྱོང་བའི་ལིའུ་ཆེ་གེ་མོ་རྐུན་མ་ཡིན་པར་གཏན་འཁེལ་བྱས་པ་རེད། ཚེས་15ཉིན་གྱི་ཐོ་རེངས་ཆུ་ཚོད་1ཙམ་ལ། གཅིག་གྱུར་གྱི་བཀོད་འདོམས་འོག་ཆེད་དོན་ཚོ་ཆུང་གིས་འཛིན་བཟུང་འཆར་གཞི་ཞིབ་ཚགས་བཟོས་ནས་གོ་སྐབས་དམ་བཟུང་བྱས་ནས། ཁྱིམ་དུ་གབ་པའི་ཉེས་གསོག་དོགས་ཅན་ལིའུ་ཆེ་གེ་མོ་འཛིན་བཟུང་བྱས་པ་མ་ཟད། ད་དུང་དེའི་སྡོད་གནས་ནས་བརྐུས་ཟོག་གསེར་གྱི་རྒྱན་ཆ་694ཞིབ་བཤེར་བྱུང་བ་རེད། གནོད་འཚེ་ཕོག་མཁན་དང་ཞིབ་བསྡུར་བྱས་ནས་རྩིས་བརྒྱབ་པ་བརྒྱུད། བརྐུས་ཤོར་བའི་གསེར་གྱི་རྒྱན་ཆ་རིན་ཐང་སྒོར་ཁྲི་400ལྷག་ཙམ་ཟིན་གྱི་ཡོད་པ་རེད། འདྲི་ཞིབ་བྱས་པ་བརྒྱུད། ཉེས་བསགས་དོགས་གཞི་ཡོད་པའི་ལིའུ་ཆེ་གེ་མོས་གསེར་ཚོང་ཁང་ལ་རྐུ་མ་བརྒྱབ་པའི་ཉེས་བསགས་དོན་དངོས་སྦ་གསང་མེད་པར་ངོས་ལེན་ཞུས་པ་རེད།