ཀ་གདུང་ལམ་མདོ་ཞིག་ན་ལག་ཟུང་འཁྱུད་པའི།།

ཁ་ཡ་ན་ཟླའི་གྲས་ཀྱི་ཕོ་གཞོན་མོ་གཞོན།།

ག་ལེར་འཁོར་བའི་རང་མཚང་སེམས་ངོར་འཕྲོད་དུས།།

ང་ཡི་གཏམ་འདི་ཨ་རག་རྒོད་པོ་ཡིན་འགྲོ།།

ཅ་དག་སྤུས་ཀ་མཐོ་བའི་ལྭ་བ་གྱོན་ཏེ།།

ཆ་ལུགས་ཚོད་འཇོག་དཀའ་བའི་རྣམ་འགྱུར་འཆང་ན།།

ཇ་ཁ་ཆང་ཁ་འགྲིམས་ནས་བརྩེ་ཆང་འཐུང་ཞོར།།

ཉ་ལྟར་ལང་ཚོའི་གཤོག་པ་འཐོར་དུ་མ་འཇུག།

ཏ་ཀུ་ལག་ཏུ་འཛིན་དགོས་སྣང་བ་ཅི་ཤར།།

ཐ་མག་བརྔུབས་ནས་གཞོན་པའི་མི་ཚེ་བརླག་འདུག།

ད་ལྟ་དུས་ཀྱི་མཁོ་གལ་སེམས་ནས་བོར་ན།།

ན་ཚོད་གཞོན་པའི་དུས་འདིར་དམིགས་འབེན་འཆོལ་འགྲོ།།

པ་སངས་ལྟར་དཀར་ལྷག་བསམ་གཡུང་དྲུང་རི་མོ།།

ཕ་གཅིག་དམ་པའི་ཞལ་བརྡ་སྙིང་ལ་བཞག་ནས།།

བ་ལྟར་རྨོངས་པའི་ལེ་ལོ་རིང་དུ་སྤངས་ཏེ།།

མ་འོངས་ཤེས་འཇོན་ལམ་བུའི་འབབ་ཚིགས་ཟིན་དགོས།།

ཙ་གེ་ཙིག་གེའི་བྱ་སྤྱོད་ངན་པར་གོམས་ན།།

ཚ་ཟེར་ཉི་འོད་ཁྲོད་ནས་འདུག་ལོང་མེད་པར།།

ཛ་དྲག་ལས་མཐའ་ལོག་པའི་སྔ་ལྟས་བྱུང་ཡང་།།

ཝ་མོ་གྲ་འཛུམ་ཅན་བཞིན་རླུང་རྟ་རྒུད་འགྲོ།།

ཞ་ར་འོན་པར་འཕྲད་ན་བྱོལ་ནས་མ་འགྲོ།།

ཟ་ཁ་སྡེར་ཁ་གཅིག་ནས་འཆམ་མཐུན་གནང་ནས།།

འ་ཅག་མི་ཡི་སྐྱིད་སྡུག་ལས་ལ་དབང་ཡང་།།

ཡ་རབས་དམ་པའི་གཅེས་སྐྱོང་འབོར་བ་མ་གནང་།།

ར་བ་གངས་ཅན་པ་ཡི་རིགས་སུ་སྐྱེས་པའི།།

ལ་འདབས་ལུང་པ་སོ་སོའི་རིགས་གཅིག་སྤུན་ཟླ།།

ཤ་དང་རུས་པ་འབྲེལ་བའི་མཛའ་གཅུགས་ཟབ་མོ།།

ས་ཆ་སྟོད་སྨད་ཀུན་ནས་བརྗེད་པ་མ་གནང་།།

ཧ་ཅང་མཁས་མཛངས་ལྡན་པའི་མི་རིགས་འདི་ཡི།།

ཨ་དོན་སྐྱེ་མེད་རྟོགས་པའི་གྲུབ་བརྙེས་གོང་མ།།

སྔོན་རབས་དམ་པའི་གསུང་རབ་སྙིང་ལ་ལེན་ཞོར།།

བཅོས་མིན་བརྩེ་བའི་སྐྱེམས་ཆང་འདི་ཡང་གསོལ་ལོ།།