ཀ་ནི་དབྱངས་གསལ་སུམ་ཅུའི་ཐོག་མ་ཡིན།།

ཁ་མཁས་བྱིས་པ་དག་གིས་དང་པོར་སློབ།།

ག་ཙམ་ཟེར་ཡང་དབྱངས་གསལ་སོ་བཞི་ཡོད།།

ང་འདྲ་བླུན་པོ་དག་གིས་ཅུང་ཤེས་དཀའ།།

ཅ་ལག་ཉོ་ཚོང་བསམ་ན་དབྱངས་གསལ་སྦྱོངས།།

ཆ་ལག་སྟབས་བདེ་འདོད་ན་ལྷག་ཏུ་སྦྱོངས།།

ཇ་ཆང་འགྲེམ་སྤེལ་དགོས་ན་བོད་ཡིག་ཕྲིས།།

ཉ་ཉོག་དུས་རབས་འདི་ལ་རང་ཡིག་མཁོ།།

ཏ་ཐ་ཏཱ་ཡི་ལམ་ནི་ཐག་རིང་ཞིག།

ཐ་མལ་རང་ལ་མཚོན་ན་སྟོང་བསམ་ཞིག།

ད་ལྟའི་གནས་བབ་འདི་ལ་བསམ་པ་ན།།

ན་ཚ་མེད་ཐོག་འདི་ནས་རང་ཡིག་སྦྱངས།།

པ་པུར་སྐད་ངན་སྨྲ་བར་མི་མཛའ་ཡང་།།

ཕ་ཡིག་གཙང་མ་འབྲི་བའི་ཐོབ་ཐང་ཡོད།།

བ་བཅོལ་གང་བྱུང་སྨྲས་པ་མང་ན་ཡང་།།

མ་ཡིག་སྲོག་ལ་འཛིན་པའི་རང་དབང་ཡོད།།

ཙ་གྲཾ་ནང་ལ་གང་བྱུང་ལབ་པ་བས།།

ཚ་གཟེར་ན་གཟེར་ངང་གི་རང་ཉིད་ལ།།

ཛ་ཧཾ་བརྟན་པོར་བཟུང་སྟེ་གངས་ལྗོངས་འདིར།།

ཝ་བ་ཇི་བཞིན་རང་སྐད་རང་ཡིག་དེ།།

ཞྭ་བཞིན་གཙུག་ཏུ་བཀུར་ལ་ཡི་རངས་བྱ།།

ཟ་ཁང་མགྲོན་ཁང་སོགས་ཀྱི་སྒོ་བྱང་ཡང་།།

འ་འུར་ནག་ནོག་དཀོན་པའི་རང་ཡིག་ཕྲིས།།

ཡ་ཙམ་བྲིས་ཀྱང་ཡིག་ནོར་མང་བ་དེ།།

ཧ་ཅང་གཟབ་ནན་མེད་པའི་ཚོད་དུ་སླེབས།།

ཨ་ཕ་ཨ་མ་བསམ་ན་རང་ཡིག་ཕྲིས།།

མེས་པོ་ཡང་མེས་བསམ་ན་མ་ཡིག་སྦྱོངས།།

གང་དང་ཅི་ལ་འཕྲད་ཀྱང་སྐད་ཡིག་དགོས།།