ཨ་ནུ་དད་ཞེན། 2021-05-24
མགོ་དཀྲིས་དམར་བོ་བསྐྱིལ་བའི།།
མངོན་ཆུང་ཟུར་མིག་དགོད་བཞིན།།
འགྲམ་པ་དམར་མདངས་རྒྱས་པ།།
ཁ་སྣ་ཆུང་བའི་འབྲོག་མོ།།
ལུས་ཡོངས་འོ་དྲི་འཐུལ་བའི།།
ལག་པ་ལྕི་འདམ་དྲོ་བའི།།
འབྲི་མོ་བཞོ་བར་འབད་པའི།།
ཚེགས་ཡངས་ཆེ་བའི་འབྲོག་མོ།།
སློག་པའི་འཐུ་ཁ་ཟད་ཅིང་།།
ལག་པ་སེར་ག་གས་ཤིང་།།
སྒེག་ཉམས་སླར་ཡང་རྒྱས་པའི།།
ན་ཆུང་ཡིད་ཀྱི་འབྲོག་མོ།།
ངག་ནས་མ་ཎི་སྐྱོར་བཞིན།།
སེམས་ནས་དགེ་ལ་འབད་པའི།།
གཤིས་འཇམ་ཁྲེལ་ཡོད་ལྡན་པ།།
མཛངས་མ་ཡིད་ཀྱི་འབྲོག་མོ།།
སྐྲ་སྣེ་ཁ་བཏགས་མདུད་ནས།།
མིག་ཆུའི་གནས་ཡུལ་འགྲིམས་དུས།།
སྨྲེང་བ་སེམས་ན་ཡོད་ཀྱང་།།
འཛུམ་ཆུང་སྟོན་པའི་འབྲོག་མོ།།
རི་སོམ་སྤྲིན་པའི་གསེབ་ལ།།
ལ་གཞས་ཐན་ཐུན་རྒྱུ་བའི།།
ལུག་ཁྱུ་འཚོ་བར་གོམས་པའི།།
འབྲོག་མོ་ཡིད་ཀྱི་དྭངས་མ།།
སེར་ཆེན་མེ་ཏོག་ལྷན་དུ།།
ལོ་ཟླའི་སྐྱིད་སྡུག་རུམ་པའི།།
ཟ་འགྲམ་མེ་ཏོག་གསེབ་པའི།།
སྤང་ཐང་སེར་ཆེན་འབྲོག་མོ།།
རྩོམ་གསར། 10