གངས་ཟེགས། 2021-04-28
སྐྱེས་པ་ཕོ་འདི་དག།
ལས་དབང་གི་བང་ཁ་འགྲན་པ་ནས།
དབུགས་གཏོང་སའི་ལྷིང་འཇགས་ཤིག་ཡོད་མི་སྲིད།
སེམས་ཚེགས་ལྕགས་རྒྱ་གང་གིས་སྙིང་ཤ་མནན་རྗེས།
སྐྱེས་པ་ཕོ་འདི་དག་གིས།
རང་ཉིད་མེ་རུ་བསྒྲོན་ནས་སྙིང་སྟོབས་ཀྱི་རྨ་ཁ་ལས།
ལྐོག་ནས་རང་ཉིད་གཅིག་པུས།
བརྩེ་དུང་གི་ཁྲག་དམར་འཇིབ་བཞིན་ཡོད།
སྐྱེས་པ་ཕོ་ཞིག་གི་མགོ་དགོག་གསེང་ན།
སྡུག་ཡུས་ཀྱི་མཆིལ་མ་མང་བོ་ཡོད།
སྐྱེས་ནས་འཆི་བའི་བར་དུ་རང་གི་ཡོད་ཚད་བཙིར་ནས།
མི་མངོན་པའི་བུད་མེད་ཀྱི་རལ་གྲིས།
སྐྱེས་པའི་ལྷིང་འཇགས་ཀྱི་སེམས་ཁམས་དང་།
རྣོ་ངར་ཆེ་བའི་སྙིང་སྟོབས་ཡོད་ཚད།
མཐའ་མཇུག་རྩམ་པ་བཞིན་བཏག་ནས་བུད་འགྲོ།
སྐྱེས་པ་ཕོ་ཞིག་ཏུ་སྐྱེས་བ་ནས།
ཞེ་སྡང་གིས་ལྕགས་ནག་བཞུ་ཐུབ།
ངོ་སྲུང་སྤུ་ཉག་ཙམ་གྱི་ཆེད་དུ།
སྙིང་ཁྲག་གིས་མཆོད་པ་འབུལ་ཐུབ།
སྐྱེས་པ་ཕོ་ཞིག་གི་ཁ་ངོ་ལས།
ནམ་མཁའ་དང་ས་གཞི་ཐལ་བར་བརླག་ཐུབ།
སྐྱེས་བ་འདིར་ཕྱིར་འཐེན་མེད་པས།
ངས་ལྷིང་འཇགས་ཀྱི་ཁ་དབུགས་ཁམ་གང་ཡང་རྙེད་མ་བྱུང་།
ཁོད་ཡངས་པའི་རྨི་ལམ་ལས་ངལ་གསོ་ཙམ་ཡང་མ་ཐུབ།
སྐྱེས་བ་འདིར་ང་ལྷིང་འཇགས་ཀྱིས་འཆི་མི་ཐུབ།
རྩོམ་གསར། 10