ལུག་རྫི། 2021-02-03
ཕོ་རྒྱ་མདའ་ཤོང་མདུང་ཤོང་ཟེར་སྲོལ་ཡོད།
ངས་ཀྱང་ཆེ་རློམ་གྱིས་བུད་མེད་ལྡབ་འགྱུར་གྱིས་
མང་བ་ཆུད་སྙམ།
ནུ་ཞོ་ལྡུད་མཁན་གྱི་བུད་མེད་དེ་ཨ་མར་ཤེས་རྗེས།
ངའི་བློ་རྒྱ་སྲུབས་དོག་པོ་ཆགས་སོང་།
ཧ་ལམ་ཁོ་མོས་བཀང་བ་འདྲ།
དེ་ནས་བཟུང་།
ངས་ཚེ་གང་ཁོ་མོས་ཆོག་སྙམ་པའི་འདོད་ཆུང་གི་
བློ་བསྟེན་གྱིན་བསྟེན་གྱིན།
ནར་སོན་གྱི་ཁུག་ཀྱོག་ཅིག་ནས།
ནུ་ཞོས་མ་འགྲངས་པའི་ལྟོགས་སྣང་ཞིག
ང་ལ་བསྟུད་མར། བསྟུད་མར།
ཉི་ཤར་ནས་ཉི་ནུབ་བར་དུ་བྱུང་གི།
ལྷག་ཏུ་ས་སྲོད་ལ་ན་ཟུག་བཞིན་དྲག་ཏུ་ལྡང་འོང་།
ཉིན་ཞིག
སྟེས་དབང་གིས་ལྟོགས་ཅོར་རྒྱག་མཁན་ཞིག་ལ་འཕྲད་དེ།
ང་རང་ཁོ་མོའི་སྙིང་གི་དཔྱིད་དུ་སྨིན་ཞིང་།
མོ་རང་ཁོ་བོའི་མིག་གི་དཔལ་དུ་བཞུགས་པས།
ངའི་བློ་རྒྱའི་རྩིག་སྲུབས་ལ།
རླུང་བུའང་ཐར་དཀའ་བར་གྱུར་ཏེ།
ལན་བུ་ཅན་སྦྲང་བུར་སྤྲུལ་ནའང་།
འཛུལ་ས་མེད། འཕུར་ས་མེད།
ངའི་བློ་རྒྱ་ལ་ཁྱོད་རང་ཤོང་ཙམ་ལས་མེད།
རྩོམ་གསར། 10