རོལ་སྐུད། 2021-01-06
ཡར་ཡར་མཐོ་བའི་བྱ་རྒྱལ་རྒོད་པོ་དང་།།
མར་མར་འགྲོ་བའི་གཙང་ཆབ་འདི་ཀོ་ཡིས།།
དལ་དལ་ཚེ་ཡི་བྱེ་མ་རལ་གྱུར་པའི།།
གསལ་གསལ་ཕུང་ཁམས་སྣང་བ་རིམ་གྱིས་ངལ།།
ཕར་ཕར་འགྲོ་བའི་ལ་ཁའི་ཉི་མ་དང་།།
ཚུར་ཚུར་འོང་བའི་གྲིབ་སོ་ནག་པོ་ཡིས།།
དཀའ་དཀའ་ཆོས་ཀྱི་རྟེན་བཟང་ཆུད་ཟོས་པའི།།
ཡང་ཡང་སྐྱོ་མགུར་ངག་ཐུན་འདི་ཐོས་གཅོང་།།
འཇིགས་འཇིགས་སོ་ཞོ་ངོམ་པའི་འཆི་བདག་དང་།།
རྔམས་རྔམས་གྱད་ཀྱིས་འགྱིངས་པའི་སྟོབས་ལྡན་དཔུང་།།
ཧྲེང་ཧྲེང་གྲོགས་བྲན་བོར་བའི་ཁོ་བོ་ལ།།
ཧ་ཧ་དགོད་བརྒྱ་བཞད་པས་སྙིང་ཚལ་བགས།།
མང་མང་འབྲུ་ནོར་ཞིང་ས་གླིང་བཞི་ཡི།།
གྲགས་གྲགས་སྙན་པ་སྟོང་གིས་དྲེགས་ནའང།།
མྱུར་མྱུར་འདི་སྣང་འགག་པ་ཆ་མེད་པས།།
རིག་རིག་མིག་གིས་ལོངས་སུ་སྤྱོད་ཞེན་ལོག །
ཡང་ཡང་བརྩེ་འདུན་ཟབ་པའི་ཁྱོ་མོ་དང་།།
འགྲོགས་འགྲོགས་ཕྱི་ཐག་རིང་བའི་གྲོགས་རྣམས་ཀྱིས།།
སྐྱིད་སྐྱིད་སེམས་ཀྱི་ངལ་བ་གསོས་ནའང་།།
ཤར་ཤར་སྣང་མཆེད་འགག་པས་བརྡ་འདིས་འཇིག །
ཧབ་ཧབ་ཟུག་པའི་དུར་ཁྱི་སྔོ་ནག་དང་།།
ཧེམ་ཧེམ་ཟ་བའི་དུར་བྱ་ཐང་ནག་གིས།།
གཅེས་གཅེས་ཕུང་པོའི་ལྷ་བཤོས་མིད་པ་ཡིས།།
སྣང་སྣང་འདི་ངོགས་འདི་ལ་ཞེན་རེ་ཅི།།
ད་ནི་ད་ནི་ད་རེས་རྟེན་ཐོག་ལ།།
ཆེ་ཆེ་ཆུང་ཆུང་གང་ཞིག་བསྒྲུབ་ནུས་ཀྱང་།།
ལིང་ལིང་སེམས་ཀྱི་འགྱུ་འཕྲོ་མཚམས་བཞག་སྟེ།།
ཨེ་ཨེ་དཀར་ཕྱོགས་ཤིག་ལ་འབད་ན་ཨང་།།
རྩོམ་གསར། 10