རྫ་ཆུ་དྭངས་མོ་བཏུང་ནས་ཚེ་སྟོད་རྫོགས།།

གོས་དང་པགས་ཀྱིས་རྒྱག་དྲོན་ཕྱེད་ཙམ་མྱངས།།

རྩྭ་ཐང་སྔོ་ལྗང་འཛིན་མར་གདན་དུ་བཏིང་།།

སྤྲི་དཀར་འོ་མས་གསོས་པའི་འབྲོག་ལུ་ཚོའི།།

སྐྱེ་བའི་སྨད་ནི་ཟིང་ཆེན་གྲོང་ནས་རྒས།།

དོང་ཆུ་བཏུང་སྟེ་སྐོམ་པ་སེལ་ལམ་ཅི།།

བཙོག་ཆུ་རྫིང་གིས་རྙོག་ལ་དོགས་མེད་པའི།།

ང་ཡི་འབྲོག་མིས་ཉོས་པའི་རང་སྡུག་ཨང་།།

སྔ་ཕྱིའི་འགྲོ་ལམ་འཛུལ་བའི་ལམ་ལུགས་འདིས།།

མཇུག་མར་རང་ས་རང་ཡུལ་བརླག་དོགས་མོད།།

བྱ་བ་ཐམས་ཅད་འདོད་ཐོག་དབབ་འདོད་ཀྱིས།།

རྟིང་མའི་དོན་རྣམས་ཞིབ་མོར་མི་དཔྱད་པས།།

ཁ་སྡུག་ལག་སྡུག་ཅན་གྱི་མི་ཚོགས་འདིའི།།

རུས་དཀར་ཁེབས་མ་ནག་པོས་བཙོག་དུས་སུ།།

གཉུག་གཤིས་འོ་སྤྲི་ལྷགས་པའི་རྒོད་ཁྱུ་དག །

མཐོང་འཛིན་ཡུལ་དུ་ད་དུང་ཡོད་དམ་ཀྱེ།།

ཡིད་ཀྱི་གཞོངས་ལ་འཁྱིལ་བའི་མཚོ་ཆུང་ཁར།།

རྡུལ་དྲེག་རྙོག་གིས་རླུང་ནག་མ་འདྲེན་དང་།།

འབྲོག་ས་ཁུ་སིམ་དཀྲོལ་བའི་རོལ་དབྱངས་ལ།།

རྣ་བ་བླགས་ཏེ་སངས་དང་ཞི་བར་མཛོད།།

ཁ་བའི་རི་ཡིས་བསྐོར་བའི་དཀྱིལ་ཡངས་ནས།།

ག་ལེར་སེམས་པ་ལྷོད་དེ་བཞུགས་ཙ་ན།།

སྐྱིད་ཀྱིས་ཡ་ཆུང་འཕལ་ཀ་འགྲིག་པོ་འདུག །

ངན་ངོན་མི་ཡིས་འཆལ་གཏམ་ཐོས་ཀྱང་མེད།།

ཆང་དུད་གློ་ནད་འཕེལ་བའི་གྲོང་ཁྱེར་ནས།།

གད་སྙིགས་འགྱིག་ཤུན་སྦར་བའི་དྲི་ངན་འཐུལ།།

ནད་ཚུགས་བཟུང་སྟེ་འཆི་དགོས་ཁྱོད་ཀྱི་ལས།།

གདམ་ཀ་གཞན་ཞིག་མེད་ཕྱིར་དུར་ཁྲོད་ནས།།

རྒོད་པོས་བཏོགས་ཏེ་སྙིང་རྗེའི་ཡུལ་དུ་གྱུར།།

ལྔ་ལམ་སྨག་བསལ་མ་ཎིའི་སྒྲ་ཡང་ཁེགས།།

ཆོས་ལྡན་གངས་ཡུལ་སྐྱེས་པའི་དོན་ཡང་རྟུལ།།

ཨ་ཙི་འཁོར་བའི་འགྲོ་རྣམས་སྙིང་རྗེའི་ཡུལ།།