སྣང་བརྙན་གར་གྱིས་རྩེན་པའི།།

འཕྱོངས་རྒྱས་ཟླ་བ་སྒྲོལ་མ།།

ཡིད་ཀྱི་མེ་ལོང་ངོགས་སུ།།

ཡང་ནས་བསྐྱར་དུ་འཁོར་སོང་།།

ལྷ་སའི་ཁྲོམ་ར་ནང་དུ།།

མི་ཚོགས་རྒྱ་འདུས་སྟོང་འདུས།།

ཡིད་སེམས་གཏན་གྱི་བདག་པོ།།

འཕྱོངས་རྒྱས་ཟླ་སྒྲོལ་ཡིན་འགྲོ།།

ཕོ་བྲང་དྲི་འཛིན་དབུས་སུ།།

ལྷ་མོའི་ཞལ་ཐང་མང་རུང་།།

གདོས་བཅས་ཤ་ཁ་ལྷོད་པ།།

ཁྱོད་འདྲ་གཅིག་ཀྱང་མེད་དོ།།

ལོ་དེ་ཟླ་ཡིས་བསྲིངས་པ།།

ཆུ་མོའི་རྒྱུན་བཞིན་རིང་པ།།

ཞེ་འདྲིས་སྙིང་གི་བྱམས་པ།།

འགྲོགས་འདྲིས་རིང་འདི་སྤྲོ་བ།།

འཕྱོངས་རྒྱས་འཕྱོངས་རྒྱས་མ་གསུང་།།

ལྷ་སའི་སྐྱིད་ཆུ་འགྲམ་ན།།

ཨ་ཅག་ཟླ་བ་སྒྲོལ་མའི།།

སྣང་བརྙན་ཉ་མོའི་ཚོགས་ཡིན།།

བར་སྐོར་ནང་མ་ཞིག་ནས།།

ཆང་འདྲེན་བུ་མོ་ཞིག་གིས།།

ཞིམ་མངར་ཆང་སྐྱེམས་འདྲེན་དུས།།

ཟླ་བ་སྒྲོལ་མ་དྲན་བྱུང་།།

བསིལ་གྲིབ་ཁང་ཆུང་དབུས་ནས།།

འཁོས་གཞིས་ཐབ་ཆ་ཚང་བ།།

བདེ་ཚོར་ངང་གིས་སྟེར་བ།།

འཁོར་བའི་སྙིང་པོ་ཚོར་མྱོང་།།

དབང་ཆེན་དཔོན་པོ་མེད་ན།།

ང་དང་ཟླ་བ་སྒྲོལ་མ།།

ལྷ་ལྡན་དག་པའི་ཞིང་ནས།།

ལྷ་ཡན་བདེ་དགའ་རོལ་འགྲོ།།

མི་ཁའི་རླུང་འཚུབ་དེ་དང་།།

དབང་མེད་བཙན་ཤེད་དེ་ཡིས།།

ཟླ་བ་སྒྲོལ་མའི་གཏམ་རྒྱུད།།

རྒྱུད་དེ་བཙན་གྱིས་བཅད་སོང་།།

ལྷ་ཡི་བསྐོས་པ་མིན་པའི།།

མི་ཡི་དབང་དུ་ཤོར་བའི།།

ང་དང་ཁྱེད་ཀྱི་འདུན་མ།།

རླུང་ནང་ཚེ་ཟད་མར་མེ།།

དྲན་ཞིང་དྲན་ཞིང་བྱས་ན།།

སྐོས་ཐང་ཞེ་མེར་ལོང་བས།།

སྙིང་རླུང་ཁྲག་གིས་བསྐོར་ནས།།

མིག་ཆུ་པང་ལ་ཐོར་སོང་།།

ཨ་མ་གནམ་གྱི་རྒྱལ་མོ།།

ཁྱེད་ཀྱིས་མཁྱེན་གྱིན་ཡོད་ན།།

ཚེ་རབས་རྗེས་མ་དེ་ལ།།

ང་ལ་ལན་གཅིག་གཟིགས་རོགས།།

རིང་མིན་སྐྱིད་པའི་ལི་ཐང་།།

ཁྲུང་ཁྲུང་གཤོག་ཟུང་གཡར་ནས།།

ང་དང་ཟླ་བ་སྒྲོལ་མ།།

ལན་གཅིག་བསྐོར་ནས་འགྲོ་དགོས།།