༼ ཞར་བཀོད་གཉིས། ༽

མ་མྱང་དཀར་གྱི་སྙིང་རླུང་སངས་ཕྱིར་དུ།།

མཐུ་སྔགས་ཟོར་ལ་རྩལ་གྱིས་ཐོགས་མེད་སྦྱངས།།

གཉེན་ཨ་ཁུ་དང་ཨ་ནེའི་ཁང་མཚེས་ལ།།

སྐྱིད་མི་རྟག་གི་སྤང་རིའི་འཇའ་ཚོན་ཤར།།

ཆུང་མཛེས་སེ་མའི་བརྩེ་བ་རླུང་ལ་བསྐུར།།

བདུད་འཇིག་རྟེན་གྱི་གཡེང་བས་མ་བསླུས་ཤིང་།།

ཞེ་ཐག་པ་ནས་འཁོར་བར་ཞེན་ཁ་ལོག།

ཁྱིམ་བཟའ་ཚང་གི་སྐྱིད་སྡུག་བློས་གཏོང་བྱས།།

ཚེ་ངེས་མེད་ཀྱི་སྣང་བ་རྗེན་པར་བུད།།

གྲོང་ཟང་ཟིང་གི་ཉམས་འགྱུར་སྤུ་ཙམ་མེད།།

སེམས་རྣམ་རྟོག་གི་རྒྱ་རུ་མ་ཚུད་པ།།

དོན་ཉམས་ལེན་གྱི་གདམས་ངག་ཀྱུ་རུ་རུ།།

གནས་རི་ཁྲོད་དུ་གྲོགས་མེད་གཅིག་པུར་རྒྱུ།།

ཟས་ངན་ངོན་གྱི་འཚོ་བ་ཅི་བདེར་རོལ།།

ལུས་ཤ་ཁྲག་ལ་བདག་པོ་གཞི་ནས་བོར།།

ཚེ་ཕྱི་ཕྱིར་གྱི་སྐྱིད་པའི་ལས་ལ་གཞོལ།།

སྟོད་བྲག་དཀར་གྱི་དབེན་ཕུག་ནང་རོལ་ཏུ།།

རྡོ་འབོལ་གདན་དུ་བརྩེགས་པའི་ཁྲི་སྟེང་ན།།

སྐུ་གཡོ་མེད་ངང་རྩེ་གཅིག་སྒོམ་ཟླས་མཛད།།

ཆོས་གང་ཤར་རྣམས་སྙན་པའི་མགུར་དུ་གྱེར།།

གོས་རས་དཀར་གྱི་གཤོག་པ་ལྗང་ཞིང་མཉེན།།

ནང་ཆོས་ཉིད་ཀྱི་མེ་ལོང་དྭངས་ཤིང་དཀར།།

ཕྱི་སྒྱུ་ལུས་ཀྱི་ཕུང་པོ་རིད་པར་གྱུར།།

རྗེ་རྣལ་འབྱོར་གྱི་དབང་ཕྱུག་མི་ལ་དྲན།།

སྨོན་ལམ།

བདག་གི་སེམས་ནི་རྣམ་པར་དྭངས།།

སྤྲིན་དང་བྲལ་བའི་ནམ་མཁའ་འདྲ།།

དེ་ཡི་དབུས་སུ་ཉི་ཟླ་ལྟར།།

བསྐོར་ནས་དལ་དལ་འགྲོ་བ་པོ།།

རིང་ནས་ཚུར་བྱོན་ལྷ་མོ་ཁྱེད།།

མ་ཆགས་ཆགས་བྲལ་བརྩེ་ཆེན་མ།།

སྤྱན་གྱི་ཞགས་པ་མ་ལྷོད་པར།།

ལུག་ཁྱུ་བཞིན་དུ་འཚོས་སམ་ཅི།།

ཁྱེད་ལ་བདག་ནི་འབུལ་ལགས་ན།།

ཁྱེད་ཀྱི་སློབ་མར་བཟུང་དུ་གསོལ།།

ནམ་མཁའི་སྤྲིན་ཐོག་བཞུགས་པ་ན།།

སྐུ་ནི་སིན་རྡུ་ར་ལྟར་དམར།།

མཛེས་ཞེས་བརྗོད་པ་བསམ་མི་ཁྱབ།།

ཟླ་བ་དེ་ནི་ཕམ་པར་བྱས།།