སྐལ་བཟང་རྡོ་རྗེ། 2017-10-09
མེ་ཏོག་གོས་ཀྱིས་བཀླུབས་པའི་ཕ་ཡུལ་དང་བྲལ་ཏེ།།
རྒྱང་རིང་ལེ་དབར་སྟོང་གི་ཡུལ་གྲུ་རུ་ཆས་དུས།།
བྱམས་བརྩེའི་འཛུམ་མདངས་རྒྱས་པའི་དྲིན་ཆེན་གྱི་མ་ལོའི།།
ཞལ་རས་ཡིད་ལ་འཆར་ཏེ་མིག་ཆུ་རང་འཐོར་སོང་།།
མཛེས་པའི་རྩྭ་ཐང་བརྒྱུད་དུས་འདོ་རིགས་དང་གཡང་དཀར།།
མ་བུ་ལྷན་དུ་འཛོམས་ནས་ནོར་འཛིན་གྱི་གཞི་རུ།།
བག་ཡངས་རྩྭ་ཆུར་རོལ་བའི་ངང་ཚུལ་དེ་མཐོང་དུས།།
མ་ཡུམ་དྲན་པའི་མིག་ཆུ་སྤང་ཐང་དུ་ལུས་སོང་།།
གསེར་ལྡན་འབྲི་ཆུ་དེད་དེ་གྱེན་ཕྱོགས་སུ་བསྐྱོད་དེ།།
གསེར་མིག་ཉ་མོ་མ་བུའི་འཁྱུག་རྩལ་དེ་མཐོང་དུས།།
རྒྱང་རིང་ཡུལ་གྱི་ཨ་མའི་ཉམས་འགྱུར་དག་མངོན་ཚེ།།
ཡིད་སེམས་སྐྱོ་བའི་མིག་ཆུ་འབྲི་ཆུ་རུ་འཐིམས་སོང་།།
རི་གསུམ་ལྷུན་པོའི་རྩེ་ནས་བར་སྣང་དུ་ཕྱོགས་ཚེ།།
བྱ་རྒོད་མ་བུས་འཕུར་རྩལ་ངོམས་སྣང་དེ་འཆར་ལ།།
བར་སྣང་ཆུ་འཛིན་དཀར་པོའི་བང་རིམ་ལ་ཞུགས་དུས།།
དྲན་གདུང་མིག་ཆུ་རེ་རེས་མཁུར་ཚོ་རང་བརླན་སོང་།།
རྩོམ་གསར། 10