རེ་བ་ཡོད་ཀྱང་འགྲུབ་པ་དཀའ་བ།།

ཉི་མ་པད་མའི་ངང་ཚུལ་མ་ཡིན།།

སྔ་དྲོ་མཇལ་ཞིང་ཕྱི་དྲོར་འཛོམ་པས།།

བསྐོས་པའི་ལས་འདི་ཁོལ་དུ་བྱུང་བ།།

འོན་ཀྱང་ལུས་ངག་ཆོ་འཕྲུལ་རྣམ་པས།།

སེམས་ཀྱི་དཔུང་ལ་ངང་གིས་རྒོལ་དུས།།

བདག་ནི་སྔ་ལྟར་ཚུགས་པ་དཀའ་སྟེ།།

རྒྱུ་མཚན་མེད་པར་འཕག་འཚག་རྒྱག་པ།།

དབེན་པའི་ཕྲག་ནས་རྒྱང་དུ་ཅེར་ཞོར།།

རྟག་པ་ཡིན་པའི་སྒྲོལ་མ་ཁྱེད་རང་།།

མི་བརྟན་འགྱུར་ལ་བླུན་ཚུགས་ཤོར་འགྲོ།

ཀྱེ་མ་འུ་གཉིས་མཆོད་རྟེན་ཟུར་གྱི།

ཐང་གི་མེ་ཏོག་གཟུགས་སུ་ཤར་བ།།

བདག་གིས་ཁྱེད་ལ་གསང་མིང་གདགས་འདོད།།

མེ་ཏོག་ཟེར་རམ་སྒྲོལ་མས་དགའ་འདུག།

སྐྱེངས་པའི་སྣང་དོགས་རྡུལ་ཙམ་མེད་པར།།

གཡས་གཡོན་ཁེན་ཞིང་པང་དུ་འགྱེལ་བ།།

དོན་མཐུན་གན་དང་མི་མཐུན་འདི་ཞེས།།

ཕན་ཚུན་བགྲོ་བའི་དུས་ཚིགས་བསམ་ན།།

ཞལ་ཙམ་མིན་པར་གཏིང་ནས་སྐྱིད་ཀྱང་།།

ལུས་ངག་ཡིད་གསུམ་དབྱེར་མེད་ཡིན་པས།།

ཀི་ཞིག་བཏབ་ཀྱང་བཏབ་རིན་འདུག་གོ།

གལ་ཏེ་ཁྱེད་ནི་སྡེ་ཆེན་གྲོང་གི།

དཀར་པོ་རྐྱང་པའི་མི་ཞིག་ཡིན་ཚེ།།

བདག་གིས་ཤག་ཏུ་མཚར་སྣང་མི་སྐྱེ།།

ཉིན་གྱི་བྱ་ར་མཚན་གྱི་མེལ་ཚེའི།།

ཚུལ་གྱིས་ང་ཡིས་སྲུང་མཚམས་མི་འཇོག།

གཞན་པ་དག་དང་གཅིག་པ་ཡིན་ནམ།།

འུ་གཉིས་མཚུངས་པའི་དཔེ་ཞིག་དྲང་ན།།

དགའ་སྡུག་གཅིག་པའི་གཡག་རྒོད་གཉིས་རེད།།

ཡང་ན་གཤོག་ཆད་སྦྲང་མ་གཉིས་རེད།།

གནམ་ལ་འཕུར་ཞིང་ས་སྟེང་རྒྱུག་ཀྱང་།།

འདི་ལས་ལྷག་པའི་སྐལ་ཞིག་མེད་དོ།།